2 Peter 1

Aria parosifa fain yo Saimon Pita eena Yeesus Krais uuwow mua ne aposel nain-ke ni teeria fain nia siisimomiyem. Ni feenap, Yeesus Krais yiena Mua Maneka-ke, ne ni pina-pa ikaiwkin ona nia aaweya Mua Maneka mokoka-pa pina marew ikeman. Naeya i teeria epaskun opor eliw akena nain opimik. Ni feenap nia maiyem, ni Mua Maneka ne yiena Maneka Yeesus Krais amisar-ikim-ikaiman neeke Mua Maneka nia kemaliya nain niam furewami kema sonom eliwa manek akena aawowen.

Mua Maneka ona yia pepekimok

Ona kekanowa-pa kema yiemi yia pepek erowaweya i anane o wameiya eliwa ikok ekima maneka opami eliwa ikaiyen. Mua Maneka yena kaken eliwa ne yena unum maneka ikem nain nis pun naap ikeka naep yia maiya. I o naap amisaremik nan kekanowa aawemik. Ona naap onami maa ele-eliwa yia onomowa maep koonowak nain makena yia opomak. Neeke ona sira dubil manekiw ikaiya nain nis pun naap ikowen. Naeya mia kookalowa sira-sira eena nia samoriya nain eliw ao-wuepami miiw sira me ookowen.

Ni Yeesus Krais opora baliwep opu naep-na akimowa yaawerow marew opora opiman nain sira unowa fainiw ane-kurumeka, sira eliwa-pa ikowa, Mua Maneka baliwep amisarowa, mia niam kaikap mia kookalowa me ookowa, kekanep kekelka ikowa, Mua Maneka ekima maneka opami eliwa ikowa, niena teeria yiamun epia-ke niam naemi niam kookalem-ikowa ne mua oko pun wia kookalemi wia saliwam-ikowa. Ni yiena Maneka Yeesus Krais baliwep amisareman. Neemi sira unowa nain ookam-ikowen-na sira nain-ke kema-pa niar taanem-ikaeya me asipap-puowen, anane makenarem-ikainon. Naeya ni baliwep o uuwomowen. Ne mua sira unowa nain me ookiya nain mokok opa saarik, maa me urufiya. Ne fain kema irinarek, yo pina onomakem nain iiriw efar iirarek, naap me maiya.

10 Naapeya emar unowik, ni Mua Maneka nia faremi nia nanikak nain maken akena arinok naep kema iikirap kekanep naap onam-ikeka. Ne ni naap ookam-ikowen-na me wakiowen, weetak akena. 11 Naemi yiena Maneka Yeesus Krais eena yia aawok nain ona manek akena nia kookalep anane ikaiya kemena neeke nia wuinon. Naeya ni anane eliw ikowen.

Mua Maneka opora-ke yia parinarowiya

12 Makena, ni maa unowa nain iiriw amisareman, ne opor makena kekanowa opam-ikeman, nain ni eliw ikeka naep yo anane sira nain maemi nia kemapawam-ikainen. 13 Yiena Maneka Yeesus Krais baliwep kema yiek, yo miiwa fain piipuowa epa efar weeserikua. Naapeya yo aakisa mokok enuma ikem fainiw eliw ikowa opora nain nia enumam-ikainen. 15 Yo iiwawow marew naap nia maakem-ikainen. Naeya ikoka yo umemkun ni maa nia maakomakem nain kema-pa ikowen.

16 Aria yiena Maneka Yeesus Krais ona kekanowa ne nainiw ekapowa nia maakemik nain me yiena mua kema-pa siisiarep nanar imenap nia ookomamik. Weetak, i yiena mokok onaiya kekanowa ne parina wiar urufamik. 17 Iir nain i ema nan ikemkun ona Wiawi Mua Maneka-ke unum maneka ne kekanowa iwok. Feenap, Mua Maneka parin maneka-ke imenaremi iwakara-ke o maemi feenap maek, “Fain yena Muuka, kema muneka-ke, yo manek akena kookaliyem nain-ke,” naap maek. 18 Maa urufap miimamik nain i ema-pa nan ikok yiena kakeniw mua iwakara iinan-pa oreya miimamik. Maa naap imenareya epa nain ema eliwa naimik.

19 Ne wi Mua Maneka profet pun opora kuisow nain maem-ikemik. Ne yiena kakeniw maa urufamik nain wi opora nain makena wiar arek. Naapeya ni opora nain baliwep wiar miimam-ikowa-ke eliw. Moram opora nain parina saarik, epa kokoma-pa parina iwiya naap. Ni opora nain anane maneka kema suuwam-ikeka. Naap kema suuwam-ikaiwkin epa wiimow mokoma nain-ke imenaremi kema iiwawun nia parinarowinon. 20 Ni maa fain manek akena amisareka, Mua Maneka profet opora maemi siisimemik nain me wiena kema-pa onamik, weetak. 21 Moram opora naap nain mua kema-pa-ko me imenariya. Ewar Eliwa-ke Mua Maneka opora kema wiem-ikaeya wiar maemik.

Copyright information for `MHL