Psalms 116

Iehova na lalokau heniamu,
badina be gadogu bona egu noinoi danu vada e kamonai.
Badina be taiana vada e kirara egu ai;
taunabunai lau ese ia baina boi henia, egu mauri dinadia iboudiai.
Mase ena idoa e ḡeḡegu ahuva,
mase gabuna hisidia ese e gugubaguva,
lalo-hisihisi bona dara-doko danu e alaguva.
Bena Iehova ladana na hahanea, nato
“Iehova e, lau na noi henimumu, ba hamaurigu”.

Iehova na mai ena harihari-bada bona mai ena kara maoromaoro,
eda Dirava na mai ena hebogahisi.
Iehova ese asi aonegana tauna e nariamu;
na hekwakwanaiva negadia ai e hamauriguva.
Laumagu e, emu laḡa-ani gabuna ba lou henia,
badina be Iehova ese vada e harihari henimu.
Badina be oi ese laumagu na mase amo vada o rauaia,
iruru-matagu vada o dahu oho,
aegu vada o rudia, basie hetutuhi.
Iehova vairanai na rakamu,
mauri taudia edia tano ai.
10 Ena be lau nato “Vada na hisihisi hereamu”,
to egu abidadama na ha-aukaia.
11 Egu kudou-hetaha ai lau nato
“Taunimanima iboudiai ibadinadia na asi anina”.

12 Dahaka Iehova baina henia,
ena harihari-bada idoinai egu ai na davana?
13 Hahemauri keherena baina abia isi,
Iehova ladana baina hahanea.
14 Egu gwauhamata anidia na Iehova baina henia,
ena orea taudia iboudiai vairadiai.
15 Iehova vairanai ḡau herea-daena na
ena helaḡa taudia edia mase.
16 Iehova e, lau na emu hesiai tauna,
lau na emu hesiai tauna, emu hesiai hahinena natuna;
oi ese iḡuigu vada o ruha.
17 Oi ihanamomu na egu boubou ḡauna ai baina halaoa,
bona Iehova ladana baina hahanea.
18 Egu gwauhamata anidia na Iehova baina henia,
ena orea taudia iboudiai vairadiai,
19 Iehova ena ruma maḡudia lalodiai,
Ierusalem e, oi bogaragimu ai.
Iehova ba imodaia.
Copyright information for `MEU