2 Corinthians 3

Sira enuma nain uuwow mua

Aria i unuma yiam piru naep opor unowa nain nia maakimik-i? Weetak. I baliwep yia amisareman. Wi mua papako feenap onimik, mua oko yo mua eliwa efa nauk naep parosifa onaiya niar ikiwimik. E, owow oko ikiwu naep ni nia maakiwkin parosifa naap nain wia siisimomiwkin feekiya ikiwimik. Nain i parosifa naap nain me maimik, weetak akena. Ni Krais teeria-pa ikok sira eliwa oniman nain nia urufap i uuwowa ariman yiar urufap maimik, “Wi mua eliwa.” Ni Krais parosifa-ke nia naiyem. Os-ke siisimep i uuwow mua wapena-pa yiar wuak. Parosifa nain me suuna-pa siisimok, ne pun me iiriw Moses opora iwemi nomona-pa siisimok naap, weetak. Feenap, Mua Maneka ona Ewar Eliwa eena anane ikaiya nain sesekeya ni niamiya ikok ona opora nain anane kema-pa niar wuam-ikaiya.

I eliw naap maimik, moram uuwowa nain Mua Maneka ona yia pepekimok. Ne Krais-ke yia asipami yia kekanoweya i naap uuwimik. I feenap me maimik, yiena kekanowa-pa uuwimik, weetak. Maa unowa eena i onimik nain Mua Maneka-ke yia kekanoweya uuwam-ikaimik. Iiriw sira eena Moses wuomakemi siisimok nain umowa-pa yia wuiya. Aria Mua Maneka ona sira enuma wuap koonowak nain uuwowa yieya uuwam-miawimik. Sira enuma opora nain me sira eena iiriw siisimemik nain saarik, weetak, sira oko-ke. Ne opora nain Ewar Eliwa-ke mua kema eliwa wieya wi anane eliwa ikaikuan.

Mua Maneka opor enuma maep koonowak nain eliw akena-ke

Ne sira eena umowa-pa yia wuiya nain Mua Maneka-ke nomona-pa siisimep Moses iwok. Iir nain parina onaiya imenareya Moses miira iiwawun parina kuisow arek. Parina nain naap epa me ekowa lawiliw geenar-ikiwemi mesenalek. Wi Isrel o miira wiar urufam-ikowa nain me pepek. Nain Moses sira awona pekapok nain-ke. Aria sira enuma eena Ewar Eliwa kema-pa yiar wuiya nain ona parin maneka ne kekanowa onaiya ikua, sira awona nain iiwawun nomak-afurak. Sira awona nain i mua pina onamkun umowa-pa yia wuiya, nain pun parina onaiya ikua. Nain sira enuma eena Mua Maneka parin maneka onaiya ekapiya nain i mua yia kakeneya Mua Maneka-ke mua kaken eliwa yia maiya. Naapeya nain-ke nomak-afurak. 10 Makena iiriw Mua Maneka-ke Moses sira maakep nomona-pa siisimok. Nain maa eliwiya parin onaiya ikua. Ne aakisa sira enuma wuak fain-ke sira awona nain iiwawun nomak-afurap ifemakek. 11 Ne aria sira awona eliwa nain eena lawiliw ikok uuwowa weeserek, nain pun parin onaiya ikua. Nain aakisa sira enuma eena anane maneka ikowa fain-ke parin manek akena ne eliw akena, ne oko nain nomak-afurak.

12 Naapeya i nain kema kemaiw ikok, ikoka makena urufiyen naimik. Naapeya i kekanep ariman aakunimik. 13 Ne i me Moses saarik ikemik. O miira parina nain geenaremi mesenalem-ikua nain wi Isrel miira me efa urufuk naep konimiw wame wakesimok. 14 Makena, wi kema me pukemik. Ne aakisa pun naap, Moses sira wuomakek nain opora wia unufomiwkin wi kemena tepak nain me aawemik. Konima nain-ke woosa wia wakesimowa saarik aremi kema wia irinak. Nain wi Krais opora wiar miimap opikuan-na Mua Maneka-ke konima saarik nain wiar iirareya wi kema farerep opora aawikuan. 15 Nainiw maiyem, Moses iiriw sira wuomakek nain aakisa wia unufomiwkin miimimik nain konimiw woosa wia wakesimowa saarik areya wi kemena me aawimik. 16 Ne wi mua eena kema kirep yiena Maneka opora wiar opikuan-na kema wia fookomaya kema pukep opor kemena amisarikuan. 17 Ne yiena Maneka Ewar Eliwa-ke. Ewar Eliwa-ke i yiamiya ikaeya i kema pukemik. Naeya sira awona nain-ke me yia opap ikua. 18 Ne i woosa parinarep ikemkun yiena Maneka sira eliwa i kema-pa yiar ikaeya sira wiar ookimik. O Ewar Eliwa-ke, ona yiamiya ikok ona kema yiem-ikaeya sira wiar ook-ikiwem-ikemkun ona sira eliw akena nain i mia-pa ariman arinon.

Copyright information for `MHL