Acts 18

Wi Korin Pol samoramik

Aria naap ikok Pol Atens owowa piipuap Korin owowa ikiwok. Nan ikok Yuuda mua oko amisarek. Mua nain unuma Akuila, ne ona emeria Prisila. Wiena owow onoma Pontus, ne wi iiriwiw ikiwep Itali miiwa-pa wiar ikemik. Nan ikaiwkin Rom owow saria maneka Klodius-ke wi Yuuda mua unowiya wia iirareya wiam erup ekapep Korin-pa ikemik. Aria Pol nan kererep wia urufowa ikiwok. Ne wi uuwowa feenap, sel onap sesekimik, ne Pol pun uuwowa sira naap, naapeya wi wiamiya ikok sel onam-ikua. Ne anane Sabat fofa-pa Yuuda lotu koora wiar ikiwem-ikua. Nan ikok wi Yuuda ne wi Grik unowiya Yeesus opor eliwa opuk naep wia ookomam-ikua.

Ne aria Sailas Timoti ikos Masedonia-pa ikok ikip Pol wiar fuuniwkin sel uuwowa nain piipuap Yeesus opora wia maakowa uuwowa muutiw opak. Ne wi Yuuda opora wia mikap ookomami wia maakem-ikua, “Yeesus, o Krais-ke.” Ne wia, wis-ke opora wiar fienami oporiw samo-samoram-ikemik. Naap oniwkin wi sira urufuk naep ona mia suuwowa tukunemi wia maakek, “Ni samor aawep-na niena maa-ke. Mua Maneka opora nan nia maakem. Yo pina marew. Ne yo aakisa wi owow oko teeria wiar ikiwep Yeesus opor eliwa nain wia maakinen.”

Naap wia maakep-puami lotu koora piipuap mua oko koora wiar ikiwok. Mua nain unuma Titius Yastus ne o Mua Maneka sira ookiya. O koora nain wi Yuuda lotu koora mamaiya akena-pa wiar ikua. Aria wi Yuuda lotu koora woos mua Krispus, ona teeria onaiya kema kirep yiena Maneka Yeesus opora wiar opamik. Ne wi Korin mua papako pun Yeesus opora wiar opamik. Naeya wia yasuwamik.

Naap ikok uura Pol mokoka-keriw kirep maa feenap urufak, Yeesus-ke wiar imenarep maakek, “No mua me wia keker opa. Yo opora nain me efar kokote, mua unowa wia maakem-ike. 10 Moram yo nefamiya ikem. Ne mua oko me nefa arufikuan, me nefa samorikuan. Moram owowa fain emeria mua unowa yena teeria-pa efar ikemik,” naap maakek. 11 Naeya mokoma kuisow enakiwa owowa nan ikok Mua Maneka opora wia maakem-ikua.

12 Aria naap ikok Akaiya kame Galio-ke anim onoma maneka iimarek. Ne wi Yuuda unowiya wiam fiirimep ekapep Pol opap o wiar pikiwemik, opora-pa wuau naep. 13 Wiar pikiwep maakemik, “I Mua Maneka ookow sira nain mua fain-ke sira oko-pa pikiwiya. Ne emeria mua yookuk naep kema wia mikami wia maakiya.” Naap maemik. 14 Ne Pol iikirap aakunekam naep onak-na Galio-ke iikirap wi Yuuda nain wia maakek, “Ni Yuuda, mua fain sira puukap sira samora onap wadolalekak-na yo eliw ni opora balisow akena niar miimekam. 15 Ni niena neke sira, unum sira-sira ne opor sira-sira nain aakunep kakenowa efa maakeman nain me niar miiminen. Niena eliw kakenowen, yos-ke me niar kakeninen.” 16 Naap wia maakemi ami mua wia maakeya wia iirariwkin ikiwemik. 17 Ikiwemi wiena lotu koora woos mua Sostenes opap Galio uuwow koor miira-pa nan aruf-iraparemik. Ne Galio-ke wiena maa-ke naemi me wia puukak.

Pol Siria kame-pa ikok Antiok owowa ikiwok

18 Aria Pol epa lawisiw maala Korin-pa nan ikua. Nan ikok wi Kristen teeria wia piipuap Prisila ne Akuila wiamiya aasa aawep Siria ikiwemik. Ikiwem-ikok Senkria owowa-pa fuunemik. Ne nan wia maakeya afifa puukomamik. Moram o iiriw opora Mua Maneka maakep koonowap-puap ikok afifa me puukam-ikua. Ne aakisa afifa puukowa maek. 19 Aria wi naap ikiwemi Efesus owowa fuunemik. Fuunep Prisila Akuila ikos nan ikaiwkin Pol waisow wi Yuuda lotu koora wiar ikiwep Yeesus opora wia ookomak. 20 Wia maakem-ikaeya maakemik, “No i yiamiya lawisiw feek ikok wiimar ikiwe.” 21 Ne wia, o feek me ikainen naek. Naap maep ikiwekam naep onami wia maakek, “Mua Maneka era-ko wuomeya-na nainiw niar ekapinen.” Wia maakep-puap aasa aawep Efesus piipuap ikiwok. 22 Ikiwemi Sisaria owowa fuunek. Nan ikok wi Kristen teeria wia urufap-puami Antiok owowa orok.

23 Aria Pol Antiok-pa nan lawisiw ikok iir oko-pa owow papako Galesia ne Frigia miiwa-pa ikemik nain wiar ikiwok. Owowa kui-kuisow wiar ikiwep Yeesus teeria opora wia maakemi wia kekanowam-ikua.

Apolos Efesus-pa uuwak

24 Aria Yuuda mua oko unuma Apolos, ona owowa Alesandria. Mua nain ekapep Efesus-pa nan ikua. O mua aakunowa eliwa ne Mua Maneka opora wiar amisar-afurak. 25 O iiriwiw yiena Maneka Yeesus opora maakiwkin uuwowa nain kema iikirap aakunowa piik iram-miek. Yeesus sira baliwep akena wia maakem-ikua. Nain o Yon Baptais wi mua kema kiriwkin wia yasuwak, nain muutiw amisarek. 26 Ne keker opowa marew wi Yuuda lotu koora wiar ikiwep Yeesus opora wia maakem-ikua. Aria Prisila Akuila ikos o opora wiar miimap aawep wiena koora pikiwemik. Nan Mua Maneka opor makena fookap maakemik. 27 Ne naap ikok Apolos Akaiya ikiwinen naeya wi Kristen teeria-ke no eliw ikiwinan maakemik. Neemi wi Akaiya ikoka Apolos sira eliwa-pa aawuk naep parosifa-pa wia maakemik. Aria o ikiwep wiar fuunek. Nan ikok wi mua unowa mokoka-pa wi Yuuda wiamiya oporiw irakek. O Mua Maneka opora wiar siisimep-puamik nain kaisap baliwep akena fookami naap wia maakek, “Yeesus o Krais-ke.” Naap wia maakemi opora wiar porok. Naap onami Yeesus teeria kema wia kekanowak, eena iiriw Yeesus-ke wia aaweya ona teeria-pa wiar aremik nain.

Copyright information for `MHL