Psalms 30

Iehova e, aina heatolaimu, badina be oi ese vada o verigu isi;
lau inaigu vada o rudia, basie kirikirilaigu.
Iehova e, egu Dirava, na tai henimu, ba kahagu nato;
bena oi ese o hamaurigu.
Iehova e, lau laumagu na mase taudia edia gabu amo vada o hakaua dae;
mase gabuna vada ela taudia bogaragidia amo vada o hamaurigu.

Iehova ena helaḡa taumui e, ia ihanamolaina anedia bavabi,
ia ladana helaḡana ba hanamoa.
Badina be ena badu na e ore haraḡamu,
a ena hahenamo na e hesiriumu ela bona mauri dokona.
Taitai na reana baine hesiriu rani,
a daba ai moale na baine vara lou.

Lau be egu noho namo ai nato
“Lau na basina marere ela hanaihanai”.
Iehova e, emu hahenamo amo vada o haginigu,
ororo aukana na heto;
Oi vairamu o hunia,
bena kudougu e hetaha.

Iehova e, lau oi na tai henimu;
Iehova enai na noinoi, nato
“Mase gabuna bama lao henia,
egu mase ena namo be dahaka?
Ḡahu ese oi baine hanamomu a?
Ḡahu ese oiemu heabi-dae baine gwauraia a?
10 Iehova e, a kamonai, a bogagu hisi!
Iehova e, a kahagu!”

11 Egu tai gadeḡade na mavaru ai vada o halaoa;
egu guma dabuadia vada o hadoki oho,
moale vada o hariolaigu,
12 laumagu ese baine imodaimu bona udugu basina hakapua helaoreana.
Iehova e, egu Dirava,
lau oi baina hanamomu ela bona hanaihanai.
Copyright information for `MEU