Acts 20

Pol Masedonia kame ne Grik kame wiar ikiwok

Aria wi ikiwiwkin Pol-ke wi Kristen teeria wia fiirimep opora wia maakemi kema wia iikirowak. Wia maakep weesereya ni feek ikeka wia naakep-puami wia piipuap Masedonia ikiwok. Ikiwep Masedonia kame-pa nan Kristen teeria opora wia maakemi kema wia iikirowam-ikua. Naap oni-ikiwemi wi Grik miiwa-pa fuunek. Ne siiwa arow nan ikua. Nan ikok Siria kame ikiwinen naek. Aasa aawekam naep onam-ikaeya maakemik, wi Yuuda-ke nefa ifakimu naep opora kokot anumamik. Naap maakiwkin nainiw kirep Masedonia ikiwok. Nan ikok Siria orainen naek. Mua papako o wameiya Siria orowa naep ookamik nain wi kiikir aasa aawep Troas oromik. Orop nan yia arewap ikemik. Wi mua teeria nain wiena unuma feenap: Beria owow mua oko Sopater, o Pirus muuka-ke, Tesalonaika mua wiam erup Aristakus Sekundus ikos, Debe owow mua Gaius, Esia kame mua wiam erup Tikikus Trofimus ikos, ne Timoti, wi naap orop yia arep ikemik. Ne i nan ikok emer kekanowa maapora urufap-puap Filipai-pa aasa aawep wi wiokap oromik. Aasa-pa ikim-ikok fofa ikur aawep Troas-pa fuunemik. Fuunep sande kuisow nan ikemik.

Pol Troas owowa-pa Yutikus iikirowak

Aria Sande urera i Kristen teeria emera wu-wuepap enimu naep yiam fiirimemik. Ne Pol-ke opora yia wafuromak. O uurika wia piipuinen naep opora wia wafuram-ikomeya ikip uur gonegon. I koor kemena iinan samapora-pa yiam fiirimep ikemik nain arua unow akena isimap-puiwkin ikua. Ne takir eliwa oko unuma Yutikus, os pun koor ara wuara-pa pokap ikok Pol opora wiar miimam-ikua. Miimam-ikok inep puep kema marewarep oro-boonek. Ne wi mua koor iinan-pa orop opap urufamik-na o iiwawun umok. 10 Ne Pol-ke orop takira nain mia iinan-pa wame wafurami opap kemenimep ikok wia maakek, “Ni kema me samorareka. O me umok, kema enuma ikua.” 11 Naap wia maakep-puami kiiriw koor iinan urupok. Urupep emer ikowa wu-wuepami wiamiya enek. Wi emera enep weesereya aakunem-ikaiwkin epa wiimok. Epa wiimeya Pol wia piipuap ikiwok. 12 Ne wi kema tenep takira nain aawep ikiwemik.

Pol Troas piipuap Miletus ikiwok

13 Aria Pol ona mereniw ikiwekam naep yia maakek, “Ni aasa aawep miimep ikiwemi Asos-pa efa areweka.” Naeya i miimep ikiwep nan arep ikemkun o ekapep yiar fuunek. Nan owawiya aasa aawep Mitilini mot oromik. 15 Nan ikok Mitilini mot piipuap ikiwem-ikok Kios mot mamaiya arem-ikemkun epa wiimok. Ne mot nain nomakep uurik ona Samos-pa fuunemik. Nainiw uurik ona Miletus-pa fuunemik. 16 Ne Pol Esia kame epa maala neeke me wiar ikainen naek. Yo ewur ikiwep Yerusalem-pa neeke Pentikos fofa urufinen naep Efesus me ikiwok.

Pol wi Efesus Kristen woos mua kema wia kekanowak

17 Aria i Miletus-pa fuunep Pol-ke wi Efesus Kristen woos mua ekapep efa urufuk naep opora wia sesekomak. 18 Ekapiwkin wia fiirimep wia maakek, “Ni yo iiriw epa maala Esia-pa fan niamiya ikok uuwam-ikem nain yo sira balisow efar amisareman. 19 Yo Mua Maneka uuwowa-pa wiar ikok yena yame porop mua meta marewa yame wuam. Yo uuwowa muuta nain wi Yuuda-ke sira-sira efa onami efa samoriwkin yoowa aawem-ikem. Ne yo omow eka onaiya uuwam-miem. 20 Nain Mua Maneka opora kuisow-ko me wiar pipilimem, weetak. Ni baliwep ikeka naep opor unowa arimaniw nia maakem. Epa maneka-pa nia maakem-ikem, ne niena koora-pa nia fiirimep nia maakem-ikem. 21 Ni Yuuda ne ni owow oko teeria pun opora kuisow nainiw nia maakem-ikem. Ni kema kirep Mua Maneka mokok epa-pa pina wasirkami yiena Maneka Yeesus opora opaka naep naap nia maakem-ikem.

22 Yo naap uuwam-ikem. Ne aakisa Mua Maneka Ewar Eliwa-ke efa sesekeya yo nainiw kirep Yerusalem ikiwekam naep oniyem. Yo maa kamenap efar imenarinon nain me amisarem. 23 Ne yo amisarem nain yo owow unowa neeke yiawem-ikemkun Mua Maneka Ewar Eliwa-ke feenap kema yiem-ikua, koora ekowa ne pina ikoka nefar imenarinon naek. 24 Nain yo miiwa-pa ikowa fain me maa maneka-ke naiyem. Yo kema manekiw ikem nain yo yena uuwowa yiena Maneka Yeesus yiek nain uuwami silewinen naep, eena Mua Maneka yia kemalep pina yiar iirariya, opor eliwa nain.

25 Yo iiriw fan ni niamiya ikok Mua Maneka pika kemena-pa wiar ikowa opora nain nia maakem-ikem. Ne aakisa yo nia piipuiyem nain miira nainiw me efa urufowen. 26 Naapeya aakisa maken akena nia maakiyem, yo Mua Maneka opora iiwawun balisow nia maakem, naapeya mua kain-ke ona pina-pa umiya nain ona pina-ke, yo pina marew. 28 Ni maa urufami ikeka, ne Mua Maneka teeria pun balisow wia urufam-ikeka, teeria eena ona muuka Yeesus aka-pa wia sesenarek nain. Moram Mua Maneka Ewar-ke wia urufow mua nia wueya nis-ke wia urufam-ikaiman. 29 Yo feenap maiyem, nia piipuap ikiwemkun yo murarowa-pa wi mua samora siow asia saarik nain-ke ekapep nia momoru naep kema nia mikikuan. 30 Ne niena teeria mua papako-ke iisiw yiokuk naep i opor makena fain yiar kiri-kiripikuan. 31 Naapeya ni maa urufami ikeka, yo iiriw mokoma arow fan ikok, uura, amirika naap omow eka onaiya opora nia maakem-ikem, nain kema suuweka.

32 Aakisa Mua Maneka wapena-pa nia wuiyem ne ona opor eliwa nain-ke kema eliwa niinok naiyem. Ni naap ookam-ikaiwkin ikoka Mua Maneka mua kema wia dubileya ikemik nain unow onaiya epa eliwa-pa ikowen. 33 Ni sira efar amisareman, yo mua oko maamuma ne mia suuwowa naap nain-ko kookalep me nia nomarep niar aawem-ikem, weetak. 34 Yo yena wapena-pa uuwap maamuma imenap yena uuwow teeria onaiya maa sesenarem-ikemik. 35 Ne maamuma nainiw mua maa marewa nain wia asipam-ikem, nain efa urufaman. Yo sira yookuk naep naap onam-ikem. Yiena Maneka Yeesus naap maek, ‘Maa niiwkin wiar aawowa nain eliwa, nain mua oko maa wiowa nain-ke eliw akena.’ Nain kema suuwami sira naap onam-ikeka.” 36 Opor unowa naap wia maakep weesereya wi unow onaiya keema muuna mikap Mua Maneka faremik. 37 Nain weesereya Pol wia piipuap ikiwekam naep oneya opa-wuakep omemik. 38 Opora iiriw wia maakek nain, “yo miira kiiriw nainiw me efa urufowen,” wi nain kema suuwap kema samorarep omemik. Ne o wiim-orop aasa-pa wuamik.

Copyright information for `MHL