Psalms 55

Dirava e, egu guriḡuri a kamonai,
egu noinoi na basio dadaraia.
A hakala henigu, a haere henigu;
egu hisihisi ese vada e hadareregu.
Inai tauna gadona ese vada e hadaradaragu,
kara dika taudia edia daḡedaḡe karadia daidiai;
badina be idia ese e hahekwakwanaigumu,
bona edia badu ai e inai henigumu.

Lalogu na e hisihisi badamu;
mase ena hahegari na latagu ai vada e kau.
Gari bona kudou-hetaha ese e butugu taomu,
laumagu na e dauremu.
Na tomu “Bema mai hanigu, pune na heto,
bena bama roho lao, bama laga ani;
oibe, dauha bama lao,
tano ḡaḡaena ai bama noho; (Selah)
bama lao haraḡa, hemetai gabuna bama tahua,
lai bona medu ilao-ahudia”.

Ḡaubada e, edia lalo-hadai ba hadikadia,
gadodia ba haheḡonudia;
badina be haheala bona heatu na
hanua ai na itamu.
10 Dina ai bona hanuaboi ai maḡuna e rakaia heḡeḡemu,
hedibaḡani bona hekwarahi na ia lalonai e miamu,
hahebua-tari na ia bogaraginai;
11 daḡedaḡe bona koikoi karadia na
ena ariara ai asie dokomu.

12 E kirikirilaigumu tauna na dia inai tauna,
bema unuheto, bama haheauka;
e ihi-ihiraigumu tauna na dia inai tauna,
bema unuheto, iena amo bama komu.
13 A tauna na oi, lau idaigu,
lau bamogu, lau turagu korikori.
14 Ta hereva-herevava mai moaleda ida,
ta raka hebouva Dirava ena ruma ai.
15 Mase na ediai baine kau,
mauridia ai mase gabuna ai bae diho,
mai garidia ida edia guri ai bae diho,
be namo.

16 A lau be Dirava do baina boi henia;
Iehova ese baine hamaurigu.
17 Adorahi ai bona daba ai bona dina tubua ai
na maumaumu bona na ḡanaḡanamu.
Ia ese lau gadogu baine kamonaia,
18 ia ese lau laumagu baine hamauria;
na tuarilaiamu tuarina amo baine hamaurigu,
badina be hutuma ese e tuari henigumu.
19 Dirava na baine hakala, baine tuidia,
sene negana amo e nohomu Diravana;
badina be taravatu asie badinaiamu,
bona Dirava garina se garimu. (Selah)
20 Bamogu ese imana e haroroa, ia turana ihadikadia totona,
ena gwauhamata e hadikaia.
21 Ena hereva na manada-manada, bata ena manada-manada e hereaia,
a tuari be ia lalona ai.
Ena hereva na manoka-manoka, dehoro ena manoka-manoka e hereaia,
a idia na e veri lasi daredia.

22 Emu maduna na Iehova enai ba tahoa kau,
ia ese baine abimu isi;
ia ese kara maoromaoro taudia baine gimadia,
idia na basie marere-marere.

23 Dirava e, oi ese ba tahodia dobi,
henu herea gurina lalonai;
rara ihahebubuna bona koikoi karadia ikaradia taudia na
edia mauri kahana basie haḡuḡurua.
A lau ese oi baina abidadama henimu.
Copyright information for `MEU