1 Peter 5

Wi woos mua sira

Ne ni Yeesus Krais teeria woos mua, yo ni epaskun woos mua ikem. Krais sirirowa aawok nain yena mokok onaiya urufam. Ne o wiimar unum maneka ne kekanowa onaiya ariman ariya nain i unowiya pun naap ikaiyen. Naapeya feenap nia maakiyem. Mua Maneka ona sipsip teeria wia urufowa nia wuak, naeya ni kemelami baliwep wia urufam-ikeka. Mua Maneka kookaliya naap uuweka. Ne ni uuwami maamuma me naeka, mua wia asipowa kema manekiw ikok topialem-ikeka. Ne wi teeria wia urufam-ikaiman nain yo yaisow naep me niam ireka. Sira eliwa yiokuk naep baliwep ikeka. Ne wiimar Krais eena sipsip urufowa woos mua ariman ariya neeke nia saliwami ni ikiwos maa bala niinon. Eena dubil akena anane naap ikainon, me samorarinon nain.

Wi takira wiam porop opor miimowa sira

Ne sira naapiw, ni takira wi iperowa opora wiar miimeka. Ni unow maneka niam poromi mua oko tepak-pa niam wueka. Eena Mua Maneka opora maek, feenap,

“Wi mua wiam pirimik nain Mua Maneka-ke wia poraiya. Ne wiam poraimik nain wia asipiya.”
(Gutpela Sindaun 3.34)

Naapeya ni niam poromi Mua Maneka wapena-pa niam wueka. Ne ikoka ona epa eliwa wiar imenareya unum maneka niinon. Os-ke nia kemalep nia urufam-ikaiya, naapeya ni kema samora niar ikua nain wapena-pa wiar wueka.

Ni niam urufami baliwep ikok kekanep ikeka. Niena iiwua Satan-na, laiyon saarik nia enimekam naep nia urumam-ikaiya. Naeya o fienami Mua Maneka opora kekanowa wiar opaka. Ni amisareman, wi miiw oko oko Mua Maneka teeria wis pun ni sirirowa aawiman naap aawimik.

10 Mua Maneka manek akena yia kemalep yia asipowa kema maneka wiar ikua. Os-ke nia aawep Krais epaskun ona parina-pa nia wuami unum maneka niek. Makena ni sirirowa aawiman nain epa maala me ikowen. Moram ona nia saliwap kema nia sonomami nia kekanoweya ni kekanep ikowen. 11 Aa, Mua Maneka no naisow kekanowa onaiya ikon, anane maneka. Makena!

Eliwa ikeka wia naek

12 Yo parosifa iiw muuta fain yena opora maemkun Sailas-ke siisimok. Os pun Krais uuwowa baliwep onomiya naiyem. Ne yo parosifa fainiw kema nia kekanowami nia maakiyem. Feenap, Mua Maneka maken akena yia asipiya. Naapeya ni kekanep ikeka.

13 Ne Krais teeria Babilon-pa ikemik nain ni eliwa ikeka nia naimik. Wi eena Mua Maneka-ke nia pepekimemi wis pun wia pepekimok nain. Ne yena muuka Mak pun eliwa ikeka nia naiya. 14 Ni Kristen teeria unowiya niam kookalemi sira eliwa-pa wapena niam opaka. Ni Krais teeria unowiya kema eliwiw ikeka nia naiyem.

Copyright information for `MHL