1 Corinthians 4

Mua Maneka ona uuwow mua uuwowa wiar mekawinon

Ni feenap yia maowen-na eliw, Krais-ke wia sesekeya ona uuwow mua aremik. Mua Maneka ona kema suuwowa ele-eliwa pipilimep-puak nain wi wapena-pa wiar wueya uuwimik, naap yia maekaman. Naapeya i uuwowa yiiwkin baliwep uuwowa-ke ikua. Nain yo uuwowa nis-ke efar mekawowen-i, e wi mua papako-ke fiirimowa wuap efar mekawikuan-na yo me senam kema suuwiyem, nain oram-ke naiyem. Ne yo yena pun uuwowa me yame pupiyem. Yo yena yame furewiyem nain yo maa kuisow-ko me samoram. Nain naap me yame mainen, yo mua kaken eliwa-ke, pina marew. Weetak, naap me yame mainen. Ikoka yiena Maneka Yeesus Krais-ke ona uuwowa efar mekawap mainok. Naapeya nia maakiyem, ni maa ewur me mekawap uuwuneka. Ikoka ona epa pepek ereya yiena Maneka ona ekapemi maa unowa pupep mekawap mainok. Os-ke maa pipilalep ikua nain epa maneka-pa wuami i mua kema kamenap ikemik nain pun iiwawun ariman yiar wuinon. Neemi Mua Maneka i mua kui-kuisow sira kamenap ikemik nain yiar pupep urufap mainon, “No eliwa, ne no wia.”

Wi Korin unuma wiam piriwkin wia maek

Naapeya emar unowik, ni fain amisareka naep i Apolos ikos yiam maemi maiyem. I uuwimik nain nis-ke yiar urufap Mua Maneka opora fain paayarep ookowen, “Mua Maneka opora iiriw siisimep-puamik nain muutiw ookeka, opora oko me ane-wafurami maeka.” Neeke mua oko unuma wiar pirami mua oko unuma me wiar porowen, ni naap me onowen. Mua-ko nia pepekimiwkin uuwowa wiar pupep wia mekawiman-i? Ni amis ele-eliwa niar ikomakek nain me niena kekanowa-pa aaweman, weetak. Mua Maneka-ke nieya ni pepek ikeman. Nain moram naep nieniw amis maneka aawowa saarik unuma niam piriman? Aa ni iiwawun pepek-yon aa, ne ni maa kerew akena niar ikua-yon aa. Niisow owow saria mane-maneka areman-yon aa, ne i weetak. Naeya sira naap onaman. Aria saria mane-maneka arekaman-na eliw. Naeya is pun ni saarik owow saria arekamik. Yo fain naep maem. I feenap saarik, Mua Maneka-ke wi mua wia aawok nain teeria maala wia wui-ikiwemi kapa akena i aposel yia wuak. Naeya wi mua unowa mokok epa-pa yia ifakimikuan. Neemi wi mua ne wi ensel wi unowiya yia urufam-ikaiwkin samor aawimik. 10 I Krais muuta nain mua momora-ke yia naimik. Aria nis, ni Krais teeria wiar ekap mua kema pukowa ikeman-yon aa. Is-na kekanowa marew, ni mua kekanowa-ke-yon aa, ne i mua oram-ke, ni mua unumiya ikeman-yon aa. 11 Aria i naap urom irikaka aawem-miemik, kema enekarem-miemik, konima perenowa ainem-miemik. Ifan epepiria yia aawemik ne i purer mua puukap inem-miemik ne aakisa pun naap ikemik. 12 I yiena kekanep wapena-pa uuwap maamuma imenap maa enowa sesenarimik. Makena, wi mua-ke yia samo-samorimik, nain is-ke Mua Maneka wia saliwinok naep nokarimik. Ne enankowa yia erowawimik nain i kekelka ikaimik. 13 Opor sira-sira yia maimik nain is-ke sira eliwa-pa wia pikiwimik. I anane epa fonowa saarik naap yia onam-ikemik, maa susupunuma urupowa saarik yia onam-ikemik nain ekapep ekapep aakisa.

Ni sira efar ookeka wia maakek

14 Yo me emina nia ururowami opor unowa fain siisimiyem, weetak. Iiriw Yeesus Krais opor eliwa yena nia maakemkun ni opora wiar opaman. Naapeya ni yena muuk unowa-ke nia naep nia kookalep ifana niaremi parosifa fain nia siisimomiyem. Makena, Krais opora nia maakowa somek mua unow akena pun eliw niar ikauk, nain yos-ke yaisow niena niawi akena saarik niar arep suule niiyem. 16 Naapeya ni yena sira saarik ikok opora yookam-ikeka naep nia maakiyem. 17 Yo naap maep Timoti ni niar sesekamkun nan ikiwiya. O yena muuka akena-ke, naap maiyem. O mua makena-ke, ne kema maneka Yeesus wiar ikua. Os-ke niar ikiwemi yo Krais wameiya ikok sira kamenap onam-ikaiyem nain nia maakinon. Naeya yo sira nain ni kiiriw kema suuwowen. Yo anane owow unowa ikiwemi Yeesus teeria wia maakem-miem opor awona nain os-ke ikip enuminon.

18 Aria ni papako-ke efa maiman, “Nainiw me yiar ekapinon,” naap efa maemi niam pirami maa unowa nis-keriw miimiman. 19 Nain yo lawisiw akena niar ikiwinen-yon. Mua Maneka-ke era wuominon-na ikiwemi ni teeria nain nia urufinen. Me niena unuma niam pirami opora aakuniman nain, weetak. Mua Maneka kekanowa-ko nieya Yeesus baliwep ookiman-i e wia, nain niar urufowa naep. 20 Moram i Mua Maneka pika kemena-pa wiar ikaimik nain me aakunowa muutiw, weetak. Mua Maneka kekanowa urufowa-ke. 21 Naapeya ni kamenap kookaliman? Yo ikiwemi nia kakankami sirirowa niinen-i, e ni kema kirep baliwep ikaiwkin niar kererep nia kookalemi opor kekelka nia maakinen-i? Ni kema suuweka.

Copyright information for `MHL