Acts 13

Banabas Sol ikos uuwowa wia pepekimep wia sesekamik

Antiok owowa-pa wi Kristen teeria maneka ikemik, mua papako profet-ke, ne papako wi Mua Maneka opora wiowa somek mua-ke. Wi teeria nain Banabas, Simeon, Lusius, Manain ne Sol. Simeon unuma oko Niger, ne Lusius o owowa Sairini ne Manain, o owow saria Erot ikos arimow epaskun-ke. Aria wi unowiya Mua Maneka faru naep maa enowa marew ikok Mua Maneka nokaremik. Naap onam-ikaiwkin Ewar Eliwa-ke kema wiek, “Ni Banabas Sol ikos uuwowa oko wia pepekimeka, yo iiriw wi wiowa naep maep-puam,” naap wia maakek. Aria wi Mua Maneka farep weesereya wapena wiam erup nain ikiwosa-pa wiar wuami kema eliwiw ikiweka wia naakep wia sesekiwkin ikiwemik.

Wiam erup Saiprus owowa wadol mua nain amukaremik

Aria Banabas Sol ikos Mua Maneka Ewar-ke kema wieya Selusia ikiwemik. Yon Mak pun aawep feekiya ikiwemik, uuwowa yia asipinok naep. Aasa aawep Saiprus mot oromi Salamis owowa urupemik. Urupep neeke wi Yuuda mua wiena lotu koora-pa Mua Maneka opora wia maakemik. Nan ikok mot nain saawirinowami owow unowa wiar ikiwep Mua Maneka opora wia maakem-miemik. Ikiwemi Pafos owowa-pa fuunemik. Ne Pafos owowa-pa Yuuda mua oko urufamik, unuma Bayesus. Unuma oko Elimas naimik. O wadolalemi profet-ke wame naek, ne maikua onam-ikua. Ne os pun anim onom maneka nain ikos womar wiam opamik. Anim onom maneka nain unuma Segius Paulus, ne o mua kema suuwow eliwa-ke. Os-ke Banabas Sol ikos wia farek, Mua Maneka opora-ko wiar miimekam naep.

Ne aria Elimas-ke o Yeesus opora wiar miimap me wiar opinok naep wi opora iinan wiar iram-ikua. Ne Mua Maneka Ewar-ke Sol kema iweya Elimas mokoka toonep urufami feenap amukarek, “No Satan muuka-ke, ne no sira makena nain kiripami samora-ke nain. Ne no wadol sira-sira nain anane onin ne Mua Maneka opor makena nain kiiriw wadol opora arowin, no sira nain me piipuinan-i? 11 Naapeya no ikoka kuisow Mua Maneka sira wiar urufinan. No mokoka foma pukep ama parina me urufinan. Naap ikok ikok kiiriw sariarinan.” Naap maakem-ikaeya Elimas mokoka foma pukep momor maneka soomaremi mua-ko wapena-pa efa opap efa piawuk naem-ikua. 12 Ne anim onoma nain sira naap urufap Mua Maneka opora makena-ke naek. Sira nain makena ne opora nain pun makena-ke naemi Mua Maneka opora wiar kakaemi opora wiar opak.

Wiam erup Antiok ne Pisidia-pa mauwamik

13 Aria Pol ame Pafos-pa aasa aawep Pega owowa ikiwemik, Pamfilia kame. Pega owowa-pa fuunep Yon Mak-ke wia piipuap kirep Yerusalem ikiwok. 14 Aria wi Pega owowa-pa neeke mereniw ikiwemi Antiok-pa fuunemik, Pisidia miiwa-pa. Ne nan ikok Sabat fofa-pa wi Yuuda lotu koor kemena wiar ikiwep pokamik. 15 Ne aria wi lotu onami Moses sira wuomakek nain unufamik, ne Mua Maneka opora wi profet siisimemik nain pun unufamik. Weesereya wi lotu koora woos mua-ke Pol Banabas ikos wia maakemik, “Ni kema wia iikirowowa opora-ko niar ikainok-na eliw wia maakowen.”

16 Ne aria Pol iimarep wi poporaruk naep wapena wia onomak. Ne maek, “Yena Isrel emawik, ne ni owow oko teeria pun, Mua Maneka lotu oniman fain yo efa miimeka! 17 Mua Maneka-ke i Isrel iiriw iiriw nembesir ona wia aawep wia urufam-ikua. Ne wi ikiwep Isip owowa-pa purer teeria ikaiwkin teeria manek akena wia imenak. Ona kekanowa-pa teeria manek akena nain wia asipeya Isip owowa piipuamik. 18 Isip owowa piipuap urupemi epa asia saa manekiw nan yiawem-miok emina kekanem-ikemik, nain Mua Maneka-ko me wia samoram-ikua, wia saliwam-ikua. Mokoma ten erepam (40) naap wi epa asia saa manekiw nan ikemik. 19 Wi ikiwep Kenan miiwa-pa wiar fuuniwkin Mua Maneka-ke teeria ikur okaiwi-pa erup naap wia ifakimep weesereya miiwa nan wia wuak. 20 Wi Isip owowa-pa ikemik nain ne piipuap ekapem-ikemik nain iiwawun mokoma andet erepam ne kiiriw mokoma ten ikur (450) naap aawok. Ne ekapemi Kenan miiwa-pa pokamik. Nan ikemik nain o wi owow urufow mua wia pepekim-ikim-ikua nain ikip Samuel-pa weeserek.

21 Ne wi owow saria kookalimik naiwkin Mua Maneka-ke Sol pepekimok. Mua nain Bensamin kerekera, Kis muuka-ke. O mokoma ten erepam naap owow saria ikua. 22 Ne Mua Maneka-ke Sol weeserowap Dewit owow saria wuak. Nain Mua Maneka ona iiriw naap maep-puak,

‘Yo Yesi muuka Dewit baliwep amisarem, ne mua sira naap nain kookaliyem. Moram yo opora yookiya.’
(1 Samuel 13.14)

23 O iiriwiw opora maep koonowak nain Dewit wiimasip teeria-pa naap ikiwemi Yeesus imenarek, eena i Isrel teeria yia aawow mua nain. 24 Yeesus uuwowa onoma me wuowa ikaeya, Yon-ke wi Isrel teeria opora feenap wia maakem-ikua, ‘Ni pina wasirkiwkin yo Mua Maneka unuma-pa nia yasuwinen.’ 25 Ne Yon ona mauwowa welawekam naep onam-ikok feenap wia maakem-ikua, ‘Ni yo mua sira kamenap-ke efa naiman? Yo me ni mua arewap ikaiman nain-ke. Yo mua oko-ke. Ni miimeka, mua nain ikoka murarep ekapinon, yo miimemi o taar karuow mua murarow akena-ke.’ Yon-ke naep maek.

26 Aria yena teeria epaskun, ni Abraham wiimasip teeria ne ni owow unowa mua Mua Maneka opora wiar opiman nain, yo feenap nia maakiyem, Mua Maneka i yia aawow opora nain yia maakiwkin miimamik. 27 I yia aawow mua nain wi Yerusalem ne wiena woos mua onaiya me amisaremik. Ne wi profet opora siisimemik nain wi Sabat fofa-pa wiar unufam-ikaimik, nain kema me suuwam-ikemik. Naeya wi Yeesus i yia aawow mua-ke me naep ifakimemik. Naap onamik nain wi profet opora siisimep-puamik nain makena wiar arowamik. 28 O ifakimowa nain pina-ko me wiar imenamik, nain oram akena Pailat wiar pikiwemi ifakime naakemik. 29 Wi sira onamik nain iiriw wi profet-ke siisimep-puamik nain pepek naap onamik. Naap oniwkin nomokow moke-pa umeya aawep porop nomon ona-pa wuamik. 30 Ne o umep ikaeya Mua Maneka-ke iikirowak. 31 Iikirap iir nain ona teeria mokok epa-pa wiar imenarem-ikua, ona teeria Galili-pa ikok o ookap Yerusalem urupemik nain. Ne wi teeria nain-ke aakisa o opora nain makena-ke naep opora nain maem-miimik.

32 Ne i aakisa ni niar urupemik nain Mua Maneka opor eliwa nia purupomamik. Opora nain Mua Maneka kookalowa iiriw yiena nembesir teeria wia maakep koonowak. Ne aakisa i wi nembesir teeria epa-pa Yeesus iikirowami opora maek nain makena yia opomak. Nain i kae someka-pa Mua Maneka-ke iiriw naap maep-puak,

‘No yena Muuka-ke ne aakisa yena Muuka nefa naiyem.’
(Someka 2.7)

34 Ne Mua Maneka-ke Yeesus umep ikok me peelalinok naep iikirowowa opora feenap maep-puak,

‘Yo no nembesir Dewit opor makena maakep koonowap-puam nain aakisa nis-pa feeke nia opomami nia saliwami nia kekanowinen.’
(Aisaiya 55.3)

Ne nain pun someka ara oko-pa mua oko-ke Mua Maneka maek,

‘No ikoka nena uuwow mua nefa kookal-afuriya nain soopow epa-pa wuap-pueya me peelalinon.’
(Someka 16.10)

36 Opora nain me Dewit naep maek, moram Dewit iiriw Mua Maneka opora ookam-ikok ikok umeya soopamik nain iiwawun peelalek. 37 Ne Mua Maneka mua iikirowak nain mia me peelalek. 38 Naapeya emar unowa, ni baliwep amisareka, Yeesus sira naap oneya pina yiar iirarowa era nan imenarek. Ni nain nia maakimik. Pina yiar iirarow sira nain me Moses sira wuomakek nain ookamkun yiar iirarinon, weetak. Ni Mua Maneka opora wiar opowen-na Yeesus pina eliw niar iirareya pina marew ikowen. 40 Ni maa urufap, oko wi profet-ke maemik nain ni niar imenarinon. Opora feenap,

41 ‘Aria ni emin kekanow teeria, yo sira nia ofakowamkun ni soranemi umep epa samora ikiwowen. Yo maa aakisa onam-ikaiyem nain maa makena-ke me efar naowen. Ne mua oko-ke baliwep nia ookomikuan-na nain pun makena-ke me naowen.’
(Habakuk 1.5)

Mua Maneka-ke naap wia maek.”

42 Aria Pol Banabas ikos lotu koora-pa opora nain wia maakep weesereya ikiwu naep onam-ikaiwkin, wi mua papako-ke wia maakemik, “Sira eliwa, ni Sabat fofa oko-pa nainiw ekapep opora nain kiiriw yia maakeka.” 43 Naap maep-puap pukep ikiwemik. Ne mua papako Pol Banabas ikos wiokamik, wi Yuuda mua ne wi owow oko mua wi Yuuda sira wiar ookam-ikemik nain. Ne wiam erup nain-ke teeria nain Mua Maneka kema suuwami opora wiar ookam-ikauk naep opora wia maakemi kema wia iikirowam-ikemik.

44 Aria Sabat fofa nainiw kerereya emeria mua unow onaiya ekapemik, Mua Maneka opora wiar miimu naep. 45 Ne wi Yuuda woos mua-ke naap wia urufap kema bagiwiramik. Naemi Pol firekami opora wiar samorami fienamik. 46 Ne Pol Banabas ikos keker opowa marew opora wia kiripomami wia maakemik, “Makena, i Mua Maneka opora ni kiikir akena nia maakowa-ke, naap nia maakemik. Ne nis-ke opor makena eliwa fain sisin wuami Mua Maneka teeria-pa wiar ikowa nain niena-ke unumiya me ikaiyen naiman. Naap nain i nia piipuap owow oko teeria wia maakiyen. 47 Moram uuwowa fain ona Mua Maneka-ke yia sesekami naap maek,

‘Yos-ke parina saarik nefa wuamkun no ikiwep owow oko oko teeria parina saarik wia mikeya kema pukikuan. Ne ikoka miiwa unowa fain Mua Maneka-ke wia aaweya ona teeria-pa wiar ikaikuan.’”
(Aisaiya 49.6)

48 Wi naap maiwkin wi owow oko teeria kemelami Mua Maneka opora makena-ke naemik. Ne emeria mua papako opora nain kookalep opora wiar opamik, eena Mua Maneka efamiya ikauk naep wia nanikap-puak teeria nain.

49 Ne Mua Maneka opora manekaremi kame nain owow unowa wiar ikiwok. 50 Ne wi Yuuda mua-ke wi owow urufow mua ne emeria unumiya wi lotu wiamiya arem-ikemik nain, kema wia bagiwirowiwkin wis-ke iikirami Pol Banabas ikos wia iiraremik, owowa feek me yiar ikeka wia naemik. 51 Wia iirariwkin wi owowa nain piipuami meren suuwowa foma tukunemik, sira aawuk, pina wiena wiar ikainok naep. Wi naap onap-puami Aikoniam owowa wiar ikiwemik. 52 Ne wi Antiok teeria Yeesus opora wiar opamik nain Mua Maneka Ewar-ke wia kekanoweya kema eliwiw ikemik.

Copyright information for `MHL