Acts 16

Pol Timoti ikos uuwamik

Aria Pol ikiwep Debe owowa-pa fuunep nan ikok Listra ikiwok. Owowa nan Kristen takir eliwa oko nan ikua, unuma Timoti. Onak wi Yuuda-ke ne Yeesus opora wiar opap Kristen arek. Ne ona wiawi wi Grik-ke. Wi Listra ne Aikoniam Kristen teeria-ke Timoti sira eliwa-ke naemik. Aria Pol-ke o aawep feekiya mauwowa ikiwinen naep mia kanima wiar puukap ona teeria-pa arowak. Moram wi Yuuda unowa nan ikemik nain naap amisaremik, Timoti wiawi wi Grik-ke, wi mia kanima me puukimik. Aria wi owow unowa ikiwemi wi Kristen teeria opora wia maakem-miemik. Iiriw wi aposel ne wi woos mua Yerusalem-pa wiam fiirimep sira wuamik nain wiar ookuk naep wia maakem-miemik. Naeya wi Kristen teeria nain Mua Maneka opora ookowa kema iikiramik. Naapeya wi mua unowa Kristen arem-ikaiwkin teeria maneka imenaremik.

Aria Pol Timoti ikos Mua Maneka Ewar-ke Yeesus opor eliwa Esia miiwa-pa wia maakowa wia kaikak. Naeya wi Frigia ne Galesia kame-pa uuwamik. Aria wi ikiwep Misia miiwa-pa ikok Bitinia miiwa wiar urupu naep oniwkin Yeesus Ewar-ke emi wia wuak. Naapeya wi Misia nomakemi Troas owowa wiar oromik. Troas-pa nan ikok uura Pol mokoka-keriw kirep maa feenap urufak, Masedonia mua-ko iimarep ikok o omawami maakem-ikua, “I Masedonia kame-ko yiar ekapep yia asipe,” naap maek. 10 Pol naap urufak nain yia maakeya i kema aawep maemik, “Mua Maneka-ke neek ikiwep Yeesus opor eliwa wi wia maakeka naep yia sesekiya.” I naap maemi Masedonia ikiwowa era akupamik.

Lidia Mua Maneka opora wiar miimap wiar opak

11 Ne uuriw i Troas-pa aasa aawep leeparep ikiwemi Samotres mot-pa fuunemik. Kokomareya nan inep uuriw leeparep ikiwemi Neapolis-pa fuunemik. 12 Aria aasa piipuap Neapolis owowa wiar urupemik. Ne owowa nain wiar piipuap ikiwemi Filipai owowa-pa fuunemik. Owowa nain maneka, wi Masedonia miiwa owow unowa nomakek, ne iiriw wi Rom mua-ke owowa waremik. Ne i nan ikemik.

13 Nan ikok Sabat fofa kerereya i owow maneka pika wiar piipuap oromi eka pona ikiwemik. Wi Yuuda teeria Mua Maneka faremi neeke wiam fiirimep ikemik-yon naep nan oromik. Orop nan pokap ikok wi emeria papako nan ikemik nain wiamiya aakunemik. 14 Ne emeria oko nan ikua, unuma Lidia, o Taiyataira owow emeria-ke, ne ona bisnis feenap, konim oka onap sesekiya. O Mua Maneka ookiya. Aria Mua Maneka-ke kema iweya o Pol opora wia maakek nain baliwep akena kema-pa wuam-ikua. 15 Naap iki-ikok ona teeria unow onaiya kema kiriwkin wia yasuwamik. Ne os-ke yia maakek, “Yo yiena Maneka opora baliwep wiar ookiya, naap efa naep-nana, sira eliwa ni ekapep yo koor maneka-pa efar inem-ikeka.” Naap yia maakemi sisewareya i ookap koora wiar ikiwemik.

Pol Sailas ikos emeria oko saliwamik

16 Aria owowa nain emeria oko nan ikua. Emeria nain sesenariwkin oram wia uuwomiya. Sawur-ke iiriw anirawap ikaiwkin serua opora wia maakem-ikua. Ne ona urufow mua maamuma nan aawem-ikemik. Ne aria i lotu epa neeke ikiwem-ikemkun os-ke yia urufap yiokak. 17 Murarep yiokami naap yia kirirowam-ikua, “Wi teeria fain Mua Maneka miiw maa unowa nomakiya nain uuwow teeria-ke, ne Mua Maneka yia aawow era nain yia maakimik.” 18 Ne anane sira naapiw yia onam-ikaeya Pol opora nain wiar miimap miimap lebumarep iir oko kiremi sawur nain kakankami maakek, “Yeesus Krais unuma-pa nefa maakiyem, no emeria fain piipue. No ikiwe!” Naap maakeya sawur-ke emeria nain piipuap ikiwok.

19 Ne aria emeria nain ona urufow mua maamuma imenowa era wiar pueya samor akena kema bagiwiramik. Naeya Pol Sailas ikos wia opami wia mufep fiirimow epa wia pikiwemi wi medistret wapena-pa wia wuamik. 20 Ne wia maakemik, “Wiam erup fain wi Yuuda mua-ke, ne i fan yiar ekapep wiena sira yia maakemi yia momorimik, sira eena i Rom mua wiar ookowa emi yiar ikua nain.” 22 Naap maiwkin wi yakeyak pun iikirami Pol Sailas ikos wia kakankamik. Aria wi medistret-ke mia suuwowa wiar iiraremi sarua wiareka wia maakemik. 23 Aria samor akena sarua wiaremi wia aawep pikiwep koora-pa wia wuamik. Ne koora urufow mua nain baliwep akena wia urufam-ikainok naep opora kekanowa iwemik. 24 Naeya wiam erup nain pikiwep koor kemena unowa nain tepak akena-pa wia wuamik. Ne nomokow kakawa maneka erup aawep merena ere-erup wiar tapimap wia kaikamik.

Mua Maneka-ke Pol Sailas ikos wia asipak

25 Aria uura wi wiam erup Mua Maneka kema suuwami someka awem-ikemik. Ne wi mua papako koora ekap ikemik nain pun wia miimam-ikemik. 26 Someka awem-ikaiwkin uura epa gonegon maa ofofona maneka urupemi koora nain ofofeya omopora tenomakek, ne wi seniw wia kaikap-puamik nain onaiw puomakek. 27 Ne koora urufow mua nain maa ofofona furewap iikirak-na koor omopora tenep ikomakeya urufak. Naap urufap wi mua koora ekap ikemik nain iiriw baurarurumemik naep ona fura maala aawep wame ifakiminen naep onak. 28 Naap onam-ikaeya Pol-ke faremi maakek, “No me name ifakime, i me bauraremik, unowiya fan ikemik.”

29 Aria mua nain-ke arua pekapuk naep uuwow mua wia farek. Arua pekapiwkin keker opap karanemi karuwiw ikiwep wi wiam erup wiar ekami keema muuna mikak. 30 Ne kiiriw iikirami wia aawep owaruma wia porop wia nokarek, “Yena maneka niam erup, yo kamenap onap yeeliwa ikok era eliwa-pa ikiwinen?” 31 Ne maakemik, “Nena teeria onaiya yiena Maneka Yeesus opora wiar opap eliwa ikowen,” naap maakemik. 32 Ne ona teeria mua papako kereriwkin Yeesus opora wia maakemik. 33 Ne aria mua nain-ke wiam erup wia aawep pikiwep ikemika wia yasuwomak. Ne ona teeria onaiya Yeesus opora wiar opiwkin wia yasuwamik. 34 Ne ona koora wia pikiwep maa enowa wienakek. Ona teeria onaiya Yeesus opor eliwa wiar opamik, naapeya manek akena kemelamik.

35 Aria naap ikok epa wiimeya wi medistret-ke ami mua wia sesekiwkin ikiwep koora urufow mua nain maakemik, “Wiam erup nain wia wasirkeya ikiwuk.” 36 Ne mua nain-ke Pol maakek, “Wi medistret opora nia sesekomami maemik, ni koora ekowa aakisa weeserek. Ni ikiweka naimik. Aria aakisa ni eliw ikiwowen.” 37 Naap wia maakeya Pol-ke ami mua nain wia maakek, “I yiam erup me mua oram-ke, i Rom anim onoma tepak-pa

ikemik.
16.37Iiriw Yuudia kame Rom anim onoma-ke miiw unowa nain urufam-ikua. Wi Rom mua ikemik, ne wi mua me Rom kakeniw nain wi papako-ke maamuma-pa sesenarep Rom tepak-pa ikemik. Mua unumiya pun Rom tepak-pa ikemik. Ne wi pina onikuan-na opora-pa wia wuap pina wiimik. Oram maneka me wia arufimik. Pol wiawi iiriw Rom tepak-pa ikua, ne Pol pun Rom tepak-pa ikua (Aposel 22.27-28). Naapeya oram maneka arufamik nain wi Rom sira puukamik.
Ne i sira samora-ko me onamik, nain wi medistret-ke mua unowa mokoka-pa oram akena yia sarua pu-puukami koora-pa yia wuamik. Ne aakisa kokot yia iirarep yia seseku naep onimik-i? Sira naap-ko me ikua. Wiena ekapep yia iirarowa-ke ikua.” Naap maemik.

38 Aria wi ami mua kiiriw ikiwep medistret Pol opora nain wia maakemik. Wi wiam erup i Rom anim onoma tepak-pa ikemik wiam naimik. Naap wia maakiwkin miimap keker opamik. 39 Ne wiena ikiwep opora eliwa wia maakemik, kema siinuk naep. Ne koora-pa wia aawep poromi sira eliwa wia naemi ikoka kuisow owowa yiar piipuap ikiweka wia naakemik. 40 Aria wiam erup koora nain piipuap oromi Lidia koora wiar ikiwemik. Ikiwep o koora-pa wi Kristen teeria wia urufap, wi kekanowa aawuk naep opora wia maakemik. Naap maakep-puami ikiwemik.

Copyright information for `MHL