Acts 10

Ensel-ke imenarep Konilius opora iwok

Aria mua oko unuma Konilius, o Sisaria-pa ikaiya. O ami mua teeria andet kuisow (100) wia urufam-ikua. Wi ami mua nain wi Rom teeria wia naemik. Mua nain Mua Maneka opora ookam-ikua, ne ona teeria unowa nain pun Mua Maneka opora ookam-ikemik. Ne wi Yuuda maa iiwaremik nain anane wia asipam-ikua, ne Mua Maneka farem-ikua. Iir oko ama arow naap ona mokoka-keriw kirep maa-ko feenap urufak. Mua Maneka ensel-ke ariman akena wiar imenarep farek, “Konilius.” Naap miimap kema tootonep mokakemi nokarek, “Saria, mauwa-ke?” Ne ensel-ke maakek, “No anane Mua Maneka farin nain ne wi mua maa marewa wia asipin nain Mua Maneka-ke sira eliwa nefa naep kiripomekam naep oniya. No ikoka kuisow mua-ko wia sesekeya Yoopa owowa ikiwuk. Neeke mua oko unuma Saimon Pita naimik nain aawep pekapuk. O mua oko maa eneka kanima uuwiya nain koora-pa wiar ikua. Mua nain pun unuma Saimon ne o koora ifer mamaiya-pa ikua.” Ensel opora naap maakep-puap ikiwok. Ikiweya Konilius ona uuwow mua erup ne ami mua kuisow naap wia farek. Ne ami mua nain pun Mua Maneka sira kekanowa opiya. Wi ekapiwkin maa kamenap wiar imenarek nain wia maakemi wia sesekeya Yoopa owowa ikiwemik.

Pita mokoka-keriw kirep maa urufak

Aria wi ikiwem-ikok uurik ona ama gonegon naap Yoopa owowa mamaiya aremik. Ne are nain Pita koor umua ebebiria iinan urupep ikua, Mua Maneka farekam naep. 10 Mua Maneka farem-ikok samor akena wuailep maa-ko eniminen maek. Ne maa enowa onam-ikaiwkin, naap ikok mia oona ururep ikok mokoka-keriw kirep maa feenap urufak. 11 Aapereka iinan maa ipisia-ke pukep maa oko konim maneka saarik nain-ke orok. Konima nain kiira erepam-pa opap piipuiwkin orom-ikowa saarik urufak. 12 Ne konima nain kemena-pa maa eneka sira-sira, ifa sira-sira ne nepa sira-sira nan ikomakek. 13 Naap ikok Pita opor oko naap maeya miimak, “Pita, no iikirap maa eneka nain ifakimep enime.” 14 Ne Pita-ke maek, “Maneka, weetak. Yo maa eneka emi ikua nain me enimiyem.” 15 Ne nainiw maakek, “Maa eneka Mua Maneka-ke emi marew naek nain samora-ke me nae,” naap maakek. 16 Ne maa nain wiar imenarowa arow arep-puap kiiriw iinan urupemi mesenalek.

17 Aria Pita ona maa urufak nain onoma kema suuwam-ikaeya wi mua wiam arow Konilius wia sesekak nain ekapep fuunemik. Saimon koora wiar akup-ekapep koor omopora-pa wiar iimarep ikok wia faremik, “Nee, ni mua unuma Saimon Pita naimik nain fan ikua-i e weetak?” 19 Aria Pita ona maa urufak nain kema suuwam-ikaeya Mua Maneka Ewar-ke maakek, “Miime, mua wiam arow no nefa ikumimik. 20 Naeya no iikirap orop wi wiokap ikiwe. No kema unu-unowa me wue, moram yena wia sesekamkun ekapemik.” 21 Ne aria Pita wiokap orop wia maakek, “Mua ni ikumiman nain yo fanem. Ni moram ekapeman?” 22 Ne maakemik, “Ami woos mua maneka unuma Konilius naimik nain-ke yia sesekak. O mua eliwa ne anane Mua Maneka sira wiar ookiya. Ne wi Yuuda mua unowa o ekima manek akena opimik. Mua Maneka ensel-ke maakeya no opora sesekomeya no nefa aawowa ekapemik. No opora kamenap main nain nefa miimekam naep.” 23 Ne Pita-ke wia aawep koor kemena urupemik. Neeke maa enep inep epa wiimeya uuriw iikirap nainiw wiena owowa ikiwemik. Ne aria Pita wiamiya ikiwok, ne Yoopa owow mua papako Yeesus opora wiar opimik nain pun wi wiokamik.

Pita Konilius koora wiar ikiwok

24 Ne aria ikiwem-ikok era-pa inep uurik ona ikiwemi Sisaria owowa kereremik. Konilius wi wia arewami ona teeria ne ona womar eliwa wia farep wiam fiirimep ikemik. 25 Naap ikaiwkin Pita kererep koor kemena wiar ikiwekam naep oneya Konilius miira puuk-oromi Pita merena wameiya-pa keema muuna mikami maara mikak. 26 Ne aria Pita-ke opap iikirowami maakek, “Iikire. Yos pun mua-ke.” 27 Ne Pita ikos aakun-ikiwemi koor kemena urupemik-na emeria mua unowa iiriw nan taanep ikemik. 28 Ne Pita-ke wia maakek, “Ni niena amisareman, i Yuuda ni owow oko teeria niamiya ikowa nain emi ikua. Nain Mua Maneka-ke sira eliwa efa ofakoweya yo owow oko emeria mua wiamiya ikowa nain emi marew nainen. 29 Naapeya yo opora sesekomiwkin opora me niar fienam. Yo nain kema me suuwiyem naemi fan ekapem. Aria ni moram yo feek ekapowa efa naeman?” 30 Naeya Konilius-ke maakek, “Iirakuma yo maa-ko efar imenarek. Iir nain urera ama arow naap, yo yena koora-pa Mua Maneka farem-ikemkun mua-ko miimow ona-pa efar iimarek, ona mia suuwowa parina kuisow. 31 Ne os-ke efa maakek, ‘Konilius, Mua Maneka no opora iiriw nefar miimak ne nena maa mutumut mua maa marew wia asipam-ikon nain pun nefa urufak. 32 Naapeya no mua wia sesekeya Yoopa ikiwep mua unuma Saimon Pita naimik nain aawep pekapuk. O ona womawa maa eneka kanima saliwiya nain koora-pa wiar ikua. Ne koora nain ifer mamaiya-pa ikua, wi ikiwep neeke urufikuan.’ Mua nain-ke naap efa maakek.

33 Naapeya yo ewur akena mua papako wia sesekamkun no nefa aawowa ikiwemik. No mua sira eliwiya i yiar ekapon. I aakisa unowiya Mua Maneka mokok epa-pa ikemik, ne Mua Maneka opora nefa maakek nain aakuneya nefar miimiyen.”

34 Ne Pita-ke maakek, “Maken akena, yo aakisa kema farerem. Mua Maneka mua unowiya yia kookaliya, mia sira kamenap nain me yia rookasiya. 35 Miiw unowa mua o kema suuwami sira eliwa onimik nain wia kookalow manekiw. 36 Ne i Isrel opora yia sesekomami maek nain feenap, Yeesus Krais miiwa ne iinan maa iiwawun urufiya, ona opor eliwa yia pekapomami pokow eliwa yiiya. 37 Ni niena amisareman, opor maneka Yuudia kame-pa imenarek nain. Feenap, Yon Galili kame-pa opora wia maakemi eka-pa wia yasuwam-ikua. 38 Ne Nasaret mua Yeesus yasuweya uuwowa onoma wuak. Mua Maneka-ke kekanowa ne Ewar Eliwa iweya owow unowa wiar ikiwep emeria mua unowa wia asipam-ikua. Mua Maneka-ke kekanowa iweya wi mua sawur-ke wia anirawap ikemik nain pun wia saliwam-ikua. Ni nain iiriw wiar amisareman.

39 O i Yuudia owow unowa nain ne Yerusalem owowa-pa maa miililina unowa onomakek nain yiena mokoka-pa wiar urufap wiar maimik. Ne mua makena nomokow moke-pa wuami ifakimiwkin umok. 40 Nain Mua Maneka-ke fofa arow-pa iikirowak. Iikiroweya wi mua mokok epa-pa wiar imenarem-ikua. 41 Wi sisin mua-ke o me urufamik, weetak. Mua Maneka eena mua wia pepekimep-puak nain-ke wiena mokoka-pa maa unowiya wiar urufamik. Mua teeria nain i fanemik. O iikirak nain is-ke wameiya maa enem-ikemik. I nain-ke opora nain maimik. 42 Ne ona yia sesekami yia maakek, ‘Ikiwep wia maakem-miaweka, Mua Maneka-ke yo efa pepekimeya mua aakisa ikemik nain ne mua iiriw umemik nain pun nia mekawow mua ikem.’ Naap yia maakemi uuwowa yiek. 43 Wi Mua Maneka profet iiriw maem-ikemik. Wi mua o opora wiar opimik nain unuma unufiwkin Mua Maneka-ke pina wiar iirarinon.” Naap maek.

44 Aria Pita naap aakunem-ikaeya, Mua Maneka Ewar Eliwa-ke wi opora wiar miimam-ikemik nain wiar orok. 45 Naeya wi opora sira onaiya aakunemi Mua Maneka unuma purupemik. Ne wi Yuuda Yeesus opora opamik nain eena Pita wameiya ekapemik nain naap urufap maemik, “Makena, Mua Maneka Ewar Eliwa wi owow oko teeria pun wiar orok aa,” naap maemik. 47 Ne Pita-ke maek, “Wi mua teeria fain eliw wia yasuwiyen, opora marew. Moram Ewar Eliwa wiar orok, iiriw i yiar orok naap.” 48 Neemi wia maakek, “Ni Yeesus unuma-pa nia yasuwinen.” Wi wia yasuwap weesereya Pita maakemik, “No lawiliw i yiamiya ikok, ikoka ikiwe.”

Copyright information for `MHL