Revelation of John 14

Mamoe Natuna e kwalimu

Bona Mamoe Natuna na itaia, Siona ororona ai e gini; bona ia ida taunimanima domaga-ta gerebu-hani daha-hani,
domaga-ta gerebu-hani daha-hani = 144,000
ia bona Tamana Iadadia baḡudia ai e torea taudia.
Ma gado ta na kamonai, guba amo ema, sinavai momo reḡedia na heto bona guba e rahua dagumu na heto. Una gado danu e kara gitara taudia edia gitara e hataimu na heto; idia na ane matamatana e abia, terono bona mauri ḡaudia haniosi bona heitatao taudia vairadiai. Una ane na tau ta basine davaria diba, hari taunimanima domaga-ta gerebu-hani daha-hani, tanobada amo e hoidia taudia, sibodia. Idia be hahine ida asie eno bou taudia; vada e helaga. Idia ese Mamoe Natuna murinai e rakamu, ena loa iboudiai. Taunimanima padadia amo e hoidia, Dirava bona Mamoe Natuna anina roboana ai baela, taudia bunu. Koikoi herevana ta idia ududia amo se lasi; idia na asi bebeka-bebekadia.

Bena aneru ta na itaia, guba padanai e roho, mia-hanaihanai sivaraina namona na tanobada ai e nohomu taudia ediai e laohai, bese iboudiai, iduhu iboudiai, gado iboudiai, tano iboudiai e harorolai henidia. E hereva badabada, eto, Dirava garina ba gari, ia mo ba imodaia, badina be ena hahemaoro negana vada be gini daemu; guba bona tanobada bona davara bona ranu e lohilohimu gabudia e kara Diravana ba toma henia diho.

Ma aneru ta, iharuana, ia murina amo e roho, eto, Babulono badana, hanua iboudiai na ena heuda-hanai baduna vine-ranuna e ha-inulaidia hanuana, vada e kohu, vada e kohu.

Ma aneru ta, ihatoina, idia muridia amo e roho, e lolo, eto, Ta ese daḡedaḡe ḡauna mai laulauna ida baine toma henia diho, bona ia toana baguna ai eiava imana ai baine abia, 10 ia ese Dirava ena badu vine-ranuna, ena badu keherena lalonai vada e seia, ranu kavakava ida asie buloa ḡauna, baine inua; lahi bona teio amo bae hahisia danu, aneru helaḡadia bona Mamoe Natuna vairadiai. 11 E animu hisidia kwalahuna e dae hanaihanaimu, bona dina hanuaboi laḡadia asie animu; daḡedaḡe ḡauna mai laulauna ida e toma henia dihomu bona ladana toana e abiamu taudia ahudia bunu.

12 Helaḡa taudia, Dirava ena haheḡani e badinamu bona Iesu e abidadama heniamu taudia, do bae haheauka.

13 Bena gado ta na kamonai, guba amo ema, eto, Ini ba torea toma “Lohiabada enai e masemu taudia be nanamo”. Ma Lauma eto “Oibe, edia ḡaukara amo bae laḡa ani, badina be edia kara ese e ḡavadiamu”.

14 Bena na roha lao, ori kurokurona ta na itaia, bona ori latanai ta e helai, ita-itana taunimanima natuna ta na heto; kwarana ai na gold havava ḡauna, bona imana ai ilapa ta mai ganona. 15 Bena aneru ta Dubu Helaḡa amo e raka lasi, ori latanai e helai tauna e lolo henia, eto, Emu ilapa aine ḡaukara; a lapalapa; badina be uit iutuna negana vada eme kau, tanobada uitina vada e lo vaitani. 16 Bena ori latanai e helai tauna ese ena ilapa e ḡaukaralaia, tanobada uitina e lapaia vaitani.

17 Bena aneru ma ta guba dubuna amo e raka lasi, ia danu imana ai na ilapa ta mai ganona. 18 Ma aneru ta pata helaḡana amo e raka lasi; una aneru na mai siahuna lahi enai. Bena ia ese hari imana mai ilapana aneruna e lolo henia, eto, Emu ilapa aine ḡaukara; tanobada ena vine takodia ba utu, badina be vine huahuadia vada e maḡe. 19 Bena hari aneru ese ena ilapa e ḡaukaralaia tanobada ai, tanobada ena vine huahuadia e utu oho; bona moimoi gabuna badana, Dirava ena badu bunai, lalonai e taho uda. 20 Hari moimoi gabuna na hanua mulimurinai; bena e moia. Bena rara na moimoi gabuna amo e lasi, e aru ela bona maila sinahu-rua; ena dobu danu tano ela bona hosi uduna heḡereḡerena.

Copyright information for `MEU