Psalms 77

Dirava na tai henia lolomu,
Dirava na tai henia goadagoadamu,
baine kamonai henigu halaoreana.
Egu hekwarahi dinana ai Ḡaubada na tahuamu,
hanuaboi ai imagu na toia roromu, asina hesikumu,
laumagu ese ihalolaina se ura heniamu.

Dirava na laloamu, bena na ḡanaḡanamu;
lalogu na hadaiamu, bena laumagu na e dauremu. (Selah)
Matagu kopidia o dogo taomu, basie kapu;
egu hekwarahi e badamu dainai basina hereva dibamu.
Dina gunadia na haerodiamu,
vada e lao bubuni laḡanidia na lalodia taomu.
Hanuaboi ai lalogu na tahuamu;
lalogu na hadaiamu, bona laumagu na tahuamu.
Ḡaubada baine dadaraigu hanaihanai,
nega ta basine lalo namo henigu lou a?
Ena hebogahisi vada e doko vaitani,
ena gwauhamata vada e doko ela bona hanaihanai a?
Dirava ese harihari-bada vada e laloa boio,
ena badu ese ena hebogahisi vada e laoa ahu a? (Selah)
10 Lau na tomamu “Egu lalo-hisihisi binai,
Herea Mikamika ese imana idibana na vada e ha-idaua”.

11 Iehova ena kara baina lalodia une;
oibe, oiemu hoa karadia gunadia baina lalodia tao.
12 Emu ḡaukara idoinai baina lalo-hadailaia,
emu siahu karadia danu baina haerodia.
13 Dirava e, emu dala na helaḡa.
Edena dirava na emai Dirava idaina?
14 Hoa karadia ikaradia Diravana na oi,
oi ese emu siahu vada o hahedinaraia,
bese idau-idau bogaragidiai.
15 Oi imamu amo emu bese taudia o hamauridia,
Iakob bona Iosef garadia.
16 Dirava e, ranu ese e itamu negana ai,
ranu ese e itamu negana ai, ia na e gari;
oibe, dobu gabudia e heude-heude.
17 Ori ese medu e hadihoa,
guba danu e rahua,
bona emu kevaru e kevarua isi, kaha iboudiai.
18 Emu guba rahurahu e makohi dagu, koea hirihiri lalonai,
emu kevaru ese tanobada e hadiaria,
tanobada e marere-marere bona e heude-heude.
19 Emu raka na davara bogaragina amo,
emu dala na ranu badadia bogaragidia amo;
a vataḡamu na tau ta ese se itadia.
20 Emu bese taudia na o hakaudia, mamoe serina na heto,
Mose bona Aaron imadia amo.
Copyright information for `MEU