Acts 2

Ewar Eliwa-ke orok

Aria Pentikos fofa kerereya wi aposel unowiya wiam fiirimep koora kuisow-pa ikemik. Naap ikaiwkin iinan-pa ewar tuunowa saarik wiar orok. Koor kemena wi ikemik nan orop epa iiwawun aawok. Ne maa oko epia omaiwa saarik nain urufamik. Nain-ke oromi pukep ononer arep emeria mua kui-kuisow woos erekina-pa wiar ikomakek. Ne Mua Maneka Ewar Eliwa-ke kema wieya wi unowiya opora ononer aakunemik. Eena Ewar Eliwa aakunowa wia suuwak nain aakunemik.

Wi Yuuda mua ne wi owow oko teeria Mua Maneka kema suuwimik nain pun Yerusalem ekapep nan ikemik. Aria wi ewar tuunowa maneka nain miimap unow akena ekapep wia imararemik. Wia imararemik-na wi Yeesus teeria-ke opora ononer wiar aakuniwkin wia miimap kema unu-unowa wuamik. Ne maemik, “Nee, teeria fain naap aakunimik nain wi Galili mua-ke aa, wi iiriw naap-ko me aakunem-ikemik! Ne aakisa kamenap naep i owowa kui-kuisow opora sira-sira yiar aakuniwkin wia miimimik? I teeria Yerusalem ekapep ikemik fain owowa naap naap ekapemik: Patia, Midia, Elam, ne Mesopotemia, Yuudia, Kapadosia, Pontus ne Esia. 10 Ne i papako i Frigia, Pamfilia, Isip ne ikip Libia kame Sairini mamaiya-ke, ne i Krit ne i Arebia. Ne i Rom mua pun ekapep fan ikemik nain papako i Yuuda ne papako wi owow oko teeria Mua Maneka sira ookimik nain-ke. Aria Mua Maneka ona kekanowa-pa maa miililina ne mauwow mane-maneka onak nain yiena opora-pa yiar maiwkin miimimik.” 12 Naap maep soranep kema unu-unowa wuamik. Ne wi-wieniw wiam nokaremi maem-ikemik, “Sira fain kamenap-ke noma?” Naap maemik. 13 Ne wi mua papako-ke wi Yeesus teeria wia amap-niiremi maemik, “Aa, wi teeria fain eka kekanowa enep momoraremik.”

14 Ne wi aposel ten kuisow erup nain iimarep ikok Pita-ke kerewa maek, “Ni Isrel emar, ne ni emeria mua unowiya Yerusalem owow maneka-pa ikeman fain efa miimeka, sira imenarek fain kemena nia maakinen. 15 I teeria fain eka kekanowa enemik, naap yia maiman. I eka kekanowa me enemik, weetak. Aakisa uuriw ikua, ne uuriw eka kekanowa-ko me enimimik. 16 I naap aremik nain iiriwiw profet Yoel sira fain iiriw maep-puak. Nain feenap,

17 ‘Mua Maneka-ke maek, “Ikoka miiwa weeserow epa mamaiyarem-ikaeya yos-ke yena Ewar Eliwa ni emeria mua unowiya niinen. Ne niena muuka wiipa-ke ikoka yo opora efar piawem-miawikuan. Wi takir eliwa-ke ikoka mokoka-keriw kiremi maa urufikuan, ne wi panewowa-ke ikoka maa inawera-pa urufikuan.
18 Ae, yena uuwow emeria mua yena Ewar wiemkun opora epa maneka-pa efar maikuan.
19 Ne ikoka yos-ke aaperek iinan-pa ne miiwa-pa maa sira-sira imeninen. Aka, mukuna ne kawus maneka imeninen.
20 Ne ikoka ama mokoka uminon ne siiwa oka kirinon, aka saarik. Ne naap ikok Maneka ekapow fofa imenarinon, fofa maneka nain sira ononaiya imenarinon.
21 Ne mua naarewe-ke efa kema suuwap efa farimik nain wia aawinen.”’
(Yoel 2.28-32)

Mua Maneka-ke naap maek.

22 Aa emar unowik, opora fain miimeka. Yeesus eena Nasaret mua nain iiriw Mua Maneka kookalowa-pa mauwowa ne maa miililina sira-sira onam-ikaeya niena wiar urufap amisareman. Mua nain Mua Maneka-ke sesekeya orok. 23 Ne o sira kamenap oniwkin uminok nain Mua Maneka-ke iiriw maep-pueya iirakuma fan nis-ke o opap wi mua sira samora wapena-pa wiar wuiwkin samorami nomokow moke-pa patot wariwkin umok. 24 Nain Mua Maneka-ke ona kekanowa-pa iikirowami umowa wiar weeserowak, moram o umow kekanowa nomakek. 25 Ne i nembesir Dewit pun o maemi maek. Feenap,

‘Yiena Maneka anane yo efamiya ikaeya urufiyem. Ne anane yo mikikira-pa efar ikok yo efa kekanowiya, naapeya yo keker opowa marew.
26 Naeya yo yame irap kemelami opora ariman wasirkiyem. Yo umowa nain umep kiiriw iikirinen naem-ikaiyem.
27 Moram no ikoka umow owowa-pa feeke me efa wuap-puinan, ne yo nena mauwow mua nefa kookaliyem fain umemkun-na eruwa-pa feeke me efa wuap-pueya me peelalinen.
28 Nos-ke yo era eliwa ookowa nain efa maaken. Ne yo efamiya ikaeya yo manek akena nefa kemeliyem.’
(Someka 16.8-11)

Dewit-ke naap wiar maek.

29 Aria emar unowik, yo aakisa yiena nembesir Dewit opora nain ariman nia maakemkun amisareka. Dewit umeya owowa fan soopamik, mokoka fan ikua. 30 Ne os pun Mua Maneka profet-ke, naapeya Mua Maneka o opora maakep koonowak nain iiriw amisarek. Nain feenap, Mua Maneka-ke ikoka Dewit nembesir teeria mua kuisow owow saria wuinon, iiriw Dewit ona saria ikua naap ikainon. Naap maakeya Dewit Mua Maneka wiimar maa naap onowa nain amisarep ikok Krais ikoka iikirowa nain maek. Mua Maneka o me piipuak. Naeya umow owowa-pa me ikainon, ne soopiwkin me peelalinon. 32 Aria mua Yeesus maem nain Mua Maneka-ke iikirowak, ne i unowiya yiena mokoka-pa urufap nain maimik. 33 O iikirap iinan urupep aakisa ona wiawi Mua Maneka aken ekeria-pa wiar pokap ikua, ne wiawi o Ewar Eliwa iwowa maakep-puak nain wiar aawok. Ewar Eliwa wiar aawep yia sesekomaya orop i mia-pa maa miililina imenomakek nain yiar urufami miimaman. 34 Ne owow iinan urupowa nain Dewit feenap maek,

‘Mua Maneka-ke yena Maneka naap maakek, “Yo aken ekeria-pa efar pokap ikaeya nena iiwua iiwawun kepur tepak-pa nefar wuamkun nos-ke wia ifemakep ikainan.” ’
(Someka 110.1)

Dewit nain me ona wame maek, weetak, o Yeesus naep naap maek.

36 Aria emar unowik, yo efa miimeka, ni Yeesus niena nomokow moke-pa wuiwkin umok nain aakisa Mua Maneka-ke o Krais ne Maneka wuak.” Pita-ke opora naap wia wafuromak. 37 Ne wi emeria mua unowa opora naap miimap kema samoraremik. Naeya Pita ne wi aposel papako wia maakemik, “Ne i aakisa sira kamenap oniyen noma?” 38 Ne wia maakek, “Ni mua unowiya sira samora onaman nain wasirkap mikikira-pa wuiwkin Yeesus unuma-pa nia yasuwiyen. Ne ni pina niar weeserinon. Ne Mua Maneka ona Ewar Eliwa nia sesekomaya niar ikainon. 39 Mua Maneka iiriw Ewar Eliwa sesekowa maep koonowak nain nis, niena muuka ne nembesir teeria naap nia onomiya. Ne wi owow oko oko teeria pun naap wia onomiya.”

40 Aria Pita opor unowa wia ookomami opora papako pun wia maakemi maek, “Ni aakisa kema kireka, naeya pina niar weesereya wi mua sira samora yoowa aawimik nain ni me aawowen.” 41 Naap wia maakeya wi unowa kema kiriwkin wia yasuwamik. Ne iir nain emeria mua wia tuunamik nain tausen arow (3,000) teeria wiar ekamik. 42 Ne wi aposel-ke Mua Maneka sira wia maakem-ikemik. Wi unowiya wiam fiirimep maa enowa epaskun enem-ikemik. Ne emera pun naap, wu-wuepap enem-ikemik, Mua Maneka anane kema suuwami farem-ikemik.

Wi Kristen teeria enuma sira eliwa onamik

43 Aria Mua Maneka-ke ona kekanowa wieya wi aposel wiena wapena-pa maa miililina onam-ikemik. Ne wi emeria mua unowa naap urufap Mua Maneka kema tootonemik. 44 Ne wi aposel unow onaiya wiam fiirimep Mua Maneka kema suuwam-ikemik. Ne wiena maa unowa sererkap wiam asipam-ikemik. 45 Ne wi miiwa, koora ne maa mutumut wiar ikua nain sesekap maamuma nain aawep wiam asipam-ikemik. Wi emeria mua maa iiwarem-ikaiwkin maamuma sererkap wiem-ikemik. Maa mauwa iiwarem-ikemik nain wiam asipam-ikemik. 46 Wi kemelami kookalowa kuisow wuap anane maneka tempel koora-pa wiam fiirimep Mua Maneka farem-ikemik, ne pun wiena koora-pa wiam fiirimep maa enem-ikemik. 47 Wi kema kuisow ikok wiam kookalep Mua Maneka kema suuwami, unuma wiar purupem-ikemik. Ne wi sira eliwa naap oniwkin wi sisin mua-ke wi teeria eliwa-ke wia naem-ikemik. Ne Mua Maneka-ke emeria mua papako kema wiar kiripeya teeria nain wiar ekiwkin teeria manekarem-ikua.

Copyright information for `MHL