1 Thessalonians 1

Aria i yiam arow, Pol, Sailas ne Timoti, i naap parosifa fain ni Tesalonaika nia siisimomimik, ni eena yiena Auwa Mua Maneka ne yiena Maneka Yeesus Krais teeria-pa wiar ikeman nain. Feenap nia naimik, wi nia kemalep nia asipam-ikaiwkin ni kema sonom eliwiw ikowen.

Wi Yeesus opora kekanowa opap kakeniw ikemik

Aria i sira fain niar kema suuwimik, ni kekanep Yeesus opora opiman nain, ne mua wia kookalep uuwowa oniman nain pun. Ne oko pun feenap, yiena Maneka Yeesus Krais ekapowa nain kemaiw tuupam-ikok ni kekanep opora opiman. I iiwawun nain niar kema suuwap nia maemi yiena Auwa Mua Maneka faremi sira eliwa naakimik.

Emar unowik, i iiriw Yeesus opor eliwa nia maakemik nain me opora muutiw nia maakemik, weetak. Ewar Eliwa kekanowa-pa maa miililina unowa nia ofakowamik. Nain-ke kema nia kiripeya opor makena-ke wiar naep ookaman. Naapeya i nain amisarep maemik, pepek, Mua Maneka ona iiriw nia kookalep nia nanikak. Ne i iiriw ni niamiya ikemik nain ni baliwep ikeka naep sira kamenap nia onam-ikemik nain yiar amisareman. Naeya i sira yiokami yiena Maneka sira pun wiar ookaman. Makena, ni sirirowa unow akena niem-ikemik, nain Ewar Eliwa-ke kemelowa nieya ni kemelowiw opora nain miimap yiar opaman.

Naapeya wi Yeesus Krais teeria Masedonia ne Akaiya kame-pa ikemik nain, sira unowa nain niar urufap ni sira niokimik. Moram ni yiena Maneka opor eliwa wiar opaman nain, nain-ke manekareya wi Masedonia ne wi Akaiya pun aawemik. Ne me wi muutiw miimamik, weetak. Owow unowa pun niar miimap maimik, “Wi Mua Maneka opora baliwep wiar opimik,” naap nia maimik. Naapeya i wiar ikiwimik nain ni nia maemi wia nanaromowa nain wi iiriw nia amisaremik. Ne wis-keriw feenap yia maakimik, i iiriw niar ikiwemik nain ni baliwep yia aawep opora yia miimaman. Ne ni miiw inasina ookam-ikeman nain mikikira wiemi Mua Maneka ookaman, eena makena ne anane ikaiya nain. Naemi uuwowa onomaman. 10 Ne ona Muuka iinan-pa oraiya nain arewap ikeman, eena umeya Mua Maneka ona iikirowak nain. Muuka nain-ke yia aaweya Mua Maneka wiimar bagiaw yia ofakowowa maek nain me urufiyen. Wi nain iiwawun yia nanaromamik.

Copyright information for `MHL