Psalms 64

Dirava e, egu taitai ai lau gadogu ba kamonai;
egu mauri na inaigu igari-henidia amo ba rauaia.
Kara dika taudia edia lalohadai dikadia hehunidia amo ba hunigu,
kara havara taudia edia ura dikadia amo ba hunigu.
Idia na maladia e segediamu dare na heheto,
edia hereva iditadia e kinodiamu, diba na heheto;
e bani taomu, asi ena kerere tauna e tarakiamu,
e tarakia takumu, asie garimu.
Edia ura dikadia na e dogodia taomu;
idoa iato-hehunidia na e herevalaimu.
E tomu “Daika ese baine itada diba?
Daika ese eda kara dika baine tahudia diba?
Eda ura dalana vada ta haeroa mai aonegada ida”.
Badina be taunimanima lalona na dobu,
ena lalo-hadai danu dobu.

A Dirava ese ena diba amo baine tarakidia;
idia na bae bero haraḡa-haraḡa.
Badina be idia sibodia maladia daidiai ia ese edia dika do baine havaraia;
bae itadia taudia iboudiai na kwaradia bae taiko-taiko.
Bena taunimanima iboudiai bae gari,
Dirava ena kara bae herevalaia,
bona ena ḡaukara bae haeroa.

10 Kara maoromaoro taudia ese Iehova bae moalelaia,
ienai bae roho mauri;
lalo-maoromaoro taudia iboudiai ese
ia bae imodaia.
Copyright information for `MEU