2 Thessalonians 3

I yia kema suuwap Mua Maneka farem-ikeka wia naek

Aria maa oko feenap, i yia kema suuwap yiena Maneka anane farem-ikeka. Naeya i o opora eena wia maakimik nain ewur karuemi manekarinok, ne mua unowa opora nain eliw akena-ke naep opuk, ni iiriw onaman naap. Nain me mua unowiya Yeesus Krais opora wiar opimik. Naapeya ni Mua Maneka faremi nokarem-ikeka, naeya wi mua samora eena yia samoru naep onimik nain os-ke umua-pa pika yia opomaya samor me aawiyen.

Yiena Maneka makena-ke, yia asipowa maiya nain naap oninon. Ona nia kekanowami pika nia warikeya Satan nia samorekam naep oniya nain, ni me samor aawowen. Ne i feenap nia maimik, makena, yiena Maneka-ke nia kekanowam-ikaeya i opora nia maakemik nain aakisa yiar ookam-ikaiman. Ne pun naap ookam-ikowen.

Naapeya i Mua Maneka faremi feenap nia naimik, yiena Maneka-ke kema eliwa-pa nia pikiweya Mua Maneka yia kookaliya nain baliwep wiar furewowen. Ne Krais nia kekanowam-ikaeya naap ikowen.

Ni kekanep uuweka, me lebumareka

Aria emar unowik, yiena Maneka Yeesus Krais unuma-pa opor kekanowa fain niimik. Feenap, i opora nia maakemik nain ni teeria mua papako opora yiar ookowa lebumarep oram maneka yiawimik. Wi nain wiamiya me ikeka. Moram i iiriw ni niamiya ikemik nain me lebumarem-ikemik. Neeke sira yiar urufap maeman, “I sira naap nain wiokowa-ke,” naeman. I mua oko maa enowa oram-ko me wiar aawem-ikemik, weetak. I wiar sesenarem-ikemik. I mia me nia teeku naep anane amirika ne uura uuwowa erup-erup uuwam-ikemik. I uurarowa marew, kerew akena uuwamik. Nain me maa enowa oram niar aawowa me pepek pun yiena uuwam-ikemik, weetak. I eliw nia maakemkun enowa yia urufam-ikekaman, nain i naap me onamik. Moram nis pun i sira yiokeka naep naap onamik. 10 Ne pun i iiriw ni niamiya ikok feenap nia maakem-ikemik, “Mua eena uuwowa miatinimik nain maa orawin me wienakeka.”

11 Nain i feenap nia miimamik, ni teeria mua papako wiena maa kakeniw me uuwowa wiena oram paapar-yiawimik. 12 Naapeya aakisa yiena Maneka Yeesus Krais unuma-pa wi mua naap nain opor kekanowa wia maakimik, wi baliwep ikok wiena kakeniw mauwap enowa imenam-ikauk. 13 Ne ni papako sira eliwa onam-ikaiman nain naap onam-ikeka, me lebumareka.

14 I parosifa nia sesekomimik fain ni teeria mua-ko opora me yiar miiminon-na mokokiw me ikeka. Feenap oneka, wameiya me wiar areka. Ni naap oniwkin emina ururinok. 15 Nain me iiwawun iirareka, weetak, os pun yiena teeria-ke naep baliwami ariman maakeka.

16 Aria i feenap nia naimik, yiena Maneka eena kema eliwa yiiya nain nia sonomaya maa mauwa niar imenariya nain ni kema sonom eliwiw ikowen, anane maneka. Yiena Maneka ni niamiya ikainok naimik.

17 Aria opor ara fain yo Pol-ke yena kakeniw wapena-pa ni eliw ikeka nia naemi siisimem. Yo parosifa unowa siisimiyem nain yena wapen siisia efar ikomakek, nain yo efa ilenowa-ke. 18 Aria yo feenap nia naiyem, yiena Maneka Yeesus Krais ni nia kemalep nia asipam-ikainok.

Copyright information for `MHL