1 Corinthians 10

I maa uru-urufap, oko i pina onami wakiyen

Aria i nembesir awona sira wiar kema suuwap kema-ko aaweka. Feenap, wi Isrel iiriw Isip piipuamik nain Mua Maneka-ke maa ipisia wia wuomaya wi unow onaiya tepak irap ikiwem-ikemik. Ne wi ikiwemi ifer maneka puukap kame okaiwi ekamik nain pun naap, ifera nain onaiw pukep oko-okaiwi erap saa imenareya okaiwi ekurumemik. Wi maa ipisia tepak-pa ikiwemik ne ifer maneka nain wueliwa kame okaiwi ekamik. Naap onami wia yasuwowa saarik aremi Moses teeria wiar aremik. Ne maa enowa maana naimik nain Mua Maneka-ke wia sesekomaya miiwa-pa oraeya kapunumep aawep enem-ikemik. Ne eka naiwkin nomon maneka-ke pukeya eka oraeya enemik. Naap wia asipam-ikua. Wi unowiya eka nain enemik. Nomon maneka nain Krais ifarimok. Ona wiamiya ikiwem-ikok wia asipam-ikua. Makena Mua Maneka baliwep wia urufam-ikua, nain wiena-ke sira-sira onam-ikaiwkin unowa naap wia urufap me wia kookalek. Naapeya epa asia saa manekiw-pa ikiwem-ikok umem-ikemik. Umiwkin momor wiisa wia soop-ikim-ikemik. Naeya miiwa wia wuomak nain wi ikip me fuunemik.

Aria wi naap arem-ikemik nain wiar furewap ifan tiira puikua. Wis-na sira samo-samora onowa kookal-afuram-ikemik. Ne i naap me onikua, i sira samo-samora onowa kema momor me suuwikua. Wi fain onamik, wi mua miira sirarep yiena inasina-ke naep sira-sira onami wiokam-ikemik. Wi naap onamik nain Mua Maneka opora-pa feenap wiar siisimep-puamik, “Mua Maneka teeria-na inasina wia naemi sira-sira onami pokap maa enemi eka kekanowa enemik, wi naap onami someka awemi ufemi sira samo-samora onamik,” naap wia maek. Naapeya nis pun naap onam-ikok-na iiwawun piipueka. Wi naap onami enum erua sira oniwkin Mua Maneka-ke iir kuisow nainiw wi unowa akena, 23,000 naap wia ifakimok. Naapeya is pun enum eruarowa sira nain me onikua. Ne yiena Maneka me akimikua, oko naap onami wi Isrel saarik samor aawiyen. Feenap, wi enowa oko oko maalemi Mua Maneka aakunowiwkin kema bagiwirap ifa samora unowa sesekeya wia kueya umem-ikemik. 10 Ne wi woos mua opora-pa me wia aakunoweka, oko naap onami wi Isrel saarik arowen. Wi iiriw wiena woos mua wia aakunowam-ikaiwkin Mua Maneka-ke umowa wia suuweya umem-ikemik.

11 Mua Maneka-ke ni urufap sira amisareka naep naap wia onak. Ne wi naap arem-ikemik nain mua papako kema aawuk naep opora nain siisimemik. Naapeya i aakisa miiwa weeserow epa-pa ikemik fain sira nain wiar kema suuwap kema aawowa-ke. 12 Ne naapeya ni maa urufap, oko nis pun i pina marew ikemik naap maep wakiowen. 13 Nain ni pina onowa kema niar urupiya nain i iiwawun maneka pun naap, kema yiar urupiya. Ne Mua Maneka nia asipowa naek nain nia kekanoweya kekanep ikok pina me onowen. Feenap, ni pina-ke nia akimam-ikaeya os-ke nia kekanowami era nia wuomaya pina me onowa nain niam paayap ikowen.

Wi inasina patirimik nain wiamiya me arowa-ke

14 Aria naapeya emar unowik, wi inasina ookimik sira nain me wiar ookeka, iiwawun mikikira iweka. 15 Ni mua kema pukowa-ke, naeya feenap nia maakinen. Yo maiyem fain makena-ki e weetak, nain ni niena kema suuweka. 16 Aria i lotu-pa yiam fiirimep ikok wain eka urupa kuisow nan Mua Maneka sira eliwa naakemi enimimik. Enemi maimik, “Krais i muuta nain umemi ona aka sawikak.” Aria i naap onap teeria kuisow me arimik-i? Ne emer ikowa pun naap, aawep wu-wuepap kakawa kui-kuisow enemi maimik, “Yeesus Krais i muuta nain umok.” Naap onami i unowiya teeria kuisow aremi Krais mia ara me arimik-i? 17 Moram emera kuisow muuta, nain i mua unowiya kaka-kakawa enimimik. Naap onami i iiwawun Yeesus wiarik teeria kuisow aremik.

18 Neemi wi Isrel Mua Maneka patirowa onimik nain pun wiar kema suuweka. Wi maa eneka aawep pikiwep nomon esimsa-pa wuap patirami kuumimik. Mua Maneka patirami kiowa papako me kuumimik nain wiena enimimik. Enep-puap wi Mua Maneka teeria kuisow me wiar arimik-i? 19 Aria wi mua miira wia patirimik. Naeya mua miira nain maa makena-ke, yo naap maem-i? Ne maa eneka eena wuap mua miira patirimik nain maa enowa sira oko-ke, yo naap-ko maem-i? 20 Weetak, yo naap-ko me maem. Yo fain maiyem, wi maa eneka wuap mua miira patirami maimik, “I yiena inasina patirimik,” naap maimik. Nain wi me Mua Maneka kema suuwimik. Weetak, wi sawur wia patirimik. Naapeya wi maa enowa sira-sira naap nain wiamiya me areka. Oko wi teeria nain wiar arowen. 21 Ne sira feenap-ko ikua-i? No Yeesus teeria wiar ekap kiiriw kirep wi sawur teeria wiar arinan-i? Ne yiena Maneka wain eka wiar enep kiiriw wi sawur wia patirimik eka nain pun eliw wiar eniminan-i? Ne emer ikowa wiar enep maa enowa eena wi sawur wia patirimik nain pun wiar eniminan-i? Weetak akena, i naap oniyen me naeka. 22 Oko i naap onami yiena Maneka kema bagiaw irowawiyen. Ne o sira yia ofakowami yia samorinon. Ne i kekanowa eliw wiar nomakiyen-i?

Mua Maneka waisow unum maneka aawinok naep maa onimik

23 Mua papako-ke maimik, “Maa unowa eliw manekiw.” Makena maimik, nain maa papako manek akena me yia asipiya. Ne pun maimik, “I maa unowa eliw oniyen.” Makena maimik, nain me maa unow maneka nain-ke yia kekanoweya Mua Maneka baliwep amisarep sira wiar ookiyen. 24 Ni maa muutitik onami niena muutiw me niam kema suuweka. Feenap maowa-ke eliwa, “Yo kamenap onap mua wia asipamkun wueliwa ikaikuan.”

25 Feenap, wi maa eneka kiowa fofa-pa sesekimik nain urufap kema erup erup me areka, me maeka, “Enowa fain mua miira patiramik-i e weetak?” Oram wiar sesenarep-pueka. 26 Moram Mua Maneka opora feenap maek, “Miiwa ne maa mutumut ikomakek nain Mua Maneka-ke onak,” naap maek.

27 Aria sisin mua-ko enowa nia fariwkin niena kookalep-na eliw wiar ikiweka. Ne maa mauwa nienakiwkin wia nokarep me enimeka, momor wiar enimeka. 28 Ne aria mua-ko naap nia maakinok-na, “Maa fain mua miira patiramik nain-ke.” Naap nia maakinok-na me enimeka. Mua nain ona kema-ke naap wiar imenareya naap nia maakek. Naeya o kema suuwap me enimeka. 29 Yo nia maakem nain mua nain kema suuwap maem, me ni kema kamenap ikeman nain maem, weetak. Moram no nena kema maa nain eliw eniminen, naap name maep-na aria mua oko kema me wiar ookinan. Nain no mua oko nain ekima opap maa eliw fariarinan. 30 Feenap, yo Mua Maneka kema suuwap sira eliwa naakep-puap maa enimiyem, nain moram mua oko-ke efa tuuninon? Moram yo maa enowa naep Mua Maneka sira eliwa naakep enem.

31 Ne naapeya feenap maiyem, maa enowa ne eka, ne maa papako onu naep maeka, “Mua Maneka waisow unum maneka aawinok.” Naapeya mua papako sira niar urufap Mua Maneka unuma pirikuan. 32 Ne maa kema suuwap oneka. Naeya mua oko sira niar urufap me wakikuan, wi fain: wi Yuuda, wi Grik ne Mua Maneka teeria. 33 Ni yo yookeka. Wi mua papako kema wia opami sira unowa oniyem. Yo yena yame kema suuwap me oniyem, weetak. Ne wi mua kamenap onap wia asipinen naep naap oniyem. Feenap, yo Yeesus opora wia maakemkun wi pina piipuap opora wiar opap o teeria wiar oruk naep naap oniyem.

Copyright information for `MHL