1 Corinthians 2

Pol Mua Maneka amis kekanowa-pa uuwam-miek

Aria yo iiriw niar ekapem nain Mua Maneka opor makena nain nia maakekam naep ekapem. Ni niamiya ikok maa papako kema me wuam-ikem, Yeesus Krais waisow. O nomokow moke-pa umok nain muutiw nia maakem-ikainen naem. Me yena aakunow eliwa ne yena amis maneka yame ookap nia maakem-ikem, weetak. Naemi yo kekanowa mareweya kema tootonep mia fufuemi uuwam-miem. Yo nia maakemi Yeesus opora nia wafuram-ikomam nain me yena amisa-pa ifana nia afililowawam-ikem, weetak. Ewar Eliwa ona kema nia fookeya kekanowa wiar furewap opora wiar opaman. Naapeya ni opora opiman nain ni mua amis maneka nain me wiar ookeka, Mua Maneka kekanowa-pa opora opam-ikeka, naap nia naep nia maakem-miem.

Amis maneka Mua Maneka-pa wiar ekapok

Aria wi amis mua unowa ne amis maneka-nana is pun yiar ikua, nain iiwawun sira oko. I amisa nain wi mua eena kema pukowa Mua Maneka opora baliwep furewimik nain wia maakimik. I opora maimik nain yiena wenup, me wi miiw fain mua ne saria mane-maneka amisa wiena kema-pa opora imenap aakunimik nain, weetak. Wi teeria nain ikoka Krais-ke ekapemi sisin akena-pa wia wuami ona iimarinon. I Mua Maneka amis maneka nain wiar aakunimik. Nain feenap, iiriw ekera miiwa me onowa ikok i yia naep ona parina-pa yia wuowa era nain ona iiriw maep-puak. Maa nain iiriw kokotimep-puak, ne aakisa fan ariman yia maakemi yia ofakowak. Naapeya i opora nain nia maakem-miawimik. Mua Maneka sira naap onak nain wi miiw saria mane-maneka urufap kema me pukemik. Naap-kekena yiena Maneka nomokow moke-pa me ifakimekamik, eena unum maneka onaiya ikua nain. Nain Mua Maneka opora iiriw feenap wiar siisimiwkin ikua,

“Wi maa mokoka-pa-ko me urufamik, ifana-pa-ko me miimamik, ne wiena kema-pa me imenamik, nain Mua Maneka-ke iiriw wia onap-puomak, wi mua o kookalimik nain wia naep.”
(Aisaiya 64.4)

Ewar Eliwa kema yia fookomaya maa amisaremik

10 Naapeya ona Ewar Eliwa-ke kema yia fookomaya i amisaremik. Nain makena, moram Ewar Eliwa-ke maa mutumut baliwep mokakiya. Naeya Mua Maneka kema tepak akena pun wiar amisarek. 11 I miiw mua-ke mua oko kema wiar amisarowa me pepek. Makena, mua nain ona kukusa-ke eliw kema wame amisarinon. Ne sira naapiw, i mua-ko Mua Maneka kema me wiar amisaremik, weetak. Makena, ona Ewar Eliwa-ke o kema wiar amisarek. 12 Ne aria Mua Maneka sira onomakek nain i miiw mua yiena kema suuwowa-pa wiar amisarowa me pepek, weetak. Makena, Mua Maneka-ke ona Ewar Eliwa sesekeya yiamiya ikok kema yia fookeya i wiar amisaremik. Ona kookalep amis eliwa unowa oram yiomakek nain. 13 Naapeya i opora nia maakimik nain me wi miiw mua wiena amis maneka-pa opora maimik nain nia maakimik, weetak. Mua Maneka Ewar Eliwa opor makena yiomakemi sira kamenap yia ofakowak nain ookami nia maakimik. 14 Aria wi mua Ewar Eliwa me wiar ikua wi nain-ke o maa yia maakiya nain momor opora-ke wiar naimik. Naeya wiar miimowa miatinimik. Ne Ewar Eliwa ona waisow wi mua kema baliwep wia fookeya maa kemena eliw amisarikuan. Naapeya wi nain o opor kemena kema wuepowa me pepek. 15 Ne wi mua Ewar Eliwa onaiya ikemik nain-ke maa mutumut kema pukep aakunimik. Naapeya mua oko-ke wi sira wiar urufap maimik, “I wia maowa me pepek.” 16 Nain Mua Maneka opora ara oko feenap maek,

“Mua kuisow-ko yiena Maneka kema me wiar amisarek. Ne o uuwowa sira-sira pun maakowa me pepek, weetak.”
(Aisaiya 40.13)

Nain is-ke makena, Ewar Eliwa yiamiya ikaeya Krais kema saarik ikemik.

Copyright information for `MHL