Romans 4

Abraham herevana

Seneda Abraham na ede baita herevalaia toma? Ia ese dahaka ḡau e davaria? Abraham na ena kara daidiai maorona bema gwauraia, ia na mai badina bema heaḡi; to dia Dirava vairanai basinema heaḡi. Buka Helaḡa na dahaka e tomamu? Abraham ese Dirava e abidadama henia dainai maorona e gwauraia. Ḡaukara tauna ese ahuna e abiamu, dia harihari ḡauna, a davana korikori. A se ḡaukaramu to kara dika taudia na kara maoromaoro taudia ai e halaodiamu Diravana e abidadama heniamu tauna, ia be ena abidadama dainai maorona e gwauraiamu. Dirava ese ena kara se laloamu to maorona e gwauraiamu tauna na David ese danu vada e hanamoa, eto, Edia kara rea e gwau taomu bona edia dika e herome ahumu taudia na nanamo; Lohiabada ese dikana se gwauraiamu tauna hari namo.

ma hahenamo na peritome taudia mo sibodia ese bae abia a? Eiava asie peritomedia taudia danu? Ita ta tomamu “Abraham ese Dirava e abidadama henia dainai maorona e gwauraia”. 10 Edena nega ai? E peritomea murinai, eiava do se peritomea negana ai? Dia peritome lalonai, a do se peritomea negana ai, ani? 11 Do se peritomea negana ai ena abidadama na maoromaoro; gabeamo e peritomea, ena abidadama maoromaorona toana. Taunabunai, ia na asie peritomedia to mai edia abidadama taudia tamadia: maorodia e gwauraimu. 12 Bona e peritomedia to peritome asie abidadama heniamu, edia abidadama na seneda Abraham ena abidadama, do se peritomea negana ai, e tohotohoamu taudia: ia na idia tamadia danu.

13 Gwauhamata na Abraham e henia, ia garana ida tanobada idounai bae abia; taravatu dainai se henia, to ena abidadama amo e varava karamaoromaorodia daidiai e henia. 14 Badina be taravatu ibadinana taudia na dihi ai bema halaodia, abidadama taudia edia abidadama bema asi anina, gwauhamata danu asi anina. 15 Taravatu ese badu e havaraiamu; badina be taravatu bema lasi, itata-utuna danu bema lasi. 16 Benaini, abidadama dainai e abiamu, harihari ḡauna na heto; dia taravatu ibadinana taudia mo, a Abraham ena abidadama e tohotohoamu taudia iboudiai danu. Ia na ita iboudai tamada; 17 buka ai e torea heḡereḡerena eto, Bese loḡora tamadia ai baina halaomu.

Mase taudia e hamauridiamu bona do asie vara ḡaudia e havaradiamu Diravana na Abraham ese e abidadama henia.
18 Ena helaro na e kara asi badina na heto, to abidadama dainai e helarova; taunabunai ia na bese loḡora tamadia ai ela, gwauhamata herevana heḡereḡerena eto, Garamu na unu bae hoho toma. 19 Ena abidadama na se manokava. Ena be tau-anina e haeroava mase tauna na heto (laḡanina na sinahu-ta sisivana) bona Sara danu mase hahinena na heto, 20 to Dirava ena gwauhamata e laloa taova, bona e abidadama henia tutuka-tutukava, bona e heatolaiava; 21 badina be dibana ena gwauhamata baine hamomokania. 22 Una dainai maorona e gwauraia.

23 Dia ia mo sibona herevana unu se torea toma; 24 a ita danu, Iesu, eda Lohiabada, mase amo e hatorea isi Diravana ta abidadama heniamu tauda, maoroda e gwaurai. 25 Ia taona e torea, iseda kara dika daidiai; ma mase amo e tore isi, maoroda baine gwaurai helaoreana.

Copyright information for `MEU