1 Corinthians 11

Lotu-pa ikiwosa wakesimowa sira

Aria Krais sira onam-ikua nain yo naap oniyem. Ne nis pun yo sira yookami naap onam-ikeka.

Aria yo maa unowa iiriw nia maakem nain ni kema ikeman. Ne Krais ookowa sira-sira wi yiomakemik nain iiriw nia maakem nain pun baliwep ookam-ikaiman. Naapeya ni sira eliwa nia naiyem. Aria ni mokomokoka fain amisarep kema-ko aaweka. Feenap, Krais Mua Maneka tepak-pa wiar ikaiya. Ne wi mua eena Krais ookimik nain o tepak-pa wiar ikaimik. Ne wi emeria wiena mua tepak-pa wiar ikaimik. Naapeya ni fiirimowa-pa mua oko-ko iikirap Mua Maneka farekam naep ikiwosa konimiw me wame wakesiminok. E, Mua Maneka-ke kema iweya opora wia maakekam naep-na nain pun naap me oninok. Krais ona woos mua-ke. O wame wakesiminon-na nain Krais ekima me opowa saarik arinon. Ne wi emeria-ke lotu-pa Mua Maneka faru naep-na ikiwosa konimiw wiam wakesimuk. Ne Mua Maneka kema wieya opora wia maaku naep-na, nain pun naap onuk. Wi naap me onikuan-na wiena mua emina wia ururowikuan. Moram papako-ke urufap maikuan, “Emeria faa, wi emeria eena soma oraiwkin fia wia kaisomimik, wi nain saarik.” Naapeya maiyem, emeria ikiwosa me wakesiminon-na ona wame emina ururowinon. Naapeya afif fuula maala nain puukiwkin iiwa ikainok. Nain emeria afif iiwa ne emeria woos buburia ikowa nain maa emin ururowa-ke. Naapeya yo maiyem, wi emeria ikiwosa wiam wakesimuk.

Aria onoma oko feenap, i mua Mua Maneka-ke ona saarik yia uuwak. Naeya i Mua Maneka unuma pirami o kekanowa akena naem-ikowa-ke. Naapeya i mua ikiwosa me yiam wakesimikua. Ne wi emeria sira eliwa-pa ikok wiena mua unuma wiar pirikuan. Naapeya wi emeria ikiwosa wiam wakesimowa-ke. Moram Mua Maneka mua uuwekam naep me emeria mia wiar aawep uuwak, weetak. Makena, emeria uuwekam naep mua mia wiar aawep emeria uuwak. Ne pun mua emeria ikos ikauk naep emeria uuwak, me emeria naep mua uuwak, weetak. 10 Ne aria ona sira naap wueya wi emeria-ke wiena mua tepak-pa wiar ikauk naep ikiwosa konimiw wiam wakesimowa-ke.
11.10Opor ara fain Grik opora-pa ikua nain kemena baliwep me amisaremik. Amis mua papako maimik, opora nain kemena feenap, wi emeria lotu-pa Mua Maneka opor kokosa aakunu naep-na wiena ikiwosa konimiw wakesimuk.
Wi naap onikuan-na wi ensel-ke sira wiar urufap sira eliwa wia maikuan.
11 Nain ni feenap amisareka, Mua Maneka-ke emeria mua yia uuwami epaskun ikok wiam asipam-ikauk naek. 12 Moram mua mia wiar aawep emeria uuwak. Makena, nain i mua pun wi emeria uroma-pa wiar imenarimik. Mua Maneka ona sira naap wueya i naap ikemik.

13 Ne ni fain kema suuweka. Feenap, wi emeria-ke lotu-pa Mua Maneka faremi me wiam wakesimimik nain eliw marew, nain makena maiyem-i e wia? 14 Aria sira naap ikua, wi mua eena emeria saarik afif fuula maala wuimik nain maa emin ururowa-ke. 15 Ne wi emeria afif fuula maala onaiya ikaimik nain wiar urufap maimik, sira eliwa, wiena emeria afif maala naap wuimik nain aniriya, naap maimik. Moram Mua Maneka-ke afifa-ke woosa wiar wakesiminok naep naap wiar wuak. 16 Ne aria yo opora maem nain emeria-ko opora efar fieninon-na o feenap mainen. I teeria wi emeria ikiwosa wiam wakesimowa marew lotu-ko me kererimik, weetak akena. Ne Mua Maneka teeria owow-owowa-pa ikemik nain, wis pun sira naap-ko me onimik.

Pol wi fiirimowa-pa enowa sira momor oniwkin wia maek

17 Aria ni fiirimowa-pa sira kamenap onowa nain mainen. Ni feenap oniman, niam fiirimiman nain ni niam asipowa nain me niam asipiman, weetak. Ni sira-sira onami iiwawun samorareman. Sira eliwa me oniman, yo eliwa me nia naiyem. 18 Feenap maiwkin niar miimam, ni niam fiirimiman nain opora niam fienami niam fo-fookiman. Naap nia maemik nain makena-yon. 19 Aa eliw, ni naap niam fo-fookam-ikeka, ikoka sira niar mekawap nia amisarikuan, ni mua kain-ke Yeesus Krais sira baliwep ookiman. 20 Ne ni eena yiena Maneka iiriw ona teeria wiamiya maa enemik nain, nis pun nain ookami niam fiirimep maa enimiman. Nain ni me yiena Maneka sira wuak nain kema suuwap naap oniman, weetak. 21 Ni maa enowa pikiwep fiirimow epa-pa mua papako niam arewap bilik pokap maa enowa-ke. Nain ni naap me oniman. Ni niisow maa enep-puiman. Naeya ni mua papako enowa opap me ikiwiman nain wuailiman, ne papako niena enowa ne wain eka onaiya ikiwiman nain eka enep momorariman. 22 Ni faa, ni niena koora marew-i? Naeya ni ikiwep fiirimowa epa-pa maa enemi eka enimiman. Ni naap onami Mua Maneka teeria mua oorpowa wia arowiman ne mua papako oram ikaimik nain ni sira naap oniwkin emina ururimik. Naapeya yo kamenap nia mainen? Yo sira eliwa onaman nia nainen-i? Weetak akena.

Yeesus Krais emer ikowa ne wain eka wienakek sira nain

(Matiu 26.26-29, Mak 14.22-25, Luk 22.14-20)

23 Iiriw yiena Maneka Yeesus maa enowa onak nain ni ookami baliwep onam-ikeka. Moram ona efa ofakoweya iiriw baliwep nia maakem. Feenap, o wi iiwua wapena-pa wiar wuamik iir nain uura ona teeria wia fiirimep maa enemik. Maa enemi emer kekanowa aawep Mua Maneka sira eliwa naakep-puap wu-wuepap wienakemi wia maakek, “Emera fain yena mia oposia-ke. Yo ni muuta nain uminen. Fain aawep enimeka. Ne anane naap onam-ikok yo efa kema suuwam-ikeka,” naap wia maakek. 25 Ne enep weesereya wain eka urupa opap sira naapiw onak. Ne wienakemi wia maakek, “Eka fain kemena-ke naap. Yo umemi aka sawikamkun Mua Maneka pina niar iirarowa opor kekanowa nain wiar kooninon. Opor enuma eena niamiya kaikowa maek nain. Naapeya ni wain eka fain enimeka. Ne anane naap onam-ikok yo efa kema suuwam-ikeka,” naap wia maakek. 26 Naapeya ni anane emer ikowa ne wain eka enowa nain naap oni-ikim-ikaiwkin opora fain meta ariminon, yiena Maneka umok, opora nain naap amisarikuan. Nain iki-ikip iiwawun yiena Maneka miiwa nainiw orow epa-pa.

I kukusa yiam saliwap-puap emer ikowa ne wain eka enimiyen

27 Naapeya ni teeria mua-ko pina me wame kakenowa emer ikowa ne wain eka nain oram eniminon-na pina oninon. Naap onami yiena Maneka mia ne aka maa oorpowa wiar arowap pina aawinon. 28 Feenap oninon-na eliw. O kiikir ona sira samora wame kema suuwap kukusa wame saliwap-puap eliw eniminon. 29 Moram emer ikowa ne wain eka enemi Yeesus Krais mia me kema suuwap mainon-na, “Aa Yeesus i pina muuta nain umok,” naap me mainon-na Mua Maneka-ke pina iwinon. 30 Naapeya naneka, ni teeria fain mua unowa napumarep lagota urupep ikeman, ne papako umomakeman. 31 Ne i pina naap onimik nain kiiriw kema kiriyen-na Mua Maneka sirirowa me yiinon. 32 Makena, Mua Maneka sirirowa yiiya nain ni sira amisarep baliwep ikeka naep naap yia oniya. Naeya i baliwep ikaiyen-na wiimar wi mua opora me wiar opimik nain epa mukun yoowa neeke wia sesekinon, ne i wia.

33 Naapeya nia maakiyem, ni fiirimowa-pa niam aawep ikok niam arewap maa enimeka. 34 Ne mua-ko wuailowa naep ona koora-pa maa enep-puap fiirimowa kererinok. Naeya fiirimow epa-pa momor me onowen, ne ikoka Mua Maneka sirirowa me wiar urufowen. Aria lotu opor papako aakisa me senam nia maakiyem, iir oko yena niar ikiwep-na baliwep nia maakinen.

Copyright information for `MHL