1 Peter 4

Sira samora onowa piipuowa

Aria Krais miiwa-pa ikua nain sirirowa maneka aawok. Naapeya nis pun kema naap ikeka, is pun sirirowa aawiyen naeka. Moram o mua sirirowa naap aawiya nain sira samora onowa kema marew ikainon. Naapeya miiw sira eena mia kookalowa ookam-ikua nain piipuap aakisa Mua Maneka kookalowa wiar ookam-ikok iiwawun ikip kapa silewinon. Ni iiriw Mua Maneka me amisarep sira samo-samora fain onam-ikeman, uruw mia ululkowa, ne mia kookalowa welawowa, eka eruarowa, maa enow maneka onap eka enemi momor iraparem-ikowa, Mua Maneka sira wiar fienami inasina unowa nain wiokam-ikowa, sira unowa nain. Ne aakisa ni sira samora onowa me wiokiwkin kema unu-unowa wuap kema nia bagiwirimik. Ne oporiw nia samo-samorimik. Nain ikoka Mua Maneka yia mekawow epa-pa wiena sira kamenap onam-ikemik nain kakeniw naap pina wiinon. Mua Maneka eena wi mua mokok enuma ikemik nain ne wi iiriw umemik nain unowiya wia mekawiya nain. Wi mua iiriw umemik nain wi mokok enuma ikok sira kamenap onam-ikemik nain ookami wia mekawinon. Wia mekawap mua kaken eliwa wia naiya nain wiena kukusa Mua Maneka ona ikua naap ikaikuan. Nain naep Krais-ke ikiwep wi nain pun ona opor eliwa wia maakek.

Mua Maneka uuwowa yiek nain ona kekanowa-pa oniyen

Aria miiwa ne maa unowa weeserow epa nan tiil arem-ikaiya. Naapeya ni Mua Maneka fariyen naep baliwep ikok maa kema suuwap onam-ikeka. Ne sira fain miimowa-pa wueka, mua oko manek akena wia kookalowa nain. Moram pina unowa imenaromakiya nain mua wia kookalow manekiw ikok ifemakowen.

Ne mua-ko ekapep niamiya ikaiwkin-na baliwep wia kakalteka, me wia tuunam-miaweka. 10 Mua Maneka kema niomakeya uuwowa ononer opam-ikaiman. Naapeya o uuwowa kema niiya nain-pa mua oko wia asipam-ikeka. 11 Mua eena Mua Maneka opora wia maakiya nain, opora kakeniw wia wafuram-ikominok. Ne mua oko Mua Maneka-ke kema iweya wia asipowa nain kekanowa nain-pa wia asipam-ikainok. Naeya Mua Maneka unuma anane wiar piram-ikauk naep ni Yeesus Krais unuma-pa topialemi uuwowa onam-ikomaka. I anane Yeesus eena kekanowa ne unum manek akena nain unuma piriyen. Makena!

Krais naap sirirowa aawem-ikok kemelam-ikowa

12 Aria emar unowik, akimowa-ke niar imenareya sirirowa samora eena aawiman nain kema unu-unowa me wueka. Nain me maa enuma-ke, naeya soraniman. 13 Krais sirirowa aawok naap nis pun aawiman, naapeya ni nain kema suuwap kemeleka. Naeya ikoka o parin onaiya unum maneka ariman ariya nain ni manek akena kemelowen. 14 Ne ni Krais ookiwkin oporiw nia samo-samoriwkin-na kemeleka, moram Mua Maneka Ewar Eliwa eena kekanowa ne unum maneka nain niamiya ikok mia nia iikirowam-ikaiya. 15 Ne sira fain-ke me niar imenarinok, mua wia ifakimowa, maa ikumarowa, sira samor akena onowa e paapar-yiawowa. Naap onap sirirowa aawowen-na emina ururowen. 16 Ne ni Krais teeria-pa ikaiwkin sirirowa niiwkin-na emina me urureka. I Krais muuta nain sirirowa aawimik, naap maemi Mua Maneka unuma pirami sira eliwa naakeka.

17 Mua Maneka yia mekawiya nain i ona teeria kiikir yia mekawiya. Naapeya i yoowa aawimik. Ne wi teeria eena o opor eliwa me wiar miimimik nain wia mekawami sirirowa samora me wiinon-i? 18 Eena Mua Maneka opora-ko maek, feenap,

“Wi mua kaken eliwa Mua Maneka teeria wiar eku naep sirirowa aawep ekikuan. Ne wi pina onimik nain, ne Mua Maneka opora me ookimik nain o teeria wiar ekikuan-i? Weetak.”
(Gutpela Sindaun 11.31)

19 Mua Maneka ona eliw naeya ni sirirowa aawem-ikaiman. Naapeya o eena miiw maa muutitik onak nain sira makena-ke naep o wapena-pa niam wueka, ne sira eliwa naap onam-ikeka.

Copyright information for `MHL