2 Timothy 4

I Mua Maneka opora ariman wiar wuiyen

Yeesus Krais kiiriw ekapinon, ne miiw maa muutitik os-ke onamiarep urufam-ikainon. Naap ikok yia mekawinon, mua iiriw umemik nain ne mokok enuma ikemik nain pun. Yo nain naep Mua Maneka ne Yeesus Krais mokoka-pa opor kekanowa nefa maakiyem, no opora wia wafuromowa me piipue. Wi opora nefar miimowa kookalikuan-i e weetak-i, oram wia maakem-ike. Ne sira samora oniwkin wia kakankami wia kakene, ne opora wia maakemi kema wiar iikirowam-ike. Anane naap kekelkiya uuwami suule baliwep wiem-ike. Moram wi opor makena me miimowa wiena kookalowiw ookow epa nain ikoka imenarinon. Iir nain ifan afililowa muuta nain kookalep somek mua unowa momor wia aawikuan. Neeke wi opor makena miimowa piipuap nanar oram nain miimowa kookalikuan. Nain no maa kema suuwami baliwep ike. Sirirowa ne pina akuawem-ike. Mua Maneka opora naap wia maakem-ike. Neemi uuwowa no mia-pa wuomek nain baliwep uuwam-ikoma.

Yo miiwa fain fan piipuiyem. Yo sirirowa nain wi Mua Maneka patirowa onu naep wain eka sawikimik nain saarik. Yo karuowa akimam nain welawam, baliwep akena karuep nomakem. Ne kekanep Mua Maneka opora wiar opam. Naapeya aakisa siisia eliwa urufowa nain nan efar ikua. Feenap, yiena Maneka-ke naap efa mainon, no mua kaken eliwa-ke. Maa siisia eliwa nain yiena Maneka eena mua yia mekawiya nain-ke yiinon. Me yo yaisow, wi mua unowa o ekapowa naep kemaiw wiam tuupami arewap ikaimik nain pun.

Opora papako

Yo nefa maakiyem, sira eliwa, no kekanep era akupap ewur akena efar ekape akena. 10 Moram Keresen Galesia ikiwok ne Taitus Dalmesia ikiwok. Ne Demas miiw sira kema manekiw ikok efa piipuap Tesalonaika ikiwok. 11 Luk waisow efamiya ikua. No ekapemi Mak aawep ikos ekapeka, ikoka os-ke uuwowa baliwep efa asipinon. 12 Ne Tikikus iiriw sesekamkun Efesus ikiwok. 13 Aria no ekapemi yena mia suuwowa kuruma aawep feekiya ekape. Nain Troas owowa Karpus koora-pa wiar wuam. Ne buk unowa pun feekiya aawep pekapome. Ne buk papako maa eneka kanima-pa opora siisimemik nain kema me irinare.

14 Ne Alesanda mua eena bras-pa maa sirariya nain-ke yo manek akena efa samorak. Sira efa onak nain ikoka Mua Maneka ona kiripinon. 15 Os-ke i opora maimik nain manek akena yiar poraiya, naapeya nos pun mua nain uru-urufami ike.

16 Efa samorami mokomokoka yo opora-pa efa wuamik nain yo yaisow akena iimarep aakunem, mua kuisow mikikira-pa-ko me efar iimaremik. Wi unowa nain yo efa piipuamik. Aa, naap efa onamik nain Mua Maneka wi pina nain me wia kiripominok wia naiyem. 17 Nain yiena Maneka ona efamiya ikok efa kekanowam-ikua. Naeya yo yena uuwowa silewami wi owow-owow mua nan ikemik nain Yeesus opor eliwa wia maakem. Yo yiena Maneka ona efamiya ikaeya laiyon opaimika-pa me efa wafuramik. 18 Ne ikoka pun ona efa asipami wi iiwua wapena-pa efa aawep owow iinan ona pika neeke efa wuinon. Naeya anane maneka unum maneka wiar fakeram-ikaiyen. Makena.

19 Aria nos-ke Prisila ne Akuila neek wia maake, yo wiam erup nain eliwa ikeka wia naiyem, ne Onesiforus teeria nan ikemik nain pun naap, eliwa ikauk wia naiyem. 20 Erastus Korin-pa nan ikua ne Trofimus napumareya Miletus-pa nan wuam. 21 Aria no ekapowa nain ewar asia saana me kererowa ikaeya ekape. Yubulus, Pudens, Linus, Klodia ne wi Kristen papako wi unowiya no eliwa ike nefa naimik.

22 Yiena Maneka nefamiya ikainok naiyem. Ne ni unowiya Mua Maneka nia saliwami nia asipam-ikainok.

Copyright information for `MHL