Psalms 136

Iehova ba hanamoa, badina be ia na namo;
ena hebogahisi na e hesiriu hanaihanaimu.
Dirava edia Dirava ba hanamoa;
badina be ena hebogahisi na e hesiriu hanaihanaimu.
Lohia edia Lohia ba hanamoa;
badina be ena hebogahisi na e hesiriu hanaihanaimu.

Sibona hoa bada karadia e karamu Diravana ba hanamoa;
badina be ena hebogahisi na e hesiriu hanaihanaimu.
Ena aonega amo guba e karaia;
badina be ena hebogahisi na e hesiriu hanaihanaiamu.
Tanobada na davara latadiai e idia roro;
badina be ena hebogahisi na e hesiriu hanaihanaimu.
Diari ḡaudia badadia e karadia;
badina be ena hebogahisi na e hesiriu hanaihanaimu.
Dina tara ese dina e biaguamu;
badina be ena hebogahisi na e hesiriu hanaihanaimu.
Hua bona hisiu ese hanuaboi e biaguamu;
badina be ena hebogahisi na e hesiriu hanaihanaimu.

10 Aigupto ai natu-roboadia e aladia mase Diravana ba hanamoa;
badina be ena hebogahisi na e hesiriu hanaihanaimu.
11 Idia bogaragidia amo Israel e hakaudia lasi;
badina be ena hebogahisi na e hesiriu hanaihanaimu.
12 Imana na mai goadana ida e toia roro;
badina be ena hebogahisi na e hesiriu hanaihanaimu.
13 Davara Kakakakana e hapararaia;
badina be ena hebogahisi na e hesiriu hanaihanaimu.
14 Israel taudia na bogaragina amo e harakadia hanai;
badina be ena hebogahisi na e hesiriu hanaihanaimu.
15 A Farao bona ena tuari oreana na Davara Kakakakana ai e hadareredia;
badina be ena hebogahisi na e hesiriu hanaihanaimu.
16 Ena orea taudia na tano ḡaḡaena amo e hakaudia hanai;
badina be ena hebogahisi na e hesiriu hanaihanaimu.
17 Pavapava badadia e aladia;
badina be ena hebogahisi na e hesiriu hanaihanaimu.
18 Bona pavapava mai haridia e aladia mase;
badina be ena hebogahisi na e hesiriu hanaihanaimu.
19 Sihon, Amoro pavapavana;
badina be ena hebogahisi na e hesiriu hanaihanaimu.
20 Bona Og, Basan pavapavana;
badina be ena hebogahisi na e hesiriu hanaihanaimu.
21 Bena edia tano na haida e henidia, bae ḡaunaia;
badina be ena hebogahisi na e hesiriu hanaihanaiamu.
22 Ena hesiai tauna Israel ese e ḡaunaia;
badina be ena hebogahisi na e hesiriu hanaihanaimu.

23 Ia ese e laloda tao eda noho dika ai;
badina be ena hebogahisi na e hesiriu hanaihanaimu.
24 Bona inaidia imadia amo e harohoda mauri;
badina be ena hebogahisi na e hesiriu hanaihanaimu.
25 Ia ese mauri ḡaudia iboudiai adia e henidiamu;
badina be ena hebogahisi na e hesiriu hanaihanaimu.
26 Guba Diravana ba hanamoa;
badina be ena hebogahisi na e hesiriu hanaihanaimu.
Copyright information for `MEU