1 Timothy 4

Wi wadol mua opora-ke

Aria Ewar Eliwa-ke opora ariman maek nain feenap, wiimar emeria mua papako Mua Maneka opora wiar ookam-ikok piipuap inasin wadola ne ewar samora opora wiar ookikuan. Wi wadol mua-ke mua wia peeskimiwkin naap onikuan. Wi wadol mua naap nain ikiwosa iiwawun wiar momorareya iiwawun emina kekanikuan. Wi feenap wia maakikuan, ni me mueweka, ne maa enowa naap, naap nain me enimeka, naap wia maakikuan. Nain maa enowa unowa Mua Maneka-ke oram enow manekiw wuak, naeya i opora baliwep wiar opap ookimik nain o sira eliwa naakemi maa eliw enimiyen. Maa unowa o onomakek nain eliw manekiw. Nain sira eliwa naakep enowa-ke eliw. Moram ona opora-ke naap maek, ne sira eliwa naakemkun maa nain eliwa arinon.

Krais uuwow mua eliwa ikowa sira

Aria nena pun Mua Maneka opor makena wiar kema suuwami sira wiar ookam-ikok wi emeria mua yo nefa maakem nain wia maakinan-na, no Yeesus Krais uuwow mua eliwa wiar ikainan. Nanar wado-wadola ne opora kemen marewa maimik nain me wiar mae, mikikira-pa wue. No Mua Maneka sira wiar ookami dubila ikowa name paayam-ike. No amisaren, niirowa sira-sira niiremi mia palanowa-ke, nain eliwa ne maa oram-ke, ne Mua Maneka kema suuwam-ikowa nain maa makena-ke. Moram i Mua Maneka kema suuwami eliw ikaimik, ne miiwa weeserow epa imenariya nain pun eliw ikaiyen.

Opora fain maken akena-ke, wi unowa nain miimap makena-ke nauk. 10 Feenap, Mua Maneka anane naap ikaiya nain-ke waisow yia aawiya, ne opora wiar ookimik nain wia aawowa manek akena kookaliya. O yia aawowa nain makena-ke naep kemaiw yiam tuupam-ikaimik. I muut nain kerew akena uuwam-ikaimik.

11 No opora nefa maakem nain wia maakemi baliwep wia ookoma. 12 No lawisik takira saarik nefa urufap me mauk, “O takira-ke, opora me wiar miimiyen.” No feenap onam-ike, aakunow sira, soomarowa, mua wia kemalow sira, Mua Maneka opora wiar ookowa ne sira ele-eliwa kema suuwowa, naap onam-ikaeya wi Yeesus teeria sira nefar urufap wis pun naap nookuk. 13 Yo niar ekapowa efa arewami wia fiirimep Mua Maneka opora wia unufomami kemena baliwep wia maakem-ike. Ne pun sira eliwa onowa baliwep wia ofakowam-ike. 14 Uuwowa nain Mua Maneka Ewar Eliwa-ke no niek. Ne mua oko-ke ariman nefa maiwkin wi woos mua-ke wapena no ikiwosa iinan-pa nefar wuiwkin uuwowa nain aawon. Naapeya uuwowa nain me piipue, anane uuwam-ike.

15 Uuwowa unowa nain baliwep onami anane uuwowa neekeriw kekanep ike. No naap onam-ikaeya nefa urufap mauk, “O aakisa uuwowa nain amisar-afurap baliwep akena uuwiya,” naap nefa mauk. 16 Nena sira onin nain baliwep name urufe, ne Mua Maneka opor kemena ariman wuowa nain pun baliwep kema suuwap wia maake. No anane kekanep uuwowa nain onam-ike. Naap onam-ikainan-na nena name asipami wi Yeesus teeria unowa nain pun wia asipam-ikainan. Naeya ni unowiya Mua Maneka-ke nia aawinon.

Copyright information for `MHL