1 Corinthians 3

Wi uuwow mua unowiya Mua Maneka uuwomimik

Emar unowik, makena maiyem, mokomokoka niar ikiwep Mua Maneka opora nia maakem-ikem nain ni Ewar Eliwa onaiya ikowa saarik-ko me nia urufam. Ni niena mia kookalowa ookam-ikeman. Ni Krais teeria wiar ekaman nain ni muuk gia saarik ikeman. Naap nia urufap yo opora nia maakem-ikem nain muuk gia saarik enek muuna me tooniwkin opora ara-arimaniw nia maakem, ni meseka nienakowa saarik onam. Maa enowa kekanowa saarik nain me nienakem-ikem. Nain feenap, opora tepak me nia maakem-ikem. Moram ni maa kekanowa aawowa me pepek pun yo naap nia onam-ikem. Ne aakisa pun ni sira naapiw ikeman. Ni niena mia kookalowa-pa ikeman. Naeya niam irewami opora niam fi-fienam-ikaiman. Ni mia kookalowa-pa soomarem-miawiman, naap me oniman-i? Ni sira feenap oniman nain nia maiyem. Ni niam fo-fookap mua oko-ke maiya, “Yo Pol teeria-ke,” ne oko-ke maiya, “Yo Apolos teeria-ke,” naap maiman. Ni niena miiw sira ookowa kookalep naap oniman, ae-na.

Aria Apolos mua kamenap-ke ne yo Pol mua kamenap nain-ke, naeya i unuma-pa niam fo-fookam-ikeman? I yiam erup uuwow mua oram-ke ikemik. Mua Maneka-ke uuwowa ononer yia sesekeya opora nia maakem-miawemik. Naeya ni Yeesus Krais opora wiar opap ikeman. Feenap saarik, yos-ke uuwowa onoma wuami maa upowa upemkun Apolos-ke kakaltam-ikua. Nain Mua Maneka-ke arimowak. Naeya yo maa upowa upiyem nain ne o manina kakaltiya nain, i yiam erup mua oram-ke. Ne Mua Maneka maa enowa arimowiya nain, makena, maa maneka-ke. Yo maa upowa upiyem nain, ne o manina kakaltiya nain, i yiam erup uuwowa ononer, nain yiena kema-ke epaskun maneka. I uuwowa ononer onimik nain ikoka Mua Maneka ona pepekiw yia kakeninon. Moram maa muutitik onoma Mua Maneka ona. I Apolos ikos Mua Maneka uuwow mua-ke. Ne ni Mua Maneka manina-ke ikeman.

Wi uuwow mua koora kuow mua saarik

Ne oko pun feenap, ni Mua Maneka koora saarik ikeman.
10 Koora nain Mua Maneka ona efa sesekami efa asipeya kuowa onoma wuam. Yo koora kuow mua eliwa-ke, naeya poka ele-eliwa iimarowam. Ne mua papako-ke koor makena kuam-ikaimik. Naapeya ni mua kui-kuisow baliwep kema suuwap koora kuowa-ke. 11 Koor poka-na iiriw iimarowap-puam, nain Yeesus Krais naneka. Poka nain iirarep oko wuowa-ko me ikua, weetak. 12 Feenap, poka iiriw iimarowap-puam neeke koora kuaikuan. No koor maakara kekanowa ne ele-eliwa wuami kuasura baliwep akena wuepinan-i, e maakara samo-samora wuami kuasura eliw marewa wuepinan-i. No uuwan nain ikoka baliwep nefar ilenarinon. 13 Moram Yeesus ekapiya fofa neeke mua kui-kuisow uuwowa wiar mekawami ariman wiar wuinon. Uuwowa manek akena wiar akiminon, kekanep wiar ikua-i e wia. 14 Mua eena uuwowa wiar akimeya me samorarinon nain, eliw wiar ikainon-na ikoka mua nain maa eliwiw kakeninon. 15 Aria mua oko uuwowa wiar akimeya wiar samorareya-na o Krais wiarik maa eliwa wiar aawowa oboserinon. Mua makena, eliw ikainon, ona uuwowa-ke iiwawun wiar awinon.

Yeesus teeria unowiya Mua Maneka tempel koora saarik

16 Ni unowiya Mua Maneka tempel koora saarik ikeman. Ne ona Ewar Eliwa ni niamiya ikua. Ni nain-ko amisareman-i? 17 Ni niam fo-fookowen-na Mua Maneka tempel koora wiar samorowen. Ne mua eena tempel koora samoriya nain Mua Maneka-ke samorinon.

Unuma me wiam piruk

18 Aria me niam momorami “I amis maneka aawemik,” naap me maeka. Feenap, mua-ko mainok-na, “Yo yaisow miiwa fain amis maneka efar ikua,” o naap maep-na wame poromi amis marewa saarik ikainok. Naap oninon-na pepek, o kema pukok, ne ikoka amis maken akena aawinon. 19 Moram wi mua i amis maneka-ke wiam maimik nain Mua Maneka-ke wi nain momora-ke wia naiya. Naemi ona opora pun feenap siisimep-puiwkin ikua,

“Wi mua wiena amisa-pa sira-sira onimik nain Mua Maneka-ke wiena amisa neeke wia kokor erowawiya,”
(Yop 5.13)

naap maek.
20 Naeya opor oko pun feenap siisimep-puamik,

“Mua Maneka wi amis mua kema wiar amisarep wiena amisa nain maa oram-ke wiar naiya.”
(Someka 94.11)

21 Naapeya wi mua sira-sira onimik nain wiar maemi unuma wia purupowa nain neek ikainok. Moram maa ele-eliwa unowa Mua Maneka-ke ni wapena-pa niar wuomakek. 22 Ne miiw maa unowa niena urufam-ikowen. Naapeya yo Pol, Apolos ne Pita, i oram nia asipam-ikaimik nain-ke. Ne ni Mua Maneka wameiya ikok umep iikirap anane ikowen. Ne miiw maa unowa ne wiimar maa ele-eliwa imenariya nain nis-ke urufam-ikowen. 23 Aria ni Krais tepak-pa wiar ikeman ne Krais Mua Maneka tepak-pa wiar ikua.

Copyright information for `MHL