Zechariah 2

Peroveta launa ena mata-hanai ihatoina

Bena na gaga isi, tau ta na itaia, mai ena hahetoho varona imana ai. Bena na nanadaia, nato, Ede bo laomu? Ia ese e haere henigu, eto, Ierusalem ihahetohona totona na laomu, baina itaia ena lababa na ede badana bona ena lata na ede badana. Bena lau ida a hereva-hereva aneruna na itaia, ia na e raka lasi, bona aneru ma ta e raka kahi mai, ia ihedavari-henina totona, e hamaoroa, eto, A heau, una eregabe tauna ba hamaoroa, baoto “Ierusalem bae noholaia, asi maḡudia hanuadia e noholaidiamu na heto, badina be taunimanima bona boromakau bae momo ia lalonai. Badina be lahi maḡuna heḡereḡerena ai bainala, heḡeḡemadai gabudia iboudiai, bona hairai ai bainala ia lalonai. Iehova na e herevamu.”

Dauhai e hanohodia taudia iboiridia

Iehova na e tomu, He, he, mirigini kahana tanona ba heautania; badina be lau ese vada na hakarohomui rohoroho, guba laidia haniosi na heheto. Iehova na e herevamu. He, Babulono natuna hahinena ida o nohomu taumu, a roho mauri, Siona a heau lao. Badina be Iehova Sabaota ini e gwau toma, ia hairaina ese e dadimui besedia dekediai e siaigu murinai, badina be umui e daumui tohomu tauna ese ia matana nadinadina e daua tohomu; ia eto: A itaia, lau ese imagu baina davedavea idia daediai, bena edia hesiai taudia ese bae dadidia. Bena ba diba Iehova Sabaota ese vada e siaigu. 10 Siona natuna hahinena e, ane avabia, a moale; badina be, a itaia, lau na vasimu, umui bogaragimui ai baina noho. Iehova na e herevamu. 11 Una dina ai bese momo na Iehova enai bae tao, egu bese ai baela; bena lau ese umui bogaragimui ai baina noho, bona umui na ba diba Iehova Sabaota ese vada e siaigu vasi. 12 Bena Iehova ese Iuda baine abia, ia ahuna ai baine halaoa, tano helaḡana lalonai; bona Ierusalem ma baine abia hidi lou.

13 Taunimanima iboumui ai, asi reḡereḡemui ba noho, Iehova vairanai; badina be ia na vada e tore isi, ena noho gabuna helaḡana amo vada e raka lasi.

Copyright information for `MEU