1 Corinthians 8

Maa eneka inasina patirimik nain wiar maek

Aria ni feenap efa nokareman, maa eneka inasina patirimik nain enakiwa wiar enowa eliw-i e weetak. Nain yo mokomokoka feenap maiyem, “I mua unowiya amis manekiw ikemik,” naap niam maiman. Naap maemi unuma niam pirami mua papako Mua Maneka sira ookowa me wia asipowen. Nain mua wia kookalemi wia asipowen-na wi eliw ikaikuan. Feenap, mua-ko maa amisarowa saarik “Yo amis maneka” naap wame nainon-na, o weetak. Maa muutitik unowa nain onoma me amisarek. Ne mua eena Mua Maneka kookalemi mua wia asipiya nain Mua Maneka-ke kookalep mainon, “Mua nain baliwep efa amisarek.”

Aria ni maa eneka inasina patirimik nain enowa efa nokareman nain maiyem. I feenap amisaremik, miiw fain inasina naimik nain maken marewa, oram-ke. Ne Mua Maneka waisow makena ikua. Nain wi mua-ke maimik, iinan ne miiw maa unowa inasina ikemik. Naemi maimik, wi inasina-ke maa unowa urufimik, e fain yiena inasina makena-ke, naap maimik. Maa sira naap nain unow akena. Nain me maa makena-ke. Naeya maemik, yiena Auwa Mua Maneka waisow akena, maa unowa onoma os, ne i yia oneya yiena pun o wiar ikemik. Ne yiena Maneka Yeesus Krais waisow maneka. O eena Mua Maneka-ke sesekeya maa unowa onomakek, ne i o kekanowa-pa Mua Maneka ookami eliwa ikemik. I naap maimik, maa enowa-na momor enimiyen. Nain mua papako iiriw inasina ookam-ikok Yeesus Krais teeria wiar ekamik. Wi nain aakisa maa eneka inasina patirimik nain wiar enowa kema pinarimik. Wi maimik, “Inasina wia patiramik nain me wiar enowa-ke.” Naapeya yo feenap maiyem, maa enowa oram-ke. Nain-ke Mua Maneka wameiya-ko me yia pekinon. Me enowa, ne enowa pun eliw, Mua Maneka sira eliwa yia naowa nain me enowa-pa ikua.

Nain ni kema wuepap maa oneka, oko ni niena kookalep naap oniwkin Yeesus Krais teeria mua papako opora baliwep me wiar amisaremik nain-ke naap nia urufap oram niokap-puikuan. Neeke kema unu-unowa wuami pina-pa wakikuan. 10 Feenap, wi inasina me makena-ke naemi maa enowa inasina patirimik nain no ikiwep wiar aawep eniminan. Ne mua oko-ke nefa urufap mainon, “Aa, maa enowa inasina patirimik nain me enowa nain enek. Nanek, yos pun eliw wiar eniminen.” Naap maemi eniminon. 11 No nena-na maa oram-ke naep oninan, ne wiisak, mua nain ona kema-pa nain me ookami no niokap-puak. O eena nena teeria epaskun-ke, ne Krais-ke umemi o pina wiar iiraremi aawok nain-ke, nain nos-ke wakiowawan. 12 Feenap, wi nain wia wakiowaweya wiena kema-ke me onowa wia naek nain onamik. Naeya no nena teeria epaskun pina wia onami Krais wiarik pina onan. 13 Naapeya feenap yame mainen, yo maa naap nain enemi yena emar wakiowawinen-na aria yo maa naap nain enowa iiwawun piipu-afurinen. Naeya o pina-pa me wakinok.

Copyright information for `MHL