2 Corinthians 10

Pol ona uuwowa wame maek

Aria opora fain yo Pol-ke yena yame maiyem. Ni papako-ke feenap efa maiman, “I yiamiya ikok opora kekelka yia maakem-ikua, ne epa oko-pa ikok yia kakankow opora yia maakiya,” naap efa maiman. Ne wi mua papako feenap yia maimik, “Pol ame-na Mua Maneka opora me wiar ookowa wiena kema-pa maa onimik.” Wi naap yia maimik nain ikoka wia kakankinen. Ne iiriw Krais eena ona wame poromi opora kekelka wia maakem-ikua, yo sira nain ookami nia maakiyem, sira eliwa, ni sira kamenap me oneka. Naeya yo nainiw ikiwowa nain me nia kakankinen. Makena, i miiw mua-ke, nain i me miiw sira ookimik, weetak. I miiw maa samora unowa fienami Mua Maneka uuwowa onomimik. Ne me irakow maa opap irakimik, weetak. I Mua Maneka kekanowa-pa wiamiya irakimik. Wi mua eena Satan-ke wia opap ikua nain pika wiar te-teekami kekanowa wiar weeser-wuimik. Ne wi mua eena wiam pirami wiena kema-pa opora imenap aakunemi Mua Maneka opora wiar fienimik nain, opora iiwawun wiar ifemakimik. Kekanowa nainiw mua unowa kema wiar kiripamkun Krais opora-ke kema ne mia wia ookekap ikaeya momasia ookuk. Aria ni teeria eena Mua Maneka opora baliwep ookowen-na i ikiwep naap nia urufap maiyen, “Eliw, i aakisa wi emina kekanep Mua Maneka opora fienimik nain wia kakankami sira wia ofakowiyen,” naap maiyen.

Ni mua wia pupep aakuneka. Ne mua oko-ko, “Yo Krais teeria-pa wiar ikem,” naap wame mainok-na is pun naap yia mainok. Is pun Krais teeria-pa wiar ikemik nain-ke. Yiena Maneka ona uuwowa yo wapena-pa yieya nia kekanowamkun ni baliwep o ookiman. Uuwowa nain me nia samorowa nain-ke, weetak. Naapeya yo uuwowa nain naemi kemelap unuma yame pirowa pun eliw. Yo nain emina me ururiyem. Mua papako-ke maimik, “O parosifa yia siisimomami opor kekanowa yia maakiya. Ne ekapep yiamiya ikaiya nain i urufimik-na mua oram saarik urufimik. Ne o mua aakunowa pun paarirowa marewa saarik,” naap efa maimik. Naapeya nia maakiyem, yo parosifa fain efar urufap me maeka, “Pol-ke yia keker opowami parosifa yia siisimomak.” Yo naap marew. 11 Ne ni mua naap efa maiman nain feenap amisareka, i epasia-pa ikok parosifa-pa kamenap nia maakimik nain ikiwep niamiya ikaiyen pun naap akena oniyen.

12 Wi mua papako wiam maemi unuma wiam piram-ikaimik. Ne i epaskun ikemik naemi me maimik. Wi faa, momor upowa-ke-yon aa. Naeya wi wiena muutiw wiam maemi uuwowa wiam pupep wiam maimik. 13 Ne i naap weetak, i yiena oko. I uuwowa eena Mua Maneka yiek nain uuw-ikiwemi ni niar kereremik. Naeya i oram maneka unuma me yiam pirimik, uuwowa muut nain uuwami yiam pirimik. 14 I ikiwemi uuwowa oko oko me onimik. Mua Maneka uuwowa yiek nain kakeniw naap uuwimik, eena Krais opor eliwa nia pikiwomimik nain. 15 Mua Maneka uuwowa yiek nain kakeniw uuwimik. Wi mua oko Mua Maneka-ke uuwowa wieya wi uuwimik nain, is-ke nain wiar maemi unuma me yiam pirimik. Ne i feenap maimik, ni Mua Maneka opora naap wiar opam-ikok baliwep ikowen-na Mua Maneka uuwowa yiek nain kakeniw uuw-ikiwemi naap yiam asipami uuwow maneka oniyen, naap maimik. 16 Ne ni naap baliwep ikaiwkin i wi owow oko oko mikikira-pa niar ikemik nain wiar ikiwep Yeesus Krais opor eliwa wia maakem-miawiyen. Ne wi mua oko iiriw uuwamik nain is-ke epa nain me ikiwiyen, weetak. Ne pun uuwowa wiar maemi unuma me yiam piriyen.

17 Mua Maneka opor ara oko maek, “Wi mua eena opora maemi me wiam piruk. Makena, yiena Maneka eena maa mauwa onak nain wiar maemi unuma piruk,” naap maek. 18 Moram mua eena ona wame piriya nain yiena Maneka mokoka-pa o iiwawun weetak. Ne mua eena yiena Maneka-ke unuma wiar piriya nain-ke makena, unum onaiya ikainon. Makena.

Copyright information for `MHL