Romans 12

Hahegoada herevadia

Taunabunai, varavaragu e, Dirava ena hebogahisi dainai na noimuimu, tau-animui idoidiai ia ba henia, boubou ḡaudia mauridia bona helaḡadia ai baela, Dirava ese baine moalelai: emui hesiai karana korikorina bunai. Ina tanobada oromana na basio tohotohoa; a lalomui ba hamatamata, bae idau vaitani, bena Dirava ena ura, mai namona bona mai hairaina bona mai hereadaena ida, vada ba diba.

E henigu hariharina dainai umui ta ta na haduamuimu, basio hekokoroku, a lalomui bae manau, Dirava ese heabidadama ahuna ta ta e henimui hagauhagau heḡereḡerena. Ita heḡereḡereda, tau ta reḡena na momo, a edia ḡaukara na idau-idau; unuhetomana, ita na hoho, a tau-anina tamona Keriso enai, reḡe idau-idau ta ḡaukara heboumu. Harihari-bada ese herahia ḡaudia vada e henida: bema peroveta, baita peroveta eda kamonai heḡereḡerena; bema hesiai lao-heni, hesiai baita lao heni; hahediba tauna baine hahediba; haroro tauna baine haroro; ihenina tauna baine henia mai moalena ida; ireḡuna tauna baine hereḡu mai goadana ida; hebogahisi tauna baine hebogahisi mai lalo-namona ida.

Emui uraheni baine momokani. Dika ba lalo nege; namo enai ba tao. 10 Ta ta ba heura heheni, varavara na heheto; ba hemataurai heheni danu. 11 Ḡaukara lalonai basio lahedo. Lauma na lalomui ai baine hururu. Lohiabada isiaina ba lao heni. 12 Helaro ai ba moale. Dika negadia ai ba haheauka. Guriḡuri ba goadalaia nega idoidiai. 13 Helaḡa taudia edia dabu ai ba kahadia. Heabi-dae karadia ba kara. 14 E daḡedaḡe henimuimu taudia ba hanamodia; basio uduguiraidia. 15 E moalemu taudia ida ba moale; e taitaimu taudia ida ba tai.

16 Iboumui ai lalomui bae tamona. Herea ḡaudia basio lalodia, a manau taudia ida ba noho hebou. Sibomui emui aonega basio heaḡilaia. 17 Tau ta basio kara dika henia, iena dika davana; a taunimanima iboudiai vairadiai kara namo mo ba kara. 18 Bema mai dalana, taunimanima iboudiai ida ba noho mai mainomui ida. 19 Egu lalokau taumui e, dika basio hadavaia; badu baine mia. Badina be vada e torea, Lohiabada eto “Dava be lau imagu ai, lau ese baina karaia”. 20 Taunabunai, inaimu bema hitolo, ana boma henia; bema ranu mase, ranu boma henia; unu ba kara toma, e kara lahi gidadia kwarana tubuana ai ba giḡi kau na heto. 21 Dika ese basine hadarelemui, a emui kara namo amo dika ba hadarerea.

Copyright information for `MEU