1 Thessalonians 5

Yiena Maneka ekapowa nain arewam-ikaiyen

Aria emar unowik, yiena Maneka ekapowa nain fofa ne ama amisarowa nain i me nia maakiyen. Moram ni feenap amisareman, o ekapowa nain ikum mua uura ekapimik naap akena ekapinon, oram yia soranowap-puinon. Aria wi momora ikok maem-ikaikuan, “Aa aakisa i epa eliwa-pa ikemik, maa keker opowa marew, irakowa marew.” Wi maep naap ikaiwkin maa samora feekeriw imenaremi wia samorinon. Ne wi baurarowa me pepek, wi emeria eena muukaru naep sirirowa maneka feekeriw wiar imenariya naap.

Nain ni kokoma-pa me ikeman. Naapeya fofa nain imenareya ni me soranowen, weetak, wi momor ikaiwkin ikum mua ekapiwkin soranimik naap. I me uura epa kokoma-pa ikemik naap. Ni unowa nain amirik maneka-pa ikowa saarik, parina-pa ikeman. Naapeya wi papako saarik me inep ikaikua. Neemi i palanow manekiw ikok maa baliwep kema suuwam-ikaikua. Uura-na wi inimik ne eka kekanowa enep momorarem-miawimik, epa nain-ke. Ne i eena amirik parina-pa ikemik nain i maa kema suuwam-ikaikua. Naeya Yeesus Krais opora wiar opam-ikok mua wia kookalem-ikaikua, nain tapi wuap ikowa saarik. Ne Yeesus Krais yia aaweya eliw ikemik, nain irakow tapala kekanowa saarik ikiwosa-pa wuap kema manekiw ikaikua. Moram Mua Maneka yia nanikak nain bagiaw wiar urufowa nain me yia nanikak, weetak. Yiena Maneka Yeesus Krais wia aaweya eliw ikauk naep yia nanikak. 10 O i muuta nain umok, naeya i mokok enuma ikemik fain o wameiya ikemik, ne umiyen pun naap, o wameiya ikaiyen. 11 Naapeya ni aakisa niam kekanowami kema niam iikirowam-ikaiman nain naap akena oni-ikiweka.

Opora papako

12 Aria emar unowik, feenap oneka nia naimik, wi iimarow mua eena uuwow yoowa nia uuwomimik nain ekima wia opaka. Wi yiena Maneka-ke wia pepekimeya ni nia kakenami suule niu naep onimik, wi nain-ke. 13 Wi uuwow maneka opimik, naapeya ekima wia opa-afureka, ne wia tetareka. Ni unowiya kema kuisow ikeka.

14 Ne feenap oneka nia naimik, wi mua lebuma oram yiawimik nain ifana wiareka. Ne wi Yeesus Krais ookowa kema pinarimik nain wia kekanoweka. Wi mua pina-pa wakiemik nain wia ane-suuweka. Ni unowiya kekelka niam wuami niam saliweka. 15 Pina nia oniwkin-na muuna me urureka. Ne sira eliwa onami mua oko pun saria wieka. Ni nain kemaiw ikok naap onam-ikeka.

16 Ni kemelow manekiw ikeka. 17 Mua Maneka anane farem-ikeka. 18 Maa samora e maa eliwa niar imenareya Mua Maneka sira eliwa muutiw naakem-ikeka. Moram ni Yeesus Krais teeria-pa ikeman nain Mua Maneka ni naap oneka nia naiya. 19 Ni Ewar Eliwa kema niiya nain naap oneka, me wiar puukeka. 20 Wi Mua Maneka opor kokosa ariman wiar maimik nain me wiar firekeka. 21 Ne maa unowa aakunimik nain wiar pupep eliwa nain opaka. 22 Ne sira samo-samora onowa nain iiwawun mikikira iweka.

23 I feenap nia naimik, Mua Maneka eena anane kema yia sonomiya nain nia asipeya ni kema ne sira iiwawun dubil manekiw ikowen. Naeya ni naap ikok niena ewar, kukusa ne niena mia pun iiwawun pina marew ikainok, ikip iiwawun yiena Maneka Yeesus Krais nainiw ekapowa-pa. 24 O eena nia fariya nain makena-ke, naapeya maa maek nain naap oninon.

25 Emar unowik, nis pun Mua Maneka fariwkin yia asipinok naep nia maakimik. 26 Ni Mua Maneka teeria unowiya sira eliwa-pa wapena niam opaka. 27 Yo yiena Maneka unuma-pa opor kekanowa nia maakiyem, ni parosifa fain aawep wi Mua Maneka teeria unowa nain wia unufomaka.

28 Aria yiena Maneka Yeesus Krais nia kemalep nia asipam-ikaeya ni eliw manekiw ikowen, naap nia naimik.

Copyright information for `MHL