1 John 4

Mua Maneka Ewar opora yia maakiya nain makena-ke

Aria emar unowik, wi mua papako maimik, “Ewar Eliwa-ke kema yieya opora maimik.” Wi naap maiwkin-na opora ewur makena-ke me wiar naeka. Moram wi wadol mua unowa yiawemi profet-ke wiam maimik. Naap maiwkin-na ni mokomokoka wia amisarep-puap, nain Mua Maneka Ewar-ke kema iwok-i e weetak. Naap maep wia akimeka. Wi mua eena Mua Maneka Ewar onaiya ikemik nain feenap maiwkin wia amisarowen, “Yeesus Krais miiwa orok nain miiw mua mia puukap ikua.” Naap maiwkin-na maeka, mua nain Mua Maneka-ke opora maakek. Ne wi teeria naap me maimik nain wi Mua Maneka Ewar onaiya me ikemik. Wi ewar nain Krais iiwua-ke, eena ikoka ekapinon, nain maiwkin miimaman nain nanek.

Aria muuk unowa, ni Mua Maneka teeria-pa wiar ikeman. Ne Ewar Eliwa niamiya ikaiya nain kekanowa akena-ke, wi ewar wadola nain iiwawun wia nomakek. Naapeya nis pun wi wadol mua wia nomakeman. Wi miiw mua pun miiw sira unowa aakunimik, naapeya mua unowa opora wiar miimimik. Ne i Mua Maneka teeria-ke, ne wi mua Mua Maneka amisarep ookimik nain i opora wia maakemkun yiar miimimik. Aria wi Mua Maneka teeria-pa me wiar ikemik nain opora me yiar miimimik. Neeke i eliw rookasep wia maiyen, “Aa, ewar fain makena-ke, ne nain weetak,” naap maiyen.

Mua Maneka yia kookaliya

Aria emar unowik, wia kookalowa sira nain Mua Maneka ona kema yiiya, naapeya i mua oko wia kookalikua. Mua eena mua oko kookaliya nain Mua Maneka muuk teeria-ke. Ne pun Mua Maneka baliwep amisarek. Mua Maneka mua wia kookalowa onoma-ke. Naapeya mua eena mua oko me kookaliya nain Mua Maneka me amisarek. Mua Maneka ona yia kookaliya nain feenap yia ofakowak. Ona Muuka kuisow eena kema muneka nain yia sesekomak. Naeya i o wiar ekap anane maneka eliwa ikaimik. 10 Wia kookalowa sira makena feenap, me is-ke Mua Maneka kookalemik, weetak. Ona yia kookalep ona Muuka sesekeya orop i miiw mua pina yiar akuawep umok.

11 Emar unowik, Mua Maneka manek akena yia kookalek nain sira naap onak, naapeya is pun yiam kookalem-ikaiyen. 12 Mua kuisow Mua Maneka-ko me urufak. Nain i yiam kookaliyen-na Mua Maneka yiamiya ikainon. Ona yia kookalowa sira kema yiem-ikaeya sira nain ookami baliwep yiam wuami yiam saliwam-ikaiyen.

13 M ua Maneka ona Ewar Eliwa yiek. Naapeya amisarep maimik, makena i kemena-pa wiar ikaimik, ne o yiamiya ikaiya, naap maimik. 14 Aria i yiena mokok onaiya Mua Maneka Muuka urufamik, naapeya nia maakimik, “Makena, Mua Maneka-ke ona Muuka sesekak, i miiw mua yia aawinok naep,” naap maimik. 15 Ne mua-ko feenap mainon-na, “Yeesus-na Mua Maneka Muuka-ke,” naap maiya nain Mua Maneka o wameiya ikaiya, ne o Mua Maneka kemena-pa wiar ikaiya. 16 Mua Maneka yia kookaliya nain amisarep maimik, nain makena-ke.

Mua wia kookalowa onoma Mua Maneka ona. Ne mua eena mua oko wia kookalowa kema manekiw ikaiya nain Mua Maneka kemena-pa wiar ikaiya, ne Mua Maneka o wameiya ikaiya.
17 I miiwa-pa ikemik fain Krais sira baliwep wiar ookimik. Ne Mua Maneka-ke kema yiem-ikaeya i baliwep akena yiam kookalep yiam saliwowiw ikaimik. Naapeya Mua Maneka eena yia mekawow fofa neeke i karanow marew kekanep ikaiyen. 18 Mua eena mua oko wia kookaliya nain keker opowa marew. Sira-ke feenap ikua, yo pina onamkun sirirowa yiikuan, naap maep no keker opinan. Nain no maken akena wia kookalep wia saliwowiw ikain, sira nain-ke kema manekiw nefar ikaeya keker opowa kema me nefar ikainon. Naapeya mua keker opiya nain mua oko maken akena me wia kookaliya.

19 M ua Maneka ona kiikir yia kookalek, naapeya i mua oko wia kookalimik. 20 Ne mua-ko feenap mainon-na, “Yo Mua Maneka kookaliyem,” ne mua oko me wia kookalinon-na mua nain mua wadola-ke. Moram mua ona mokok onaiya wia urufami wiamiya aakuniya nain me wia kookaliya, naep Mua Maneka me urufiya nain kamenap kookalinon? 21 Ne Krais eena sira yia maakek nain feenap, mua eena Mua Maneka kookaliyem naiya nain mua oko pun wia kookalinok.

Copyright information for `MHL