Psalms 132

Iehova e, David ba laloa;
hisi-ani e haheaukalaia ba laloa tao.
Ia ese Iehova e gwau henia hamata,
Iakob ena Dirava herea-daena e gwau henia hamata.
Nato: Egu ruma lalonai basina raka vareai,
egu mahuta patana ai basina hekure,
matagu basina hamahutadia,
matagu kopidia basina hakapudia,
ela bona Iehova ena gabu ta baina davaria,
Iakob ena Dirava herea-daena ena noho gabuna ta.

Efrata ai sivaraina ta kamonai,
Iara umadia ai ta davaria.
Ena noho gabuna aitala,
aena ihadaina ḡauna vairanai baita toma diho.

Iehova e, a tore isi, emu laḡa-ani gabuna baola,
oi bona emu siahu mauana helaḡana.
Emu hahelaḡa taudia na kara maoromaoro bae hahedokilai;
emu helaḡa taudia na bae hisi dae.
10 Emu hesiai tauna David bagunai,
vada o horoa tauna ena amo basio mede kerehai.

11 Iehova ese gwauhamata aukana David e henia,
unu amo ia na basine lou.
Eto: Natumu adorana ta
emu terono ai baina hahelaia.
12 Bema natumu ese egu taravatu bae badinaia,
bona egu hahediba herevadia, baina hadibalaidia ḡaudia,
idia natudia danu emu terono ai bae helai,
ela bona hanaihanai.

13 Badina be Iehova ese Siona e abia hidi;
e ura henia, ena noho gabuna ai bainela.
14 Eto: Egu laḡa-ani gabuna binai,
ela bona hanaihanai;
iniseni ai baina noho,
badina be vada na ura heniamu.
15 Ena roge baina hahonudia,
ena ogoḡami taudia na adia baina henidia.
16 Ena hahelaḡa taudia na hahemauri amo baina hadokilaidia,
ena helaḡa taudia na bae hisi dae.
17 Unuseni ai David ena doa ta baina havaraia;
lamepa ta vada na abia heḡaeḡae, na horoa tauna ena.
18 Ia inaina na hemarai amo baina hadokilaidia,
a ia be ena havava ḡauna ese baine hadiaria.
Copyright information for `MEU