2 Corinthians 11

Wi Korin wadol mua wiokiwkin wia kakenak

Aria yo opor momora fain-ko eliw nia maakinen-i? Ni efar miimow muutiw. Aa, ni efa kookalow muutiw ikaiman. Opora fain maiyem, Mua Maneka manek akena kema nia wiisariya. Ne yos pun naap, ni unowiya Krais baliwep ookeka naep kema wiisariyem. Yo feenap saarik nia onam, wiipa eliwa-ko koor omopora nomakep-puiwkin ikua naap. Yo iiriw nia aawep Krais wiar pekekam naep nia maem. Naeya ni kema tumin marew, dubil akena ikaiwkin yo Krais mia-pa nia wuinen. Nain yo kema moke maneka nia ikem. Ni kema kuisow Krais wuap ookam-ikaiman. Oko mua oko-ke nia mufiwkin ni kema kirep o piipuowen, iiriw ifa-ke Eewa peeskimeya wakiek naap. I Yeesus opor makena nia maakemkun ni opora opam-ikaiman. Ne Ewar Eliwa iiriw ni niar orok. Nain wi mua oko-ke Yeesus maemi sira oko oko nia maakiwkin ni ewuriw aawep-puiman. Ne ewar oko pun kookalep aawiman. Ne pun Yeesus Krais opor eliwa wiar kapewami nia maakiwkin-na kema kaalalep wi wiokap-puiman.

Naeya yo feenap maiyem, wi eena aposel maneka wia naiman nain wi eliw akena-yon aa. Ne yo weetak-i? Yos pun mua naap nain-ke, wi me efa nomakemik. Yo mua piik marew-ke efa naiman-i? Nain yo amisa-ke maneka. Yo Yeesus Krais opora nia maakemi sira-sira baliwep nia ookomam-ikem, nan efar furewap amisareman.

Yo Yeesus Krais opor eliwa eena suule niem-ikem nain sesa-ko me nia farem-ikem, weetak. Nain ni Krais wameiya ikok unum maneka aaweka naep yame porop mua meta marew saarik ikem. Yo naap onam nain eliw marew-yon aa. Yo eena ni niar uuwam-miem nain maamuma muuta wi Mua Maneka teeria papako-ke sesekam-ikomemik. Yo Yeesus Krais opora baliwep nia maakekam naep maamuma me nia maakem-ikem. Wi teeria papako maamuma wiar mufem-ikem. Ne ni niamiya ikem nain yo maa iiwarep ikok ni mia me nia teekam-ikem. Wi Yeesus teeria Masedonia-pa ikemik nain-ke ekapep maa pepek yiemik. Oko ni efa asipowa yoowa furewowen naep maa-ko me nia maakem-ikem, ne aakisa pun naap me oniyem. 10 Krais unuma-pa maken akena maiyem, yo muut nain yame iriyem. Ne yo sira nain ni Akaiya kame-pa ikeman nain efar puukowa me pepek, naap onam-ikainen. 11 Nain yo maamuma me nia maakiyem nain, me nia kookalep naap oniyem-i? Weetak, Mua Maneka efa amisarek, yo manek akena nia kookaliyem. 12 Naapeya aakisa sira naapiw onam-ikainen. Nain wi teeria papako uuwow mua wiam naemi wiam piram-ikaimik. Feenap maimik, “Pol ame uuwimik nain is pun naap uuwimik.” Nain yo maamuma me nia maakiyem nain wi naap-ko onimik-i? Naapeya wi unuma wiam pirowa me pepek.

13 Wi nain me Yeesus Krais aposel-ke. Wi wadolalimik, mua wia peeskimemi Krais aposel-ke wiam naimik. 14 Aa-na pepek, wi sira naap onimik nain me maa enumiya soraniyen. Moram Satan pun wadolalemi ensel eliwa wame puukowap parin onaiya ikaiya. Ne o uuwow mua pun naap onimik. Wi wadolalemi opor makena saarik aakunimik. Ikoka miiwa weeserow epa-pa wiena sira samora nain-ke kirep wia urufeya samor aawikuan.

Pol sirirowa aawok nain wame maek

16 Aria yo nainiw maiyem, yo me momora-ke, naeya naap me efa maeka. Nain ni momora-ke efa maowen pun eliw, naapeya yo aakisa mua momora saarik aakunemi unuma lawiliw-ko yame pirinen. Nain me efa maeka. 17 Makena, yo yame piriyem fain me yiena Maneka-ke kema yieya naap oniyem, weetak. Yena momor kema-ke efar urupeya naap oniyem. 18 Wi mua unowa eena wiena kekanowa-pa maa muutitik uuwami wiam pirimik. Naeya yos pun naap-ko yame pirekam naep oniyem. 19 Aa, ni amis manek akena-yon aa, naeya wi momor upowa eena momor opora aakunimik nain wiar miimowa pun kookaliman. 20 Ni faa, naap oniwkin wi suupapera-pa nia iwawap-puiwkin wiisiw wiokiman. Ne nia peeskimemi maa niar aawimik, ne wiam pirami uuwowa nia suuwimik, ne nia poromi ifan epepiria nia aawimik. Naap nia oniwkin ni kekelka muuta ikaiman. 21 Yo emina ururep feenap maiyem, pepek i kekanowa mareweya sira naap-ko me nia onamik-yon.

Aria yo aakisa yena momor kema-ko maekam naep. Wi mua wiam maemi wiena wiam pirimik-i? Aa eliw, yos pun naap oninen.
22 Wi nain i Iibru-ke, naap wiam maimik-i? Yos pun Iibru-ke. Wi Isrel-ki? Aa, yos pun Isrel-ke. Wi naap maimik, Abraham yiena nomokow fiira-ke, naap-i? Yos pun yena nomokow fiira-ke. 23 Ne wi Krais uuwow mua-ki? Nain yo Krais uuwow mua makena-ke, yos-ke wia nomakem. Aa, yo momorarem-yon aa, naeya naap maem aa! Makena, yo Krais uuwow mua akena-ke. Moram yo uuwow manek akena uuwami baliwep uuwam-ikem. Wi papako naap-ko me uuwimik, ne sirirowa yo aawem nain wi naap-ko me aawimik. Yo anane koora efa pekam-ikemik. Yo sarua enarowa unowa aremik, nain yo umekam-na nain umekam. 24 Feenap, wi Yuuda efa opap samor akena sarua enaremik nain ikur aremik. Ne sarua enaremik nain ten arow okaiwi-pa erepam naap yiem-ikemik. 25 Ne wi Rom pun naap, sarua enaremik nain arow aremik. Aria wi Yuuda nomon ika enaremik nain kuisow aremik, nain yo me umem. Ne yo aasa-pa samor aawowa arow arem. Feenap, i aasa-pa ikiwem-ikok ifera-ke aasa fo-fookeya i kaalalemik. Ne iir oko ifera-ke aasa yiar fookeya yo uuriw kaalalem-ikemkun kokomarek, ne nainiw epa wiimok.

26 Aria yo uuwowa onami me uurarem-ikem, epa oko oko naap ikiwem-ikem, nain era-pa samor akena aawem-ikem. Feenap, eka luuma-ke efa piwam-ikua. Wi mua samora-ke era-pa efa samo-samorami maa efar aawem-ikemik. Yena opor epaskun wi Yuuda pun efa samoram-ikemik, ne wi owow oko pun sira naapiw efa onam-ikemik. Owow maneka-pa wiar ikem nain efa ifakimu naep onam-ikemik, ne epa asia-pa ikim-ikem nain maera-pa arinen naep keker opam-ikem. Aasa-pa ikiwem-ikok maera-pa arem-ikem. Ne wi wadol mua eena i Krais teeria-ke wiam maimik nain-ke efa samo-samoram-ikemik. 27 Yo uuwow yoowa sira-sira onami mia sanumarep ikok kiiriw uuwam-ikem ne baliwep me inem-ikem. Yo urom kiiya ne eka enow marew yiawem-miem. Iir papako yam ikok inem-ikem. Inow epa ne mia suuwowa maa muutitik mareweya dabela aawem-ikem. 28 Ne yo kamenap ikem nain maa papako me mainen, ikainok. Yo fain kema yame sirirem-ikem, ni sios teeria owow unowa-pa ikeman nain nia kema suuwap kema moke nia ikem. 29 Ni Yeesus Krais teeria mua papako me kekaniman nain nia kemaliyem. Ni pina-pa oro-booniwkin yo manek akena kema samorariyem.

30 Ne yo unuma yame pirinen-na yo sirirowa unowa aawem-ikok kekanowa marewarem-ikem nain maemi yame pirekam. 31 Yiena Maneka Yeesus ona Wiawi Mua Maneka eena i anane o unuma pirimik nain-ke efa amisarek. Yo opor unowa nia maakem nain me wadolaliyem. 32 Yo iiriw Damaskus-pa ikemkun owow saria maneka Aretas, ona anim onoma woos mua-ke ami mua wia sesekeya efa opu naemik. Owow pika omopora-pa luus ekap ikemik. 33 Wi iimaremik-na wia, yo inera-pa efa wuap ifariw pika wuara-pa efa fuurkiwkin oromi baurarem.

Copyright information for `MHL