1 Timothy 1

Aria parosifa fain yo Pol-ke no yena muuka Timoti siisimomiyem. Yo Yeesus Krais aposel-ke. Mua Maneka eena yia aawok nain ne Yeesus Krais urufu naep arewap ikemik wi nain-ke uuwow mua efa pepekimemik. Iiriw Mua Maneka opora nefa maakem-ikemkun ookam-ikon, naapeya yena muuka nefa naiyem. Yiena Auwa Mua Maneka ne yiena Maneka Yeesus Krais nefa kemalep nefa saliwami kema sonom eliwa niuk.

Opor wadola unowa i me miimiyen

Aria yo iiriw Masedonia ikiwekam naep opora fain nefa maakem, ne aakisa kiiriw nainiw nefa maakiyem, no Efesus-pa neekeriw ikok mua papako wadol opora wia maakimik nain wiar puuke. Wia maakeya opor nanar maken marewa nain piipuauk ne wiena weke unuma pun me wia mikap ookuk. Moram sira naap onami oporiw irakikuan. Naeya Mua Maneka sira yia wuomak nain baliwep me wiar ookikuan.

Yo naap nefa maakem nain onoma feenap, wiam kookalowa sira nain imenuk. Wi pina marew ne kema melina ikok Mua Maneka opora baliwep wiar opikuan-na sira neeke wiam kookalowa sira nain wiar imenarinon. Mua papako Mua Maneka sira nain wiar piipuap opora wiar kapewami opora maken marewa nain aakunem-ikaimik. Ne Mua Maneka eena Moses maakeya sira wuomakek nain wieniw somek mua saarik aru naep opor makena saarik aakunimik. Nain wi opora kakeniw me amisaremik, ne wiena opora kekanowa opimik nain onoma pun baliwep me amisaremik.

Mua Maneka sira wuak nain i amisaremik, nain eliw oram, nain feenap, mua pina ariman wiar wuowa-ke. Ne i feenap amisarikua. Moses sira wuomakek nain me wi mua sira eliwa wia keker opowowa naep wuak, weetak. Wi mua sira samo-samora onimik nain wia naep nain wuomakek. Sira feenap nain, wi emina kekanemi ikumarimik nain, Mua Maneka kema me tootonowa sira samo-samora onimik nain, ne sira samo-samora onowa kemaiw ikaimik nain. Ne yiena Maneka firekami opor samora aakunimik nain, onak wiawi wia samorami wia ifakimimik nain, ne mua oko wia ifakimimik nain. 10 Ne wi uruw mia samora nain, ne wi mua muaiw wiam opimik nain. Maamuma aawow muuta nain mua oko wia opimik nain, ne wi wadol mua ne wi opor makena sailemi wadol opora maimik nain. Ne wi opor makena fienami sira samora oko onimik nain pun. Wi mua sira samora naap nain wia kema suuwap sira kekanowa unowa nain wuomakek. 11 Yo opora maem nain Mua Maneka opora kakeniw wiar ookiyem. Yeesus opora pariniya nain Mua Maneka anane kema eliwiw ikaiya nain-ke yo wapena-pa efar wueya arimaniw maiyem.

Mua Maneka-ke Pol kemalek

12 Aria yiena Maneka Yeesus Krais-ke uuwowa oniyem fain kekanowa yiek. Yo iiriw mua samor akena ikem, ne o unuma wiar firekami ona teeria wia iiwuarem-ikem. Yo o uuwomowa me efa pepekimowa nain, ona efa wuak, yo uuwowa kakeniw onominok naek. Naapeya sira eliwa naakiyem. Yo iiriw Yeesus opora baliwep me wiar amisarep ikiwos momora ikok sira naap onam. Sira naap onam nain me efa samorak, weetak, efa kemalek. 14 Mua Maneka-ke yo manek akena efa kemaleya Yeesus Krais teeria-pa wiar ikok opora baliwep opowa sira, ne mua wia kemalowa sira yieya nain ookami naap oniyem.

15 Opora fain maken akena-ke, wi emeria mua unowa baliwep miimap makena-ke nauk. Feenap, Yeesus Krais i pina mua yia aawekam naep miiwa orok. Makena yo pina mua akena-ke, nain Mua Maneka-ke efa kemalek. Yo pina manek akena onam. Yeesus Krais iiriw efa samorekak nain baliwep akena efa saliwak. Yo efa kemalek nain onoma feenap, wi emeria mua efa urufap wis pun opora wiar opap anane maneka eliwa ikauk. 17 Oo Mua Maneka, no anane maneka naap ikain nain-ke. Yiena mokokiw nefa urufowa me pepek. No naisow Mua Maneka-ke. Unum maneka ne kekanowa anane no nefar ikaiya. Makena.

Timoti kekanowa iimarinok opora maakek

18 Aria Timoti, yena muuka, yo opora nefa maakiyem naap one naiyem. Iiriw wi profet-ke no nefa maemi feenap maemik. Naeya opora nain wiar opa-afurap kekanep wi momor opora aakunimik nain wiar mika-fienami baliwep akena mauwe. 19 Yeesus opora wiar opam-ikon nain ne kema melina nain amia saarik opap ike. Mua papako sira nain iiriw opamik, nain naap ikok mikikira-pa wuami wakiemik. 20 Aimenias, ne Alesanda wiam erup pun sira naap onap wakiemik. Wi wiam erup nain Satan wapena-pa wia wuam, ikoka wi pina aawep ifan tiira puep Mua Maneka nainiw me firekuk naep.

Copyright information for `MHL