Psalms 96

Ane matamatana avabia, Iehova ena;
tanobada idoinai, ane avabia, Iehova ena.
Ane avabia, Iehova ena; ia ladana ba hanamoa;
daba daba iboudiai ena hahemauri ba herevalaia,
Tanobada besedia bogaragidiai ia hairaina ba gwauraia hedinarai,
ena hoa karadia danu taunimanima iboudiai bogaragidiai.
Badina be Iehova na bada ia ihanamona danu baine bada;
ia mo bae matauraia, dirava idaudia iboudiai na basie matauraidia.
Badina be bese idau-idau edia dirava na kaivakuku mo,
a Iehova ese guba vada e karaia.
Hemataurai bona heimodai na ia vairanai,
goada bona hairai na ena dubu ai.

Bese idau-idau taumui kikina badana, Iehova ba herevalaia,
hairai bona goada ba gwaurai, Iehova ena;
hairai ba gwauraia, Iehova ladana ena,
boubou ḡauna ba mailaia, ena ikoukou ai ba raka vareai.
Dabua helaḡadia ai Iehova ba toma henia diho;
tanobada idoinai, ia vairanai ba heude-heude.

10 Bese idau-idau bogaragidiai baoto: Iehova na pavapava.
Oibe, tanobada vada e haginia, basine marere ela bona hanaihanai.
Ia ese tanobada besedia baine hahemaoro henidia, mai maoromaorona ida.

11 Guba baine moale, tanobada baine hisi dae,
davara baine lolo, mai lalona ḡaudia iboudiai ida;
12 uma danu bae moale, mai anidia iboudiai.
Una negana ai uda audia iboudiai na moale anedia bae abi
13 Iehova vairanai.
Badina be ia na e maimu,
tanobada ihahemaoro henina totona e maimu.
Ia ese tanobada baine hahemaoro henia mai maoromaorona ida,
bese idau-idau taudia baine hahemaoro henidia mai momokanina ida.
Copyright information for `MEU