2 Timothy 2

Yeesus Krais irakow mua eliwa wiar ikowa

Aria muuka, no Yeesus Krais yia kemaliya nain kema suuwap kekanep ike. Mua unowa mokok epa-pa opora maem-ikemkun efar miimam-ikon nain efar aawon. Naeya wi mua eena Mua Maneka opor uuwowa maken akena uuwimik nain opora kakeniw naap wia maakem-ike. Ne wis pun mua oko wia maakowa baliwep fauk.

No Yeesus Krais irakow mua eliwa saarik sirirowa akuawem-ike, i aawem-ikaimik naap. Feenap saarik, irakow mua yena woos mua uuwowa efar urufap efa kemelinok naep uuwowa oko oko-pa me ariya, weetak. Irakow uuwowa-pariw ikaiya. Aria mua eena wiam akimami karuimik nain oram me nomakimik, karuow sira baliwep ookap karuowa nomakep unum maneka aawimik. Ne manin uuwowa pun sira naapiw, mua kerew uuwiya nain o kiikir enowa perekinon. Mua Maneka ona kema nieya kema pukep maa unowa amisarinan, naapeya yo opora eena maem fain kema suuwe.

No Yeesus Krais kema suuwam-ike. O Dewit nembesir-ke, umep iikirak. O opor eliwa anane wia maakem-miawiyem nain naap ikua. Yo opor eliwa nain wia maakem-miawem nain sirirowa yiemi mua samora saarik seniw efa kaikiwkin ikem. Nain Mua Maneka opora wiar kaikowa me pepek. 10 Wi mua eena Mua Maneka ona wia nanikap wia aawowa maek nain wi Yeesus Krais opora wiar opiwkin wia aawinon. Ne o anane mia dubila ne unum maneka ikaeya wis pun naap ikaikuan. Yo nain naep kekanep sirirowa unowa nain naap akuawem-ikaiyem.

11 Aria opora fain makena-ke,

“I o wameiya umemik nain o wameiya eliwa ikaiyen.
12 I kekanep sirirowa akuawiyen-na ikoka o wameiya owow saria arep miiwa fain urufiyen.
Ne i mikikira iwiyen-na os pun naap, mikikira yiinon.
13 Nain i opora wiar opap o piipuiyen-na o naap weetak, ona opora maek nain naap oninon. Moram o wame sailowa me pepek.”

Mua Maneka uuwow mua makena arowa

14 Aria yo opora maiyem fain no anane maneka wi unowiya wia kemapawam-ike. Ne pun Mua Maneka mokok epa-pa opor kekanowa wia maakeya wi opor ara kuisow kuisow nain maemi oporiw me irakem-ikauk. Sira naap nain-ke me yia asipiya, weetak, wi opora miimimik nain wia wakiowawiya. 15 Aria no nena feenap one, Mua Maneka uuwowa efar kookalinok naep kekanep uuwow mua makena ne eliwa ikowa nain kerew akena akime. Naap onami emin ururowa marew opora nain baliwep wia fookominan. 16 Wi Mua Maneka opora me wiar maowa opora sira-sira aakunimik nain wia baurare. Opora sira naap nain-ke mua kema wia mikeya Mua Maneka iiwawun piipuikuan. 17 Opora naap nain ikemika saarik, gelemuta nain ewur akena geewemi manekarep iiwawun peelaliya naap. Imeneus Filetus ikos pun wi opora sira naap nain-ke. 18 Wi pauferami opor makena me aakunimik. Wi feenap maimik, wi umemik nain iiriw iikiramik. Naap maemi mua opor makena ookimik nain kema wia momorimik. 19 Nain, Mua Maneka ona teeria poka kekanowa saarik, iiriw iimarowap-pueya koonep ikua. Poka neeke opora feenap siisimok, “Mua Maneka ona teeria iiriw wia amisarep ikua,” ne opora oko feenap, “Wi feenap maep-na, i yiena Maneka teeria-pa wiar ikemik, naap wiam naimik nain sira samora onowa piipuauk.”

20 Aria feenap, saria maneka koora-pa epira sira-sira ikomakek. Epira rookasep papako enow maneka onami neeke maa enowa wuimik ne papako wiena anane maa enowa wuimik. 21 Ne o mua pina onowa piipuap eliw akena ikainon-na, feenap maiyem, o epira eliwa eena fofa maneka-pa maa enowa wuimik nain saarik. Uuwowa eliw akena oninon. Naemi ikoka ona saria-ke uuwowa ele-eliwa iweya pepek erinon.

22 Aria no takira ikon, mia kookalowa sira-sira nefar imenarem-ikaiya nain mikikira iwe. Ne sira makena ne eliwa ookami kekanep opora opam-ike, mua wia saliwami wia kookalem-ike, ne saria wiowa sira nain kema manekiw ike. Wi teeria eena kema melina ikok Mua Maneka yia asipinok naep farem-ikaimik nain wiamiya naap akena ike. 23 No amisaren, wi amis marew, opora momor imenami aakunimik nain irakowa imenimik, naapeya sira naap nain mikikira iwe. 24 Mua Maneka uuwow mua me riirininok, naap nain-ko me ikua. Mua wia saliwow manekiw ikainok, opor makena suule wia onowa kemaiw ikainok, ne kekelka ikok kekanowa uuwam-ikainok. 25 Mua Maneka-ke wi emina kekanimik nain kema wia kiripeya opor makena wiar amisarikuan-yon. Naap maep o kekelka uuwami woosa wia kakeninok. 26 Naeya wi iiriw eena Satan-ke top-pa wia aaweya kookalowa wiar ookam-ikemik nain woos eliwa aawep kema kirep Mua Maneka teeria wiar oraikuan, naap maep uuwam-ikainok.

Copyright information for `MHL