Zephaniah 2

Bese idau-idau ihabua-taridia

Asi hemarai dibana besena e!
A hegogo, emui hebou ta bavabia,
do basie odamui oho
lai ese uit momona e odaia ohomu na heto
bona Iehova ena badu ḡaraḡarana na
latamui ai do basine diho negana ai,
Iehova ena badu dinana na
emui ai do basine kau negana ai.
Umui tano taumui mai manaumui ida,
ena haheḡani o badinadiamu taumui,
Iehova ba tahua!
Kara maoromaoro ba tahua, Ialo-manau ba tahua;
bena reana ba hehuni diba, Iehova ena badu dinana ai.
Badina be Gasa baine ḡaḡae,
bona Askelono baine vahu;
Asdod taudia na dina tubua ai bae luludia lasi,
bona Ekron baine heraḡa oho.

Kone taumui e, Kerete besena e,
madi, ihabaimui!
Kanaan e, Filistia tanona e,
Iehova ena hereva na latamu ai;
lau ese do baina habuamu tari,
ela bona inoholaimu tauna ta basine noho.
Oi danu, kone tanona e,
rei gabudia ai do ba hahelao:
mamoe ireḡudia taudia edia rei gabudia,
bona mamoe seridia edia maḡu.
Kone tanona na Iuda besena kwabukwabudia ese bae ḡaunaia,
unuseni ai edia mamoe bae ubudia.
Hanuaboi bae hekure,
Askelono rumadia ai.
Badina be Iehova, edia Dirava, ese baine lalodia,
bona baine hanamodia lou.

Moab taudia edia hegonaḡonalai
bona Amono taudia edia heihi-ihirai
vada na kamonai.
Idia ese egu bese taudia vada e gonagonalaidia,
bona edia tano iabi-ohona vada e herevalaia mai hekokorokudia ida.
Iehova Sabaota, Israel Diravana, na e tomu:
Taunabunai, lau na maurimu heḡereḡerena
Moab na Sodoma heḡereḡerena ai bainela,
bona Amono taudia na Gomora heḡereḡerena ai bae hahelao,
ava ḡiniḡini bona laguta tanodia ai baela,
bae vahu ela bona hanaihanai.
Egu orea taudia kwabukwabudia ese bae dadihaidia;
egu bese taudia kwabukwabudia ese bae ḡaunaidia.
10 Ahudia unu bae heto, edia hekokoroku davana;
badina be idia ese Iehova Sabaota ena orea taudia na
e kirikirilaidiava bona latadiai e heaḡiva.
11 Iehova ese baine daḡedaḡe henidia;
oibe, ia ese tanobada diravadia iboudiai baine hahitolodia;
bena bese idau-idau edia basileia iboudiai ese
ia bae toma henia diho,
ta ta ena gabu ena gabu ai.

12 Etiopia taumui e, umui danu;
egu dare ese baine alamui mamase.

13 Bena ia ese imana na mirigini kahana baine toi roro henia,
Asuria baine habuaia tari;
Nineve danu baine havahua,
gabu kaukauna ai baine halaoa, tano ḡaḡaena na heto.
14 Nani seridia na ia bogaraginai bae hekure,
bona uda boromadia idau-idau iboudiai danu;
bogibada bona migu na
ena au-tubua lalodiai bae noho;
baimumu na ena gaba-mauru ai baine mu,
bona mukou danu ena raka-vareaina ai;
badina be ena sida audia igovalaidia bae hekoki oho.
15 Hekokoroku hanuana binai,
e nohova mai namona ida;
sibona e tomava
“Lau o ina, idauna ta na lasi”.
Madi, vada e vahu vaitani,
uda boromadia edia gabu ai vada e hahelao.
E rakaia hanaimu taudia iboudiai ese
e si heniamu bona imadia e kahu kuboro-kuboro heniamu.
Copyright information for `MEU