Psalms 17

Iehova e, lalo-hadai maoromaorona a hakala henia; egu taitai a kamonai.
Egu ḡuriḡuri a hakala henia, bibinagu asi koikoidia ese e gwauraiamu.
Ihahemaoro-henigu na oiemu amo bainema;
oi matamu ese kara maoromaoro bae itaia.

Lalogu boma dibaia, hanuaboi ai boma vadivadi henigu,
boma tohogu, a kara dika na lalogu ai basioma davaria;
udugu na se kereremu.
Taunimanima edia ḡaukara lalodiai lau na daḡedaḡe taudia edia dala amo vada na raka siri,
oi udumu bibinadia herevadia daidiai.
Oiemu dala ai vada na raka balaheni,
lau aegu na asie dedi.

Dirava e, na boi henimumu, badina be oi ese ba haere henigu dainai;
a hakala henigu, egu hereva ba kamonai.
Oi imamu idibana ai inaidia amo e roho maurimu taudia ihamauridia Taumu e,
emu hebogahisi ba hahedinaraia, hoa ḡauna na heto.

A gimagu, ta ese matana nadinadina e gimaiamu na heto;
oi hanimu ikerukerudia ai ba hunigu,
kara dika taudia, egu ḡau e dadihaimu taudia, edia amo,
bona inaigu, e daigu heḡeḡemu taudia edia amo.

10 Lalodia e koudiamu, asi edia hebogahisi;
ududia e kehodiamu, hekokoroku herevadia e gwauraimu.
11 Idia na e gavagu taomu, e daigu heḡeḡemu,
e itagu taomu, tano ai bae tahogu dobi e tomu.
12 Idia na leona damuna idarena e ura lalodikamu na heto,
leona natuna na komu gabuna ai e banimu na heto.

13 Iehova e, a tore isi! Ba tuari henidia, ba tahodia dobi!
Emu dare bavabia, dika taudia edia amo ba hamaurigu;
14 Iehova e, oi imamu amo ba hamaurigu, taunimanima edia amo,
tanobada ai mo edia mauri ahuna e abiamu taudia edia amo.
Adia vada o abi heḡaeḡae ḡaudia amo bogadia ba hakunu;
natudia bogadia bae kunu bona bahu baine mia;
edia bahu baine mia, natudia karukarudia adia.

15 A lau be kara maoromaoro ai oi vairamu baina itaia;
baina noga negana ai oi oromamu itana ai lalogu do baine namo.
Copyright information for `MEU