1 Corinthians 12

Ewar Eliwa amisa yiemi uuwowa ononer yiiya

Aria emar unowik, ni Ewar Eliwa amisa yiemi uuwowa yiiya nain baliwep amisareka naep feenap maiyem. Ni niam amisareman, ni iiriw Mua Maneka teeria me wiar ekowa ikeman nain, wi sawur-ke kema niiwkin mua miira sirarep inasina-ke naemi sira-sira onam-ikeman. Mua miira eena me aakuniya nain. Ne aakisa ni Mua Maneka teeria wiar ariwkin ni baliwep amisareka naep maiyem, wi mua eena Mua Maneka Ewar Eliwa-ke kema wiiya nain, Yeesus amukaremi feenap-ko me maimik, “Yeesus neek samor aawinok.” Ne pun mua-ko onaiw feenap me mainon, “Yeesus-na yiena Maneka-ke.” Makena, Ewar Eliwa-ke kema iwinon-na naap mainon.

Aria ni aakisa Ewar Eliwa uuwowa amisareka naep nia maakiyem. Ewar Eliwa waisow muuta, nain-ke amisa ononer yieya uuwowa sira-sira amisarep onimik. Ne i teeria uuwowa ononer ikok yiam asipam-ikaimik, nain yiena Maneka Krais waisow yia urufam-ikaeya uuwimik. Makena, uuwowa ononer onimik, nain Mua Maneka ona waisow kekanowa yieya uuwowa baliwep onomakimik. Ne aria Ewar Eliwa-ke mua kui-kuisow amisa yiemi uuwowa ononer yieya uuwowa sira yiam asipam-ikaimik. Ewar Eliwa waisow amisa yiemi uuwowa yiomakek. Feenap, mua oko amisa iweya Mua Maneka amis maneka wiar ikua nain wi mua papako wia ookomiya. Ne mua oko amisa iweya Mua Maneka opor eliwa kemena baliwep wiar amisarep wia fookomiya. Ne mua oko amisa iweya Mua Maneka kekanowa makeniya o farowa kekan-afuriya. Naeya maa mauwa nokariya nain eliw urufinon. Ne mua oko kekanowa iweya wi napum sira-sira wiar saliwiya. 10 Ne mua oko kekanowa iweya maa miililina imeniya. Ne mua oko kema iweya opor kokot ikua nain wia kopomaya makena ariya. Ne mua oko amisa iweya feenap oniya, wi Mua Maneka opora wiar aakunimik nain ne sawur-ke mia wiar ireya aakunimik nain opora baliwep wiar mekawap maiya, “Aa, mua fain makena maiya, oko nain wia,” naap maiya. Ne mua oko amisa iweya opora sira onaiya aakuninon. Ne mua oko amisa iweya mua papako opor sira onaiya eena maimik nain kemena wiar maiya. 11 Aria Ewar Eliwa kuisow nain-ke ona kookalowa-pa i mua kui-kuisow amisa ononer yiomakeya uuwimik.

I unowiya Yeesus Krais mia-ke ikemik

12 Ewar Eliwa uuwowa ononer yiomakek nain maiyem, nain mia ara ononer ikemik. Feenap, mia kuisow, nain mia ara ononer wiena wenup uuwimik. Makena, mia ara ononer nain-ke mia kuisow maneka arowak. Ne i Krais teeria pun naap, o mia saarik, mua unowa, nain teeria-ke kuisow muuta. 13 Moram i teeria maneka kuisow nain i owowa ne sira ononer. Feenap, i mua papako Yuuda-ke, i papako owowa oko-oko-ke, i mua papako sesa marew uuwow yoowa-pa uuwimik, ne i papako yiena kakeniw miiwa-pa maa uuwimik. I naap ikemik, nain Yeesus Krais opora wiar opamkun yia yasuwiwkin Ewar Eliwa-ke teeria kuisow yia arowak. Ne Mua Maneka-ke Ewar Eliwa kuisow nain sesekeya i yiamiya ikaiya.

14 Aria ni fain kema suuweka. Feenap, i mia kuisow, nain ara unowa. 15 Kepura-ke mainon-na, “Yo me wapena-ke, naeya yo me mia okaiwi-ke nainen.” Naap me mainon, moram mia iiwawun epaskun. 16 Ne ifana-ke mainon-na, “Yo me mokoka-ke, naeya yo me mia okaiwi-ke nainen.” Os pun naap me mainon, moram mia iiwawun epaskun. 17 Aria mua-ko mia ara mokok manekiw ikainon-na maa eliw urufinon, nain ifana weetakeya kamenap maa miiminon? Ne mia ara ifana manekiw ikainon-na maa eliw miiminon, nain miikapura weetakeya maa ikina kamenap aawinon?

18 Naap wia, moram Mua Maneka-ke yia uuwami mia ara kui-kuisow kaanek wuowa ne kamenap ikowa nain ona amisarep yia tawerarek. 19 Naapeya i mia ara kuisow mokoka naap nain manekiw yiar ikekak-na i mia aakisa ikemik feenap me ikekamik, ae-na. 20 Naapeya i mia kuisow, nain mia ara-ke sira-sira ikomakek. 21 Ne mokoka-ke wapena iiraremi me maakinon, “No ikiwe, yo yaisow pepek.” Nainiw ikiwosa-ke kepura iiraremi me maakinon, “No ikiwe, yo yaisow pepek.” Naap wiam iirarowa me pepek, unowiya uuwow onaiya ikemik. 22 Moram mia ara muutitik kekanow marew nain, uuwow maneka oniwkin i iiwawun wueliwa ikaimik. 23 Ne mia ara papako urufowa eliw marew naimik nain, baliwep bala opimik. Ne mia ara oko emina ururimik nain baliwep wakesimimik. 24 Aria mia ara papako urufowa eliwa nain me pipilimimik. Mua Maneka ona yia uuwami mia ara pepekiw wuomakeya yia urufowa anirak. Ne mia ara urufowa eliw marewa nain Mua Maneka-ke maa nain maa maneka-ke naep uuwak. 25 Naapeya mia ara unowa nain me wiam iirarikuan, epaskun ikok wiam asipam-ikaikuan. 26 Ne mia ara oko-pa sirirowa furewinan-na mia ara unowa pun iiwawun sirirowa furewinan. Ne mia ara oko baliwep kakaltinan-na mia ara unowa pun wueliwa nefar ikainon.

27 Aria ni unowiya ni teeria kuisow, naeya ni Yeesus Krais mia-ke ikeman. Ne ni mua kui-kuisow o mia ara ononer wiar ikeman. 28 Naapeya Mua Maneka-ke uuwowa ononer niomakek. Feenap, ni mua papako Krais uuwow mua nia wueya ni miimowa-pa ikeman, aposel nia naimik nain. Aria wi wiokap onarowa nain ni profet, ne wi nain ookap onarowa, ni somek mua, Mua Maneka opora wia fookomowa nain. Ne aria ni papako Mua Maneka kekanowa-pa maa miililina oniman, ne papako napum sira-sira wia saliwiman. Ni papako mua wia naapowa sira anane oniman, papako Mua Maneka teeria uuwowa baliwep wiar faiman, ne papako opor sira onaiya aakuniman, ni naap ikeman. 29 Ni unow onaiya uuwowa kuisow-pa ikeman-i? Ni unow onaiya aposel-ki? Ni unow onaiya profet-ki? Ni unow onaiya somek mua-pa ikeman-i? Ni unow onaiya maa miililina imeniman-i? 30 Ni unow onaiya napum sira-sira eliw wia saliwiman-i? Ni unow onaiya opor sira onaiya aakuniman-i? Ne opor sira onaiya aakuniwkin ni unow onaiya kemena wiar imeniman-i? Weetak akena, ni uuwowa ononer niar ikua. 31 Nain ni uuwowa-pa mua oko baliwep wia asipimik nain manek akena kookalep Mua Maneka nokareka.

Aria yo aakisa sira eliwa akena eena sira unowa nomakek nain nia ofakowinen.

Copyright information for `MHL