2 Corinthians 4

Pol ame uuwowa baliwep uuwamik

Ne Mua Maneka ona yia kemalep uuwowa fain yieya i uuwowa kema me pinarimik. Sira eena kokot onap emina ururimik nain me ookimik. I opora maemi me kiri-kiripimik. Mua Maneka opora maemi me kapewimik. Ne i feenap, Mua Maneka mokoka-pa opora makeniw maimik. Naeya yiar furewap mauk, wi uuwowa kakeniw onimik, naap mauk naep. I Yeesus Krais opor eliwa wia maakemkun wi mesenalow teeria-pa ikemik nain me yia miimimik. Miiw inasina-ke kema wia momoreya wi kema me pukemik, naapeya Krais opora me wiar opimik. I Krais-pa Mua Maneka urufimik. Ne Krais parina ne sira melin akena nain ona opora-pa ariman arek. Nain wi miimap me parinaremik. Moram me yiena yiam maemi maimik, weetak, Yeesus Krais naep maimik. O yiena Maneka-ke, ne i o muuta nain ni uuwow mua niar ikemik. Moram Mua Maneka eena iiriw epa kokoma ikaeya parina imenarinok naek, nain-ke kema yiar parinaroweya i Krais urufap Mua Maneka unum maneka ne parin maneka wiar amisaremik.

Ne i Krais uuwow mua miiwa-pa ikemik fain kekanowa marew. Nain Mua Maneka-ke uuwowa ele-eliwa nain mia-pa yia wuomak. Naapeya mua unowa yia urufap amisarikuan, kekanow maneka nain Mua Maneka wiarik. Wi kema-pa wia wuap wia asipam-ikaiya, naap yia maikuan. Makena, i sirirowa sira-sira yiar imenarem-ikaeya samor aawimik, nain i iiwawun me oro-boonimik. I kema unu-unowa arimik, nain i kekanep ikemik. Makena, enankowa yia erowawam-ikaimik, nain Mua Maneka me yia piipuiya, naap yia asipam-ikaiya. Yia arufami yia anu-fienam-miemik, nain me iiwawun samoraremik. 10 Iiriw Yeesus ifakimiwkin umok, ne aakisa yia ifakimowa naem-ikaimik. O umep iikirap ona kekanowa nain-ke yia asipam-ikaeya ariman yiar urufimik. 11 Moram i anane Yeesus uuwowa muuta nain sirirowa yiimik. Umowa nain me umemik. Naeya wi naap yia urufap amisaremik, makena i mia kekanowa weetak, nain Yeesus umep iikirak kekanowa nain-ke yia uumam-ikaiya. 12 Naapeya i feenap maimik, i umowa yia suuwimik, nain is-ke uuwami nia asipamkun ni Yeesus kekanowa nain aawep anane eliw ikowen.

13 I naap kekanimik, nain Mua Maneka opora ara oko feenap ikua, mua oko-ke feenap maek, “Yo Mua Maneka opora makena-ke naep opora wia maakiyem.” Naapeya is pun naap, Mua Maneka makena-ke naep wia maakem-miawimik. 14 Moram i amisaremik, Mua Maneka eena yiena Maneka Yeesus iikirowak nain ikoka i unowiya yia iikiroweya o wameiya ikaiyen. Ne yia aawep ona kemena-pa yia fiiriminon. 15 Ni nia asipow muuta nain sirirowa aawem-ikaimik. Ne mua unowa Mua Maneka yia kemaliya opora nain miimap wiar opiwkin teeria naap manekar-ikim-ikainon. Naeya mua unow akena Mua Maneka sira eliwa naakemi unuma wiar piram-ikaikuan.

16 Ne naapeya i uuwowa kema me pinarimik. Makena i mia kekanowa yiar weeserem-ikaeya umem-ikaiyen, nain yiena kukusa-ke anane naap enumarem-ikaimik. 17 I sirirowa-na aawimik, nain epa maala me ikainon, naeya nain oram-ke naiyem. Ne i sirirowa aawimik neeke wiimar owow iinan parin maneka-pa ikok unum maneka aawiyen. Nain maa maneka-ke naiyem, maa unowa iiwawun nomak-afurak. 18 Naapeya i maa mokoka-pa urufimik nain me senam kema wuimik. Maa nain anane me ikainon. I maa eena Mua Maneka yia wuap-puomak nain aakisa mokoka-pa me urufimik nain-ke makena, anane ikainon. Naapeya i maa nain kemaiw ikaimik.

Copyright information for `MHL