Acts 19

Pol Efesus-pa Kristen teeria wia asipak

Aria Apolos Korin-pa nan ikua. Ne Pol-ke Frigia-pa nan ikok soor era ookami orop Efesus owowa-pa fuunek. Nan wi Kristen mua papako wia imenak. Wia imenap wia nokarek, “Ni Yeesus Krais opora wiar opaman nain Ewar Eliwa-ko niar orok-i e weetak?” Naeya maemik, “Weetak, Ewar Eliwa nain i-ko me yia maakemik.” Ne kiiriw wia nokarek, “Naap nain onoma kamenap nain nia yasuwamik?” Ne maemik, “Iiriw Yon Baptais wia yasuwowa maek nain i kiikir pina wasirkamkun yia yasuwamik.” Ne wia maakek, “Makena, iiriw Yon Baptais wia yasuwam-ikua nain feenap wia maakek, ‘Ni kema kirep sira samo-samora oniman nain piipuiwkin nia yasuwinen. Ne ikoka mua oko yo murarowa-pa ekapiya nain opora wiar opaka.’ Yon Baptais-ke naap maek. Aria yo aakisa makena nia maakiyem, mua nain unuma Yeesus.” Pol-ke naap wia maakek. Aria wi opora naap miimap yiena Maneka Yeesus unuma-pa yia yasuweka naiwkin wia yasuwamik. Ne Pol wapena inasikap ikiwosa-pa wiar wueya Ewar Eliwa wi wiar oreya opora sira onaiya aakunemik. Ne Mua Maneka-ke kema wieya o opora wiar maemik. Iir nain mua ten kuisow erup naap wia yasuwamik.

Aria Pol anane wi Yuuda lotu koora wiar ikiwep opora wia maakem-ikua. Kakeniw siiwa arow naap keker opowa marew Mua Maneka opora wia maakem-ikua. Mua Maneka pika kemena-pa wiar ikowa opora baliwep wia maakemi kema wia mikam-ikua. Ne mua papako-ke emina kekanep opora me wiar miimami mua unowa mokoka-pa Kristen sira nain wiar firekam-ikemik. Naap oniwkin Pol wi nain wia piipuap wi Kristen teeria wia aawep wiena wenup ikemik. Ne anane somek mua Tiranus naimik nain suule koora-pa nan wiar pokap yiena Maneka Yeesus opora wia maakem-ikua. 10 Wi mokoma erup naap onam-ikemik. Ne iir nain Esia kame wi Yuuda ne wi Grik yiena Maneka Yeesus opora meta manekareya miimamik.

11 Aria Mua Maneka-ke Pol kekanowa iweya ona wapena-pa maa miililina unowa onam-ikua. 12 Ne Pol me wiar ikiwem-ikua nain wis-keriw ekapem-ikemik. Wiena malopat ne uuwow konim kakawa naap nain aawep ekapep Pol mia tiimap pikiwep wi napum mua mia iinan-pa wiar wuiwkin napuma sariarem-ikemik. Ne mua papako sawur mia-pa wiar ikemik nain wiar baurariwkin sariarem-ikemik.

13 Ne wi Yuuda serua mua pun owowa kui-kuisow wiar ikiwep wi sawur mia-pa wiar ikemik nain wia saliwu naep onamik. Ne wis pun yiena Maneka Yeesus unuma-pa sawur wia iirarowa akimami feenap maemik, “Yo Yeesus unuma-pa nia iirariyem, Pol unufiya naap.” 14 Aria wi Yuuda pris woos mua oko unuma Skewa, ona muuka ikur okaiwi-pa erup nain-ke Pol ifarimemi naap onam-ikemik. 15 Iir oko sira naap onam-ikaiwkin sawur nain-ke wia maakek, “Yo Yeesus kekanowa wiar amisarem, ne Pol pun amisarem, ne ni mua kamenap nain-ke, naeya efa iiraru naep oniman?” 16 Ne mua sawur onaiya ikua nain-ke iikirami samor akena wia aruf-iraparek. Ne wia opap mia suuwowa wiar pere-perekami wia papaskak. Naap wia oneya saporma ikemika mia aka onaiya bauraremik. 17 Wi Yuuda ne wi Grik owowa nan ikemik nain meta miimap mia fufuemik. Ne yiena Maneka Yeesus unuma purupemik. 18 Ne emeria mua unowa Yeesus opora wiar opap Pol wiar ekapep pina sira-sira onam-ikemik nain wasirkamik. 19 Ne wi serua mua pun pina wasirkami wiena maikua maifa-pa siisimep onam-ikemik nain pekapomakemik. Ne epa maneka-pa fiirimep mokoka kuisow wuap kuumemik. Maifa kuumemik nain wi iiriw maamuma feenap sesenaremik, tausen ten ikur (50,000). 20 Ne naapeya Yeesus opora meta manekareya emeria mua unowa Yeesus ookamik.

Wi Efesus-ke Pol iiwua purupomamik

21 Aria naap ikok Pol ona kema-pa maek, “Yo Masedonia ne Akaiya miiwa owowa kui-kuisow wiar ikiwep-puap ikoka Yerusalem orainen. Ne Yerusalem-pa neek ikok wiimar Rom ikiwep-ko wia urufinen.” 22 Naap maep ona uuwow epaskun mua wiam erup Timoti Erastus ikos wia sesekeya wi kiikir Masedonia kame ikiwemik. Ne ona Esia-pa lawisiw nan ikua.

23 Aria nan ikaeya Efesus mua papako-ke wi Kristen teeria iiwua wia pikiwemi fare-ikiwemik. 24 Onoma feenap, mua oko unuma Demitrius naimik, os-ke siliwa kuumep mua miira sirarep, fain inasin emeria Atemis naiya. Ne inasina nain koor gelemuta-pa wuowa nain pun sirarem-ikua. Wi mua unowa uuwowa nan maamuma maneka aawem-ikemik. 25 Ne aria ona uuwow epaskun iiwawun wia fiirimep wia maakek, “Emawik, yo opora-ko efar miimeka. Ni amisareman, i yiena uuwowa fain-ke maamuma maneka yia puukomiya. 26 Nain mua Pol fain-ke wi emeria mua kema wia mikeya o opora ookimik. Os-ke naap maiya, mua wiena kema-pa maa sirarep inasina naimik nain maken marewa, naap yia maiya. 27 Ne ikoka opora nain-ke i uuwowa yiar orowawinon. I owow emeria mua ne wi Esia owow unowa fain inasin Atemis nain farimik. Ne aakisa Pol opora nain-ke o unuma wiar porekam naep oniya. Naap oneya ikoka yiena inasina Atemis unuma wiar poraikuan, ne ona sirin koora maneka nain pun oram maneka neek ikainon.”

28 Aria Demitrius naap maeya wi samor-ko kema bagiwirap kerew faremi feenap maemik, “I Efesus inasina maneka Atemis waisow maneka!” 29 Naap maep owow gone-pa fare-ikiwemik. Naap ikiwemi Masedonia mua wiam erup Gaius Aristakus ikos wia opap fiirimow epa wia pikiwemik. Wiam erup eena Pol wameiya soomarem-miemik nain. 30 Naeya Pol wi teeria nain wiar ikiwekam naep oneya wi Kristen mua papako-ke me ikiwinok naep asipamik. 31 Ne wi anim onom mua unumiya Pol womar opamik nain pun opora sesekomami maakemik, fiirimow epa nain me wiar ore naakemik.

32 Ne aria fiirimowa-pa opora momor aakunemik. Mua papako-ke maa oko maemi kiriremik ne papako-ke maa oko maemi kiriremik. Naapeya wi unowiya momoraremik, i moram naep fiirimow epa ekapemik. 33 Ne wia, wi Yuuda-ke mua oko unuma Alesanda naimik nain gone orowa suuwamik. Ne o orop gone-pa iimareya urufap maemik, mua fain muuta nain faremik-yon aa. Ne Alesanda-ke wi poporaruk naep wapena wia onomak. Wapena wia onomak-na weetak, wi o urufap Yuuda mua-ke naemi kiiriw kerew faremik, “I Efesus inasina Atemis waisow manek akena!” Wi epa maala naap farem-ikemik.

35 Naeya owow urufow mua-ke kererep wia poporarowami maek, “Emawik, i amisaremik, i owow maneka fain inasina Atemis sirin koora aakisa is-ke urufimik, ne nomon maneka iinan-pa orok nain pun urufimik. 36 Mua unowa nain yiar amisaremik, ne wi sailowa me pepek, naapeya ni kekelka ikeka, sira samo-samora me oneka. 37 Ne ni mua wia pekapeman fain yiena sirin koora-pa maa me yiar ikumaremik, ne yiena inasina nain-ko me yiar firekamik. 38 Aria Demitrius ona uuwow mua onaiya, mua oko-ko wia amukarowa wiar ikainok-na i opora kakenow epa yiar ikua. Ne i anim onoma woos mua yiar ikemik, wis-ke eliw opora niar kakenikuan. 39 Ne ni opor oko-ko niar ikainok-na ni iir oko-pa fofa wuap fiirimow epa-pa kakeneka. 40 I lawil akena irakowa imenekamik. Ne i owow onaiya yia nokarikuan-na i kamenap wia maakiyen? Moram opora fain onoma marew nain fariman.” 41 Aria owow urufow mua nain opora naap wia maakep weesereya wia iirareya pukemi ikiwomakemik.

Copyright information for `MHL