1 Corinthians 7

Pol muewowa sira maek

Aria aakisa ni opor unowa parosifa-pa efa nokareman nain yo opora nia kiripomiyem. Ni emeria mua muewowa maeman nain yo feenap maiyem. Mua emeria me aawowa pun eliw. Nain oko wi momor soma oraikuan. Naapeya mua emeriaruk ne emeria pun muewuk. Naeya ni niam aawep ikok me niam teekap-pueka, mua-ke me wame asipinok. Ne ona emeria pun naapiw. Moram, emeria mia-na me ona kakeniw-ke, weetak, ona mua wiarik. Ne mua mia pun naap, ona emeria wiarik, me ona mia kakeniw-ke. Ne ni me niam teekap-pueka. Nain ni mia epaskun ikok, iir oko-pa aakunep Mua Maneka kekanowa faru naep-na sosor mia, uruw mia kaikap-puap name fienap ikok Mua Maneka farowen. Ne ikip niena epa pepekimeman nain weesereya kiiriw mia epaskun aroweka. Ni naap onam-ikowen-na Satan nia akimowa era mareweya soma me orowen. Aria opora fain nia maakiyem, ni mua unowa yo emeria marew ikem naap ikowen-na eliw. Yo oram opor amisa niiyem, ni naap oneka me nia suuwiyem. Moram mua unowa yo ikem naap ikowa me pepek. Naapeya Mua Maneka ona maa-ke, ona mua kui-kuisow nia asipeya mua oko emeria aawinon ne oko oram ikainon.

Aria wi mua oram ikemik nain, ne wi apura wia maiyem. Wi osena ikaikuan-na eliwa, yo ikem naap. Nain wi uruw mia ne sosor mia me koonuk-na eliw muewuk. Wi muewikuan-na eliw, oko oram ikok kema iikirap soma orowa kema manekiw ikaikuan.

10 Ne sira oko pun feenap, ni emeria mua iiriw mueweman nain feenap oneka. (Fain me yena kema-ke, weetak, yiena Maneka Yeesus Krais opora-ke.) Aria emeria-ke ona mua me piipuinok. 11 O mua piipuinon-na osena ikainok, e weetakeya-na nainiw ona mua kiiriw aawinok. Ne wi mua pun naap, wiena emeria me wia iiraruk.

12 Ne oko pun feenap kookaliyem. (Fain yena kema-ke, me yiena Maneka-ke maek.) Feenap, mua-ko emeria ikos ikok mua-ke Yeesus teeria-pa wiar ekinon, ne emeria-ke wia. Nain emeria-ke ona mua wameiya ikowa kookaleya-na mua-ke me iirarinok. 13 Ne wi emeria pun naap, mua ikos ikok Yeesus teeria-pa wiar ekinon, ne mua-ke wia. Nain mua-ke ona emeria wameiya ikowa kookaleya-na emeria-ke me piipuinok. 14 Moram o mua nain emeria Yeesus teeria-pa wiar ikaeya Mua Maneka-ke emeria nain naep iiwawun kunefap wia urufam-ikainon, ne emeria pun naap, ona mua Yeesus teeria-pa wiar ikaeya Mua Maneka-ke naap wia urufam-ikainon. Ne wiena muuka wiipa pun wiar urufam-ikainon, yena teeria-ke wia naep. Oko wi sisin mua muuka saarik ikaikuan.

15 Aria oko feenap, emeria-ko Yeesus teeria-pa wiar ekeya, ona mua Yeesus teeria wiar ekowa miatinep emeria piipuowa naeya-na me asipeka, neek piipuinok. Ne wi mua pun sira kuisow naapiw onuk. Nain opor marew, muewowa eliw weeser-wuikuan. Momor me uuwuneka. Moram Mua Maneka ni unowiya urom eliwiw ikeka nia naiya. 16 Ni emeria, nena mua nefa iirareya-na eliw ikiwinan. No naap me mae, “Yena mua kema kiripamkun Krais teeria-pa wiar ekinon.” Nain no mua kema eliw wiar kiripinan-i? No me amisaren. Ne ni mua pun sira kuisow naapiw oneka.

I kamenap ikowa nain Mua Maneka yia maakeya naap ikaiyen

17 Aria aakisa yo opor manekiw maiyem, feenap, no mua kamenap ikaeya Mua Maneka-ke nefa fareya o teeria wiar ekan. Nain iiriw mia kamenap ikon nain, naap ike. Wi Yeesus teeria owow unowa nain opora sira kuisow fainiw wia maakiyem. 18 Feenap, mua mia kanima iiriw puukap ikaeya Mua Maneka-ke fareya Yeesus teeria wiar ekak. Mia kanima puukak nain naap ikainok. Ne mua eena mia kanima puukowa marew ikok Yeesus teeria wiar ekap-na, os pun naap ikainok, mia kanima me puukinok. 19 Sira erup nain oram-ke. Mua Maneka opora yia maakiya nain wiar ookowa nain-ke makena, maa maneka-ke. 20 Naapeya nia maakiyem, ni mua kui-kuisow iiriw kamenap ikaiwkin yiena Maneka-ke nia farep nia aawok, ni naap akena ikeka.

21 Ne oko feenap, no mua oko tepak-pa sesa marew uuwow yoowa-pa mauwam-ikomeya Mua Maneka-ke nefa farek. Naeya naap ike, nena saria me piipue. Nain kema unu-unowa me wue. Nain nena saria piipuowa eliw nefa nainon-na, ne era-ko nefar imenareya-na eliw piipuinan. 22 Naap ike, moram no naap ikok yiena Maneka teeria wiar ekan. Naeya o mokoka-pa nena saria tepak-pa wiar ikowa saarik me ikon, weetak. Aria no mua, no nena miiwa-pa uuwin, mua oko tepak-pa me wiar uuwin, no Krais teeria wiar ekap o tepak-pa uuwow mua puukowami opora wiar miimam-ikainan. 23 Moram Yeesus Krais-ke umemi ona mia sesa saarik arowap nia sesenarep aawok. Naapeya wi mua oko-ke miiw sira-pa me nia kaikuk. 24 Emar unowik, yo kiiriw maiyem, ni iiriw kamenap ikaiwkin Mua Maneka-ke nia fareya ona teeria wiar ekaman, ni naap akena ikeka.

Wi osena ikemik nain opora wia maakek

25 Aria ni wiip takira me muewowa ikeman, ne ni mua morena me emeriarowa ikeman, yo opora nia maakowa nain yiena Maneka sira-ko me wuak. Nain os-ke efa kemalep uuwowa yiemi efa asipeya baliwep uuwomiyem. Naapeya yo yena kema-pa maiyem fain eliw efa miimowen. 26 Feenap, aakisa epa fain eliw marew, i yia samoriwkin yoowa aawem-ikaimik. Naeya osena ikowa pun eliwa. 27 Nain no iiriw emeriarep-na emeria me iirare. Ne no osena ikok-na emeria aawowa kema me wue. 28 E, nena kookalowa, no emeria aawekam naep-na eliw, nain pina marew. Ne no wiip takira ikok muewowa pun eliw, opor marew. Nain ni muewiman nain maa unowa ne teeria wia kakaltowa yoowa naap aawem-ikowen. Ni naap me areka naep osena ikeka nia naiyem.

Muewow marew Mua Maneka uuwowa onomowa pun eliwa

29 Aria emar unowik, yo maem nain feenap, miiwa fain epa fan weeserikua. Naeya maa unowa me senam kema suuweka. Feenap, ni mua emeria onaiya ikeman nain emeria muutiw me wia kema suuweka, Mua Maneka kema suuwami miimowa-pa wueka. 30 Aria ni kema beelalemi omomiman-i e palanemi niam iriman-i, nain-ke me nia fakerinok. Ne ni maa unowa sesenariman nain, maa nain kema manekiw me ikeka. 31 Ne ni maamuma muuta nain uuwowa sira-sira onowa kemaiw me ikeka. Moram miiwa aakisa ikemik fain fan weeserikua. 32 Naapeya ni maa unowa nain-ke me nia wasinok naep maiyem. Feenap, mua emeria marewa nain yiena Maneka uuwowa kemaiw ikainon, maa mauwa kookaleya-na eliw onominen nainon. 33 Ne mua emeria onaiya ikua nain-ke miiw maa unowa kema manekiw ikaiya, yena emeria kemelam-ikainok naep naap oniya. 34 Naap onami kema wame irakowinon. Aria wi apura ne wiip takira, wi yiena Maneka kema manek akena wuami uuwomimik, o uuwowa-pariw ikaiyen naimik. Ne no emeria muewon nain miiw maa kema manekiw ikain. Yena mua efar kemelam-ikainok naep naap onin. 35 Ni kema-ko aaweka, yo me ni muewowa emi nia wuiyem, weetak. Ni nia asipami naap nia maakiyem. Ni sira eliwa-pa ikok yiena Maneka kemaiw ikok uuwowa wiar topialem-ikeka naep.

36 Aria sira oko feenap, wiipa-ko mua oko-ke episow uuma-pa karuep-puikuan. Mua nain Mua Maneka uuwowa kema suuwap wiipa nain ewur me wiar aaweya muewow epa nomakinon. Naap ikok aakisa fan mua nain emeria aawowa kema urupep wiipa nain wiar aawinon. Nain pun ona kookalowa-ke. Eliw neek aawinok, pina marew. 37 Ne mua nain kekanep oram ikowa naep wiipa nain me wiar aawinon-na ona maa-ke. Mua oko-ke me maakinon. Ona kema-pa naap mainon-na nain pun sira eliwa-ke. 38 Naapeya mua eena emeria aawowa pun eliwa, ne mua eena emeria me aawowa, oram ikowa, nain pun eliw akena.

39 Aria emeria mua onaiya ikok ona mua piipuap mua oko aawowa-ko me ikua. Nain mua wiar umeya apura ikok ona kookalep muewinen naep-na eliw muewinok. Nain o mua baliwep urufap, yiena Maneka Yeesus Krais teeria-pa ikua nain aawinok. 40 Nain yos-ke feenap maiyem, apura nain oram naap ikowa nain eliw akena, o wueliwa ikok palanow manekiw ikainon. Yo maiyem fain Mua Maneka Ewar Eliwa-ke kema yieya maiyem.

Copyright information for `MHL