1 Thessalonians 4

Mua Maneka i sira eliwa nain yia kookaliya

Aria emar unowik, Mua Maneka kookalowa wiar ookowa sira unowa nain suule iiriw niemik. Makena, ni aakisa opora yiokami naap ikeman, nain i aakisa yiena Maneka Yeesus unuma-pa opor kekanowa nia maakimik, ni sira nain me piipueka, anane naap onam-ikaiwkin sira nain niar manekarinok. Moram yiena Maneka Yeesus unuma-pa i opor unowa iiriw nia maakemkun amisareman.

Mua Maneka ni pina marew, dubil manekiw ikeka nia naiya. Feenap, uruw mia me ululkoweka. Ni mua uruw mia baliwep niam kaikap sira eliwa ne sira makena-pa ikeka. Wi sisin mua Mua Maneka me ookimik nain uruw mia me wiam kaikimik. Wi nain sira me wiokeka. Wi mua naap nain ikoka yiena Maneka-ke wia kiripomami sirirowa samor akena wiinon. Ni kakeniw ikeka, niena teeria mua oko emeria me wiar mufeka, mua emeria pokow eliwa me wiar samoreka. Opora nain i iiriw opor kekanowiw ariman nia maakemi maemik. Moram Mua Maneka yia fareya ona teeria-pa wiar ikemik nain me sira samora onowa-ke, weetak. Yena teeria-pa ikok sira eliwa-pa ikeka naep yia naiya. Naapeya wi mua eena i opora yiar fienimik nain me i mua oram fain opora yiar fienimik, weetak, Mua Maneka eena Ewar Eliwa yiiya nain opora wiar fienimik.

Aria ni Mua Maneka teeria-pa ikeman nain niam kookalow sira nain Mua Maneka ona iiriw nia ofakowak. Naapeya i nainiw nia maa-maakep me naem-ikaiyen. 10 Makena, ni wi Kristen teeria Masedonia owow unowa-pa ikemik nain wia kookaliman. Nain ni naap akena onam-ikeka nia naimik. Naeya sira nain niar manekarem-ikainok.

11 I iiriw nia maakemik naap ikeka. Feenap, ni me paapar-yiaweka, kekelka ikok niena uuwowa baliwep oneka. Ne niena wapena-pa uuwami maa muutitik pepek erowen. 12 Naeya ni mua oko maa-pa me wiar kekanep ikowen. Ni naap oniwkin wi sisin mua sira niar urufap ekima nia opikuan.

Yeesus nainiw ekapinon

13 Aria emar unowik, wi mua iiriw umemik nain ikoka kamenap arikuan nain momora me ikeka naep nia maakimik. Feenap, wi sisin mua Mua Maneka me ookimik nain umep iiwawun mesenalikuan. Wiena teeria mua oko umiwkin kema iiwawun fufurarimik. Oko nis pun naap niena teeria wi iiriw umemik nain kema wia wiisarem-ikowen. 14 Naapeya i feenap nia maakimik, Yeesus umep ikok iikirak nain i makena-ke naimik. Naemi maimik, makena, wi eena o teeria-pa ikok iiriw umemik nain ikoka Mua Maneka-ke Yeesus miiwa poromi wis pun wia iikirowap o wameiya wia pekapinon. 15 Ne aakisa yiena Maneka eena maek nain ookami nia maakimik, i mokok enuma ikemkun o ekapinon-na is-ke wi iiriw umemik nain wia nomakep me miimep iinan urupiyen, weetak. 16 Feenap arinon, iir nain yiena Maneka iinan-pa oromi kerew akena farinon. Ensel woos mua pun kerew farinon, ne Mua Maneka puuw wiar aluinon. Iir kuisow maa nain imenareya wi eena iiriw Yeesus opora wiar opam-ikok umemik nain kiikir iikirikuan. 17 Wi iikiriwkin i mokok enuma ikemik fain Mua Maneka-ke unowiya yia aawep iinan yia amapurupeya aapereka iinan-pa yiena Maneka miirowiyen. Miirowap o wameiya ikaiyen, anane maneka. 18 Naapeya ni opora fainiw aakunemi kema niam iikirowam-ikeka.

Copyright information for `MHL