Acts 17

Pol Sailas ikos Tesalonaika-pa uuwamik

Aria Pol Sailas ikos ikiwemi Amfipolis owowa-pa fuunemi owowa nain piipuap ikiwep Apolonia owowa-pa fuunemik. Ne ikiwemi Tesalonaika owowa-pa fuunemik. Owowa nain wi Yuuda mua lotu koora kuisow nan wiar ikua. Ne Pol ona sira ookami Sabat fofa-pa lotu koora wiar ikiwem-ikua, naap onowa arow arek. Lotu koora nan Mua Maneka opora wia ookomami feenap wia maakem-ikua, “Mua Maneka ona iiriw maek, Krais ikoka ifakimiwkin umeya ona kiiriw iikirowinon. Naap maek nain opora aakisa makena imenarek. Mua Krais maem nain, unuma Yeesus.” Naap wia maakeya wi Yuuda mua papako opora makena-ke naep opora wiar opap Pol Sailas ikos wiokamik. Ne wi emeria unumiya ne wi Grik emeria mua iiriw Mua Maneka opora wiar ookamik nain pun opora nain miimap wiar opamik.

Aria wi Yuuda mua papako-ke naap urufap Pol Sailas ikos wia kerewamik. Ne fiirimow epa ikiwep wi mua samora oram maneka nan yiawem-ikemik nain wia aawep unow onaiya owow maneka-pa kirir-iraparemik. Naap onami Yeson koora wiar ikiwep Pol Sailas ikos wia akupamik, wia opap opora-pa wia wuau naep. Wia akupamik-na me wia imenamik. Naapeya wi Yeson ne wi Kristen papako wia opap wia mufep ikiwep wi medistret wapena-pa wiar wuap faremi maemik, “Wi teeria fain owow unowa wiar ikiwemi sira wiar samo-samoramik nain aakisa ekapep i owowa-pa yiar ikemik. Ne Yeson-ke wia aawep ona koora-pa wia wuak. Ne wis-ke saria maneka Siisar sira wiar poromi maimik, ‘Saria maneka oko ikua, unuma Yeesus naimik.’” Wi opora naap maemi wi woos mua ne mua unowa kema wia bagiwirowiwkin opora unu-unowa aakunemik. Naeya wi woos mua-ke Yeson ne wi Kristen papako opora-pa wia wuami pina sesenareka wia naakemik. Ne maamuma wiep oromik.

Wi Beria Yeesus opora opamik

10 Aria naap ikok kokomareya wi Kristen-ke Pol Sailas ikos Beria owowa wia sesekiwkin ikiwemik. Beria owowa-pa ikok wi Yuuda lotu koora wiar ikiwemik. 11 Wi Yuuda teeria Tesalonaika-pa ikemik nain emina kekanep opora me miimimik, ne wi Yuuda teeria Beria-pa ikemik nain-ke mua saria ikemik. Ne wi Pol opora wiar miimap ifaniw ikemik. Ne opora nain makena-ki e weetak, naap maemi Mua Maneka opora iiriw wiar siisimep-puamik nain baliwep urufami kema suuwam-ikemik. 12 Naap onami wi emeria mua unowa opora wiar opamik, ne wi Grik saria mane-maneka emeriya muaiya, wis pun opora wiar opamik. 13 Ne wi Yuuda Tesalonaika-pa ikemik nain-ke meta feenap miimamik, Pol Beria owowa-pa Mua Maneka opora wia maakem-ikaiya. Naeya ekapemik. Ekapep wi owow emeria mua papako kema wia mikami opora unu-unowa wia maakiwkin kema bagiwirap iiwua wia farem-ikemik. 14 Naeya wi Kristen mua-ke ewur akena Pol aasa aawinok naep sesekamik, ne Timoti Sailas ikos Beria-pa nan ikemik. 15 Wi Pol wiim-ikiwep Atens owowa-pa wuamik. Ne kirep ekapu naep oniwkin Pol-ke wia maakek, “Ni ikiwemi Timoti Sailas ikos wia maakiwkin epa oram wiar ikainok-na ewuriw ekapep feeke efa imenuk.” Naap wia maakeya ikiwemik.

Pol Atens owowa-pa opora wia maakek

16 Pol Atens owowa-pa Timoti Sailas ikos nan wia arewap ikua. Owowa nain wiena kema-pa maa siraromakep inasina arowamik. Sira nain wiar urufap kema eliwa me ikua. 17 O lotu koora wiar ikiwep wi Yuuda ne wi owow oko teeria Mua Maneka opora wiar opimik nain opora wia maakem-ikua. Ne fiirimow epa pun wiar ikiwep wi emeria mua Yeesus opor eliwa nain wia maakem-ikua. 18 Ne wi Epikuria amis mua ne wi Sitoik amis mua-ke
17.18Wi Grik amis mua teeria unowa. Wi Epikuria teeria-ke feenap maimik, mia kookalowa ookami kemelowiw ikowa nain maa maneka-ke. Ne wi Sitoik teeria-ke maimik, i yiena kekanowa-pa ikowa-ke, mia kookalowa me ookiyen, naap maimik.
Pol wameiya aakunemik. Ne o Yeesus umep kiiriw iikirak nain opora wia maakem-ikaeya papako-ke maemik, “Mua fain maa mauwa opora daawalem-ikaiya noma?” Ne papako-ke maemik, “Wi owow papako inasina-ko wiar aakuniya-yon.”
19 Naap maemi Pol aawep fiirimow epa Areopagus naimik nan pikiwemik. Nan wuap maakemik, “Sira eliwa, no opor miililina maen nain-ko maeya nefar amisariyen. 20 Moram i opora papako nefar miimamik nain i pepena. Naapeya i opora nain onoma nefar amisaru naep.” Naap maakemik. 21 (Wi Atens ne wi owow oko mua ekapep nan ikemik nain sira feenap onimik. Wi uuwow oko marew anane pokap ikok opor miililina nanaremi sira enuma aakunowa kookalimik.)

22 Ne Pol-ke mua unowa o warikap ikaiwkin iikirap maek, “Ni Atens mua, yo nia urufiyem nain ni inasina unowa kema suuwiman nain kekanowa akena opiman. 23 Yo owowa niar soomaremi ni maa sirarep yiena inasina-ke maiman nain niar urufam. Ne epa oko-pa maa esimsa oko-pa feenap siisimep-puaman, ‘Inasina i me nefa amisaremik nain esimsa faneka.’ Ne ni inasina me amisarep oram maneka patiriman nain yos-ke aakisa fain nia maakiyem. 24 Inasina fain-ke miiwa onak ne maa unowa fain onak, ne owow iinan ne miiwa maa muutitik pun urufam-ikaiya. O Mua Maneka-ke, o mua wapena-pa inasin koora kuaimik neeke ikowa nain wia. 25 I o maa onomowa me pepek, ne o maa me iiwarinon. Moram os-ke maa unowa fain onak ne ewar yieya i eliw ikaimik. 26 Ona epa pepekimep miiwa neeke ononer ikauk naep mokomokoka mua kuisow onak, ne mua kuisow nain-ke mokoka pukemi ikip miiwa unowa fain pepek eramik. 27 O epasia-pa me ikaiya, i yiamiya ikaiya, nain wi wameiya efar ekapep wiena kema-pa efa amisaruk naep maa unowa fain onak. 28 Moram i o kekanowa-pa uuwami yiawem-miawimik. Nain niena amis mua papako pun iiriw naap maemik, ‘Miiw emeria mua unowiya Mua Maneka muuka wiipa wiar ikemik,’ naap maemik.

29 I Mua Maneka muuka wiipa yiam maimik, naapeya maa sirarep fain Mua Maneka-ke me naiyen. Kema-pa gol, siliwa ne nomona sirarimik nain naap me maiyen, weetak. 30 Iiriw Mua Maneka me amisarep maa momor onam-ikemik nain me yia samoram-ikua. Ne aakisa os-ke miiw mua unowa fain kema kirep sira samora nain piipueka yia naek. 31 Moram i miiw mua unowa fain ona sira kakeniw-pa yia mekawow fofa nain iiriw maep-pueya ikua. I yia mekawow mua iiriw pepekimep-puak, mua nain Yeesus Krais, ne o ilenuk naep umep ikaeya kiiriw iikirowak.” Pol-ke naap wia maakek.

32 Aria Pol aakun-ikiwemi opora ara fain, “umep ikaeya iikirowak”, nain maeya miimap wi mua papako-ke amap-niiremik, ne papako-ke maakemik, “Opora nain iir oko-pa-ko kiiriw maeya nefar miimiyen.” 33 Nain weesereya Pol fiirimow epa wiar piipuap ikiwok. 34 Ne mua papako opora wiar opap ookamik. Wi nain mua oko unuma Dionisius, mua nain Areopagus fiirimow epa aakunow mua-ke, ne emeria oko pun unuma Damaris ne emeria mua papako.

Copyright information for `MHL