2 Corinthians 6

I Mua Maneka wameiya uuwam-ikaimik. Ona feenap maek,

“Yo nia aawep nia saliwowa nain epa yena pepekimep-puam. Ne epa pepek neeke nia miimap nia asipam.”
(Aisaiya 49.8)

Naeya nia maakiyem, i yia aawep yia saliwow epa nain aakisa fanek. Naapeya ni kema kireka nia naimik. Oko Mua Maneka nia aawowa maek nain maa oorpowa saarik arinon.

Pol sirirowa unowa aawok, nain baliwep ikua

Oko i pina oniyen-na yia tuunami Yeesus opora wiar opowa nain me opikuan. Naapeya i feenap ikemik, i Mua Maneka uuwow mua kakeniw ikaimik. Ne i kekelka ikok pina sira-sira yiar imenariya nain naap akuawimik, sirirowa maneka aawemi maa anima-pa arimik. Yia arufami koora yia pekimik, mua teeria maneka iiwua purupemi yia mika-fienami yia samo-samorimik. I senam akena uuwimik nain baliwep me inimik, urom kiiya naap ikaimik. Nain i kema melin ikok sira eliwa onami opor makena aakunimik, kema pukep aakunimik, saria wiemi wia saliwimik, Ewar Eliwa kekanowa-pa wiar ikok, makena i mua oko wia kookalimik. Opora makeniw maemi Mua Maneka kekanowa-pa uuwowa faimik. I sira kakeniw ikaimik nain irakow maa saarik wapena oko-okaiwi opap wadol opora wiar fienami ifemakimik. Wi papako unuma yia pirimik ne papako-ke yia firekimik. Papako murarow opora yia onimik, ne papako mua eliwa yia naimik. I opor makena maimik, nain wi papako-ke i wadolalimik yia naimik. Makena, i mua meta marew, nain Mua Maneka-ke baliwep yia amisarek. I umowa saarik ikemik, nain weetak, mokok enuma ikemik. Samor akena yia arufiwkin i samor aawemik, nain me umemik. 10 I kema samorarimik nain me kema suuwimik, ne kemelowiw ikaimik. I mua oorpowa ikemik, nain i Yeesus Krais opora wia maakemkun maa eliwa unowa aawowa saarik furewimik. I maa marew ikaimik, nain Yeesus Krais muuta nain maa ele-eliwa yiar ikua naimik.

11 Ni Korin, i opora kema-pa yiar ikua nain iiwawun kopiemik. Ne pun i manek akena nia kookalimik nain fan nia ofakowamik. 12 I nia kookalowa kema manekiw ikaimik, ne ni wia, kema unu-unowa wuam-ikok me yia kookaliman. 13 Nis-na yena muuka wiipa-ke nia naiyem. Naapeya nia maakiyem, nis pun i nia kookalimik naap, maneka yia kookaleka.

Wi miiw inasina sira me wiokuk naep wia maakek

14 Ne wi Mua Maneka opora me wiar opimik nain me wia ememiriareka. Wi opora fienimik nain-ke, aria ni mua opor makena ookiman nain, eliw wia ememiriarowen-i? Ne parina ikaiya nain epa kokoma-ko ikaiya-i? Weetak. 15 Aria Krais Satan ikos kema epaskun ikemik-i? Neemi ni eena Yeesus Krais opora wiar opiman nain ne wi opora me opimik nain kema epaskun ikaiman-i? Ni kema suuweka. 16 Mua Maneka ona feenap yia maek,

“Yena teeria wiamiya ikok wiamiya soomarem-miawinen. Wi yiena Mua Maneka-ke naap efa mauk. Ne wi yena teeria efar ikaikuan.”
(Wok Pris 26.11-12)

Naapeya i unowiya Mua Maneka anane ikaiya nain-ke yiamiya ikaeya i o tempel koora saarik wiar ikemik, naap yiam maiyen. Naeya i eena Mua Maneka tempel koora nain miiw inasina maa onaiya eliw epaskun ikaiyen-i? Me pepek akena.
17 Ne Mua Maneka-ke nainiw maek,

“Ni yena teeria, wi eena opora me efar opap sira samo-samora onimik nain wia piipuap wenup ikeka. Ne wi yiena inasina-ke naemi sira-sira onimik nain kemena me wiar ekeka. Opora yookowen-na nia aawep yena teeria-pa nia wuinen.
(Aisaiya 52.11)

18 Ne yo ni Niawi-ke nia urufam-ikainen, ne ni yena muuka wiipa efar ikowen.”
(2 Samuel 7.14)

Mua Maneka kekanowa akena nain-ke naap maek.

Copyright information for `MHL