1 Timothy 3

Wi Kristen woos mua opora-ke

Aria yo opor makena maiyem. Sios teeria wia urufowa uuwowa nain eliwa-ke. Mua eena uuwowa nain opowa kookaliyem naeya-na eliw akena. Mua sira feenap nain wia urufap uuwowa nain eliw wia pepekime. O pina marew akena, ne emeria kuisow aawinok. Mua bolakuowa marewa ne momor soomarowa sira kema me wuinok. Maa baliwep kema suuwap uuwowa kakeniw onam-ikainok. Mua wia tetarowa sira, ne Mua Maneka opora wia maakowa amisarek nain. Mua sira naap nain eliw pepekime. Eka kekanowa me eniminok, kema bagiaw marew, mua saria ikainok. Maamuma me kookalinok. Ona emeria muuka wiipa baliwep wia urufami muuka wiipa sira eliwa wia ofakoweya opora wiar miimuk. Mua ona teeria baliwep me wia urufinon-na aria Mua Maneka sios teeria maneka nain kamenap wia urufinon, me pepek. Mua aakisa fan kema kirep Yeesus teeria wiar ekak, mua naap nain woos mua me arinok. Oko yo mua eliwa-ke naep emina kekanemi Satan saarik unuma wame purupeya Mua Maneka-ke Satan iirarek naap iirarinon. Wi sisin mua pun mua nain sira eliwa-ke naimik nain, eliw mua nain pepekime. Oko mua eliw marew nain-ke iimareya o murarow opora onami unuma wiar samorikuan. Naeya Satan akimowa-pa wakinon.

Wi Yeesus teeria uuwow mua opora-ke

Aria sios teeria uuwow mua pun naap, mua feenap nain wia pepekime. Mua sira eliwa, ne opor makena aakunowa, eka kekanowa me enimimik nain, ne maamuma me kookalimik nain, pina marewa, kema kuisow ikok Mua Maneka ookowa opor makena, kekanowa wiar opimik nain. 10 Wi mua naap nain mokomokoka mauwowa wia akimap urufeka, baliwep mauwuk-na eliw uuwow mua-pa ikauk.

11 Ne wiena emeria pun naapiw, emeria sira eliwa, riirinowa marew, murarow opora me onuk. Emeria opora marew ne mauwowa wi wapena-pa wiar wuiwkin-na baliwep onuk. 12 Wi sios uuwow mua, emeria kuisow aawinok. Wiena muuka wiipa ne uuwow mua sira eliwa wia ofakowami opor miimowa sira nain maakuk. 13 Wi uuwowa baliwep faikuan-na, wiena unuma eliw akena wiar imenarinon. Naeya wi emin ururowa marew, kekanep Yeesus Krais ookowa sira nain wia maakem-miawikuan.

Mua Maneka unuma wiar fakerowa sira

14 Aria yo kema feenap wuap parosifa fain siisimomiyem, epa me ekinen, yo ikiwep nefa urufekam naep. 15 Nain yo ewur me kererinen-na parosifa fain urufap amisa aawep wia kakenami wia maakeya Mua Maneka teeria-pa wiar ikowa nain unowiya baliwep ookuk. Yeesus teeria-na Mua Maneka anane naap ikaiya nain ona teeria-ke, o opor makena nain poka saarik wiar akuawep ikaiya nain-ke. 16 I Mua Maneka opora wiar opimik nain onoma maneka akena, iiriw kokot ikua. Nain feenap,

“O miiwa fan orop mua mia puukak. Ewar Eliwa-ke o mua eliwiya ariman wueya mua makena-ke naemik. Wi ensel o urufamik. Miiw unowa o unuma wiar maem-miawiwkin meta manekareya opora wiar opamik. Ne naap ikok Mua Maneka-ke aaweya owow iinan urupep unum maneka aawok.”
Copyright information for `MHL