2 Peter 2

Wi somek mua samora

Iiriw i Isrel teeria mua papako wia peeskimemi i profet-ke wiam maemi wadolalem-miawemik. Ne ikoka pun sira naapiw, wi mua papako i somek mua-ke naap maemi opora nia maakikuan. Wi opor makena saarik aakunemi nia kiri-kiripami wadol era nia pikiwemi nia oro-boonowikuan. Yiena Maneka eena wia sesenarep aawok nain wi yiena Maneka-ke me naemi mikikira iwimik. Naeya wiena sira onimik nain-ke ikoka wiar kireya oram samor aawep-puikuan. Ne mua unowa wi wiokami mia kookalowa sira samo-samora onikuan. Aria neeke wi sisin mua era makena nain yiar poraikuan. Wi somek mua nain maamuma niar aawow muuta nain wiena wadol nanar imenap nia maakikuan. Wi naap onimik nain kirowa wiar ikua, Mua Maneka wia samorowa nain wiena wiam ekerap-puimik. Ona epa kerereya oram wia samorap-puinon.

Ni Mua Maneka sira onam-ikua nain kema suuwiman-i? Feenap, iiriw ekera ensel papako sira samora onamik nain os-ke mokokiw me ikua, weetak. Wia samorami epa kokom tenowa-pa wia wuak. Wi nan ikok wia samorowa epa nain arewap ikemik. Ne iiriw ekera Noa ikowa-pa wi emeria mua Mua Maneka opora mikikira iwemi pina samor akena onam-ikemik nain mokokiw me ikua, weetak. Eka luuma maneka sesekami wia welawak. Noa mua kakeniw ikua, ne Mua Maneka opora wia maakem-ikua. Naapeya Mua Maneka-ke ona teeria ikur okaiwi-pa erup ne ona me wia samorak. Aria iir oko, owowa erup, Sodom ne Gomora, pina wia kiripomami mukuna sesekeya awep iiwawun saakiarek. Wi emina kekanimik nain naap urufap kema aawep maikuan, is pun sira naap yia oninon, naap maikuan. Iir nain Lot ona teeria onaiya wia aawep pikiwep-puap owowa erup nain iiwawun samorak. Moram Lot waisow mua eliwa ne kakeniw ikua. Owowa nain wiamiya ikok sira samora onam-ikemik nain wiar urufap kema-pa sirirem-ikua. O mua eliwa nain wi wiamiya ikok wi sira samora nain anane wiar urufap ne miimap kema iiwawun samorarem-ikua. Aria Mua Maneka sira naap onam-ikua. Naapeya i feenap amisaremik, aakisa wi mua kakeniw ikemik nain akimowa-ko wiar imenarinon-na ona wia asipeya eliw ao-wuepikuan. Ne wi sira samora onimik nain wia mekawowa naep wia kaikap epa neeke wia kiripomami wia samorinon. 10 Wi mua samora ikoka samor aawikuan, nain wi somek mua nain-ke wiisak, samor akena aawikuan. Wiena mia kookalowa ookami sira samora onimik nain ne wi Mua Maneka opora fienimik nain.

Wi mua nain wiena kookalowa-pa sira-sira onami unuma wiam pirimik. Naap onami wi iinan ensel kekanowa akena nain wia keker opow marew wia firekimik.
11 Ne wi ensel Mua Maneka-ke kekanowa wieya kekanowa onaiya ikemik. Eenapeya wi miiw mua kekanowa wiar nomakemik. Nain wi ensel papako Mua Maneka mokoka-pa wi ensel kekanowa nain pina ariman wiar wuami me wia firekimik. 12 Ne wi somek mua nain-ke weetak, kekanowa me wiar amisarowa wia firekap-puimik. Wi nain maa eneka eena kema marewa nain saarik. Wi mua naap nain, wiena mia kookalowa muutiw ookimik. Naapeya ikoka samor aawikuan, maa eneka asia eena kanuep opap ifakimimik naap.

13 Wiena sira samora nain-ke kiremi wia samorinon. Wi sira feenap onimik. Mia kookalowa ookami amirik maneka pun mia kookalowa sira-sira ookami palanow manekiw ikaimik, nain maa eliwa-ke naimik. Wiena sira nain maa tumina saarik ikaiya. Ne aria ni kema kuisow ikok niam fiirimep maa enimiman nain wis pun niamiya maa enimimik. Nain wi sira samo-samora onimik nain-ke, naapeya ni maa enowa nain niar tumina arowimik. 14 Wi emeria mokoka wia kuimik ne uruw mia me kaikimik, pina anane maneka onimik. Naap onami wi mua kema garia nain pina onowa wia mufem-miawimik. Ne wi maamuma, maa muutitik kookalow manekiw ikowa nain wiam paayap anane naap onimik. Wi teeria nain Mua Maneka yoowa wiowa nain iiriw maep-puak. 15 Wi era makena iiriw piipuamik. Ne Beor muuka Baalam sira onak nain era wiar ookimik. Mua nain maamuma aawow muuta nain sira samora onekam naep ikiwok.
2.15Owow oko saria wi Isrel samor aawuk naep Baalam sesenareya wi Isrel opor samora wia onowa ikiwok. Ikiwem-ikok ona donki-ke ensel oko urufap ikiwowa miatinep kekanep iimarek. Ne ensel nain donki opaimika-pa Baalam opora maakek. Nanar nain Namba 22.4-35-pa eliw urufowen.
16 Nain onowa ikiwem-ikaeya ona donki-ke mua saarik aakunemi sira samora nain ariman maakemi amukarek. Maa eneka-ko me aakunimik, nain mua saarik maakemi o kema pukow marew sira samora onowa ikiwok nain era wiar puukak.

17 Aria wi somek mua nain wi eka arona iiriw saanarek naap. Ne oko pun feenap saarik, ipia kokoma teniya, nain ewar asia-ke wuunoweya ipia me oraiya. Wi nain Mua Maneka epa iiriw wia wuap-puomak, epa kokom akena nain. 18 Mua papako sira samora teeria-pa wiar ikok aakisa fan wia piipuap Yeesus Krais ookimik. Ne wi mua samora nain-ke mia kookalowa sira manekiw ookuk naep opor maken marewa nain aakunemi piik irami kema wia mikami wia wakiowawimik. 19 Feenap wia maakimik, “Ni i sira yiokowen-na maa unowa eliw onowen, opor marew ikowen,” naap maimik. Nain wi wiena pina onam-ikaimik nain-ke iiriw wia kaikap ikua. Moram sira naap ikua, no maa mauwa kema manekiw ikok onin nain maa nain nena iimarow mua saarik, nain-ke kema nefa mikeya pina onam-ikainan. 20 Ne wi mua yiena Maneka Yeesus Krais eena yia aawok nain opora wiar opap miiw sira onowa miatinimik. Nain wi teeria nain-ke afila wuomiwkin wiokap-na samor akena aawikuan. Wi iiriw Yeesus Krais me amisarowa ikemik nain pun samor ikemik, nain ikoka wi iiwawun samorarikuan. 21 Moram wi mua naap nain Yeesus Krais opor makena me wia maakiwkin amisarep ikekamik-na eliw-yon. Nain wi amisarep Yeesus Krais ookam-ikok piipuap ona sira wia maakek nain mikikira iwemik. Naapeya wiisak, wi iiwawun samorarikuan. 22 Naapeya Mua Maneka opora oko eena feenap maek nain makena,

“Siowa eena ookakimep-puap ona nainiw eniminon.”
(Gutpela Sindaun 26.11)

Ne opora oko feenap ikua,

“Waaya eena iiriw yasuwamik nain ikoka nainiw ikiwep sipa yakinon.”
Copyright information for `MHL