Acts 12

Owow saria Erot wi Kristen wia samorak

Aria iir nain owow saria maneka Erot naimik nain-ke wia maakeya wi Kristen teeria papako wia opami wia samoramik. Ne wia maakeya Yon weepe Yems furaiw ifakimemik. Ne wi Yuuda-ke sira nain wiar kookaliwkin Pita pun opap koora-pa wuak. Wi Yuuda emer kekanowa enowa maapora-pa sira nain onamik. Aria Pita opap wi ami mua teeria erepam wapena-pa wiar wuamik. Erot kema naap wuak, ikoka emer kekanowa maapora weesereya Pita aawep emeria mua unowa urufam-ikaiwkin ifakiminen naek. Naeya koora-pa wuap-puap baliwep urufam-ikemik. Ne aria Pita muuta nain wi Kristen teeria unow onaiya Mua Maneka o asipinok naep kekanowa akena farem-ikemik.

Ensel-ke Pita koora-pa porok

Naap onap uura ami mua erup Pita gone wuap inemik, wapena oko-okaiwi seniw kaikamik ne sen miirfa oko-okaiwi ami mua wiam erup nain wapena-pa wiar kaikamik. Ne ami mua papako koor omopora-pa iimarep ikomakemik. Naap ikaiwkin Mua Maneka ensel koor kemena-pa wiar imenarep parin manek akena imenarek. Ne Pita akuwisa-pa arufap ifimami maakek, “Iikirap-pue.” Naap maakem-ikaeya sen erup Pita kaikap-puamik nain onaiw golanek. Ne ensel-ke maakek, “Nena mia suuwowa wuap meren suuwowa suuwe.” Maakeya naap onak. Ne ensel kiiriw maakek, “Nena konima anian nain name baguserap yooke.”

Aria Pita o ookap oromi, wi kamenap ikiwimik nain me amisarek. Ne ensel ookap ikim-ikua nain yo mokoka-keriw kirep maa urufiyem naem-ikua. 10 Aria wiam erup ikiwemi ami mua teeria kemena-pa ikemik nain wia nomakep oromik. Oromi kiiriw ami mua teeria oko wia nomakep oromi omopora maneka-pa fuunemik. Ne omopora maneka nain onaiw teneya epa maneka oromik. Ne ikim-ikok era-pa ensel nain piipuap mesenalek.

11 Aria Pita kema wiar ekapeya maek, “Aakisa yo amisarem, fain makena-ke, Mua Maneka-ke ona ensel sesekeya ekapep efa asipak. Yo Erot wapena-pa efa aawok, ne wi Yuuda sira kamenap efa onowa naep kema wuam-ikemik nain aakisa weetak.” Naap maek. 12 O baliwep kema aawep Yon onak Maria koora wiar ikiwok. Yon unuma oko Mak naimik. Mua unow akena koora nan wiam fiirimep Mua Maneka farem-ikemik. 13 Ne Pita ekapemi koor omopora arufeya uuwow emeria-ke omopora teekowa orok, unuma Rooda. 14 Emeria nain Pita iwakara wiar miimap kemelami omopora me teekowa karuwiw ikiwep wia maakek, “Oi, Pita fanek, owaruma-pa ikua.” 15 Ne wis-ke amukaremi maakemik, “No momoraren-yon.” Amukaremik-na wia, os-keriw sisewarek, “Makena maiyem, os-ke.” Ne wis-ke kekanemi maemik, “Sa, nain o kukusa-ke.” 16 Ne Pita omopora naap arufam-ikaeya wi ikiwep omopora teekamik. Omopora teekamik-na o urufamik, urufap samor akena soranemik. 17 Ne wapeniw wia maakeya wi poporaremik. Ne Mua Maneka ensel koora-pa kamenap aawep porok nain wia maakek. Weesereya wia maakek, “Yo opora nia maakem nain Yems ne wi Kristen teeria wia maakeka.” Naap wia maakep-puami ikiwok.

18 Aria naap ikok epa wiimeya wi ami mua naap urufap soranep kema unu-unowa wuami maemik, “Nee, Pita kamenap arek noma?” 19 Ne Erot-ke Pita akupowa wia maakeya akupamik-na me imenamik. Ne ami mua teeria eena Pita urufam-ikemik nain baliwep wia nokarek-na weetak. Ne wi wia ifakimeka naeya wia ifakimemik. Naap ikok Erot Yuudia piipuap Sisaria ikiwep nan ikua.

Erot wame purupok muuta nain umok

20 Sisaria kame wi Taiya ne wi Saidon mua owow saria Erot kema bagiwirowiwkin wia amukarowiw ikua. Wi maa enowa Erot owowa-pa wiar sesenarem-ikemik. Naapeya wiam fiirimep unowiya o wiar ekapemik, opora umuku naep. Ekapemi mokomokoka mua oko Erot kakaltiya mua nain wiar fuunemik, ikoka os-ke yia uuminok naep. Mua nain unuma Blastus ne wi opora nain umuku naep sisewaremik. 21 Aria Erot fofa pepekimok nan ona owow saria maneka maa bala wuap orop ona esimsa-pa pokap opora wia wafuromak. Ne wi emeria mua naap miimap mukuruna wuami maemik, 22 “Aakunowa nain me mua-ke aakunem-ikaiya, fain Mua Maneka-ke aakunem-ikaiya.” 23 Wi Mua Maneka firekami Erot unuma purupiwkin Mua Maneka ensel-ke o napum maneka iwok. Atua gelemutitik nain-ke mia oposia wiar enimiwkin umok.

24 Iir nain Mua Maneka opora ikiwep owow unowa-pa manekarek.

25 Aria Banabas Sol ikos wiena uuwowa weeser-wuap Yerusalem piipuap kirep Antiok ikiwemik. Ne Yon Mak pun aawep owawiya ikiwemik.

Copyright information for `MHL